ଗୋପବନ୍ଧୁଙ୍କ ହୃଦୟ ଥିଲା ବିଶ୍ବବ୍ୟାପୀ
ରାଉରକେଲା: ଓଡ଼ିଆ ଭାଷା ବିକାଶ ମଞ୍ଚ ଆନୁକୂଲ୍ୟରେ ସାଧାରଣ ସମ୍ପାଦକ ଆର୍ତ୍ତତ୍ରାଣ ମହାପାତ୍ରଙ୍କ ଆବାହକତ୍ୱ ଓ ସଭାପତି ପ୍ରଶାନ୍ତ କୁମାର ପତିଙ୍କ ଅଧ୍ୟକ୍ଷତାରେ ଇସ୍ପାତ ମାର୍କେଟ ଆମ୍ବାଗାନ ସ୍ଥିତ ଗୋପବନ୍ଧୁଙ୍କ ପ୍ରତିମୂର୍ତ୍ତି ତଳେ ତାଙ୍କର ୯୮ତମ ଶ୍ରାଦ୍ଧବାର୍ଷିକୀ ଅବସରରେ ଶ୍ରଦ୍ଧାଞ୍ଜଳି ସଭା ଅନୁଷ୍ଠିତ ହୋଇଯାଇଛି । ମୁଖ୍ୟଅତିଥି ରୂପେ ଗଗନ ବିହାରୀ ଧଳ ଗୋପବନ୍ଧୁଙ୍କ ଓଡ଼ିଶା ପ୍ରୀତି ,ଭାରତ ପ୍ରୀତି ଓ ବିଶ୍ବ ପ୍ରୀତି ସମ୍ପର୍କରେ ଅଭିଭାଷଣ ରଖି ତାଙ୍କର ହୃଦୟ କିପରି ବିଶ୍ବବ୍ୟାପୀ ଥିଲା ,ତତ୍ସମ୍ପର୍କରେ ଆଲୋଚନା ରଖିଥିଲେ । ପ୍ରାରମ୍ଭିକ ଅଭିଭାଷଣରେ ଶ୍ରୀ ମହାପାତ୍ର ଗୋପବନ୍ଧୁଙ୍କ ବନ୍ଦୀର ଆତ୍ମକଥା , କାରାବରଣ ଓ ଗୋ ମାହାତ୍ମ୍ୟରୁ ବିଭିନ୍ନ ଉଦ୍ଧୃତି ଦେଇ ଭାଷାଭିତ୍ତିକ ଉତ୍କଳ ପ୍ରଦେଶ ଗଠନରେ ତାଙ୍କର ଗୁରୁତ୍ବପୂର୍ଣ୍ଣ ଭୂମିକା ସମ୍ପର୍କରେ ଆଲୋକପାତ କରିଥିଲେ ।
ସଭାପତି ଶ୍ରୀ ପତି ବକ୍ତାମାନଙ୍କର ବକ୍ତବ୍ୟର ବିଶ୍ଳେଷଣ କରି ଓଡ଼ିଆ ଜାତୀୟତାବାଦର ମହାପ୍ରବର୍ତ୍ତକ ରୂପେ ଚିତ୍ରଣ କରି ମଣିଷ ଗଢ଼ା କାରଖାନା ସତ୍ୟବାଦୀ ବନବିଦ୍ୟାଳୟ, ସତ୍ୟବାଦୀ ସାହିତ୍ୟ ପତ୍ରିକା ଓ ଆଜିର ଲୋକପ୍ରିୟ ତଥା ଜନପ୍ରିୟ ଦୈନିକ ସମ୍ବାଦପତ୍ର ”ସମାଜ“ର ତାଙ୍କ ଉଜ୍ଜ୍ୱଳ ଚିନ୍ତାରାଶିର ନୀତିକାନ୍ତି ବୋଲି ଅଭିହିତ କରି ଏହି ସବୁ ଅନୁଷ୍ଠାନ ଓ ପତ୍ରପତ୍ରିକା ମାଧ୍ୟମରେ ସେ ଜାତୀୟଚେତନାର ନବଦିଗନ୍ତ ଉନ୍ମୋଚନ କରିଥିଲେ ବୋଲି ମନ୍ତବ୍ୟ ରଖି ସେ ପ୍ରଥମେ ଦେଶସେବକ ଓ ପରେ ସାହିତ୍ୟ ସେବକ ବୋଲି କହିଥିଲେ । ଏହି ଶ୍ରଦ୍ଧାଞ୍ଜଳି ସଭାରେ ସର୍ବଶ୍ରୀ ପ୍ରଫୁଲ୍ଲ କୁମାର ସାମଲ, ରମେଶ ଚନ୍ଦ୍ର ସେଠୀ, ଗଙ୍ଗାଧର ପୁହାଣ,ଅଜିତ ନାୟକ, ବସନ୍ତ ନାୟକ , ରମେଶ ଚନ୍ଦ୍ର ପାତ୍ର, ରାଧାମୋହନ ନାୟକ, ଅରବିନ୍ଦ ପାତ୍ର, ଭାସ୍କର ନନ୍ଦ, ଜଟାଧାରୀ ମାଝୀ, ନିହାର ସାମଲ ପ୍ରମୁଖ ଉପସ୍ଥିତ ରହି ଉତ୍କଳମଣି ଗୋପବନ୍ଧୁଙ୍କ ପବିତ୍ର ସ୍ମୃତିଚାରଣ ସହିତ ସେହି ମହାନ ବରପୁତ୍ରଙ୍କ ପ୍ରତି ଭାବଭରା ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ।
କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
