ଜନନାୟକ ଏନ୍. ଭାସ୍କର ରାଓଙ୍କ ୭୪ତମ ଜନ୍ମଦିବସ ପାଳିତ
ହଜାର ହଜାର ସମର୍ଥକଙ୍କ ଗହଣରେ କେକ୍ କାଟିଲେ ପୂର୍ବତନ ରାଜ୍ୟସଭା ସାଂସଦ; ଦୀର୍ଘାୟୁ ଓ ସୁସ୍ଥ ଜୀବନ କାମନା
ରାୟଗଡ଼ା: ରାୟଗଡ଼ା ଜିଲ୍ଲାର ଜଣେ ବରିଷ୍ଠ ରାଜନେତା, ପୂର୍ବତନ ରାଜ୍ୟସଭା ସାଂସଦ ତଥା ବିଜୁ ସ୍ୱାଭିମାନ ମଞ୍ଚର ଆବାହକ ଓ ସଭାପତି ଏନ୍. ଭାସ୍କର ରାଓଙ୍କ ୭୪ତମ ଜନ୍ମଦିବସ ଗୁରୁବାର ରାୟଗଡ଼ାରେ ଉତ୍ସାହ, ଉଲ୍ଲାସ ଓ ଆଡମ୍ବରର ସହ ପାଳିତ ହୋଇଛି। ପ୍ରତିବର୍ଷ ପରି ଚଳିତ ବର୍ଷ ମଧ୍ୟ ତାଙ୍କ ସମର୍ଥକ, ପ୍ରଶଂସକ, ଶୁଭେଚ୍ଛୁ ଏବଂ ବିଭିନ୍ନ ରାଜନୈତିକ ଓ ସାମାଜିକ ସଂଗଠନର ପ୍ରତିନିଧିମାନେ ବହୁ ସଂଖ୍ୟାରେ ଯୋଗଦେଇ ଜନ୍ମଦିନକୁ ସ୍ମରଣୀୟ କରିଥିଲେ।
ସକାଳୁ ରାୟଗଡ଼ାସ୍ଥିତ ତାଙ୍କ ବାସଭବନରେ ଶୁଭେଚ୍ଛୁମାନଙ୍କର ଭିଡ଼ ଲାଗି ରହିଥିଲା। ବିଭିନ୍ନ ସଂଗଠନର ପ୍ରତିନିଧି, ସମାଜସେବୀ, ବୁଦ୍ଧିଜୀବୀ ଓ ନେତା–କର୍ମୀମାନେ ପୁଷ୍ପଗୁଚ୍ଛ, ଉତ୍ତରୀୟ ଓ ସ୍ମାରକ ପ୍ରଦାନ କରି ତାଙ୍କୁ ଜନ୍ମଦିନର ଅଭିନନ୍ଦନ ଜଣାଇବା ସହ ସୁସ୍ଥ, ସୁଖମୟ ଓ ଦୀର୍ଘାୟୁ ଜୀବନ କାମନା କରିଥିଲେ।
ପରେ ହୋଟେଲ ତେଜସ୍ୱୀ ସମ୍ମୁଖ ପଡ଼ିଆରେ ଆୟୋଜିତ ସ୍ୱତନ୍ତ୍ର ଜନ୍ମଦିବସ ସମାରୋହରେ ଏନ୍. ଭାସ୍କର ରାଓ କେକ୍ କାଟିଥିଲେ। ହଜାର ହଜାର ସମର୍ଥକଙ୍କ ଉପସ୍ଥିତିରେ ସମଗ୍ର ପରିବେଶ ଉତ୍ସବମୁଖର ହୋଇଉଠିଥିଲା। ଉପସ୍ଥିତ ଜନସାଧାରଣ ତାଙ୍କ ପ୍ରତି ଅକୁଣ୍ଠ ସମର୍ଥନ ଜଣାଇବା ସହ ଆଗାମୀ ଦିନରେ ମଧ୍ୟ ସେ ଜନସେବାରେ ସକ୍ରିୟ ରୁହନ୍ତୁ ବୋଲି ଆଶା ପ୍ରକାଶ କରିଥିଲେ।
ରାୟଗଡ଼ା ଜିଲ୍ଲାର ରାଜନୈତିକ ଇତିହାସରେ ଏନ୍. ଭାସ୍କର ରାଓ ଜଣେ ପ୍ରଭାବଶାଳୀ ଓ ଜନପ୍ରିୟ ନେତା ଭାବେ ପରିଚିତ। ପ୍ରାୟ ପାଞ୍ଚ ଦଶନ୍ଧିରୁ ଅଧିକ ସମୟ ଧରି ସେ ସକ୍ରିୟ ରାଜନୀତିରେ ରହି ଜନସେବାକୁ ନିଜ ଜୀବନର ପ୍ରମୁଖ ଲକ୍ଷ୍ୟ କରିଆସିଛନ୍ତି। ଅଣକଂଗ୍ରେସ ରାଜନୀତିରୁ ନିଜର ରାଜନୈତିକ ଜୀବନ ଆରମ୍ଭ କରି ସେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଆଦର୍ଶରେ ଅନୁପ୍ରାଣିତ ହୋଇ ଦୀର୍ଘ ସମୟ ବିଜୁ ଜନତା ଦଳରେ କାର୍ଯ୍ୟ କରିଥିଲେ।
ପରବର୍ତ୍ତୀ ସମୟରେ ସେ ବିଜୁ ସ୍ୱାଭିମାନ ମଞ୍ଚ ଗଠନ କରି ରାୟଗଡ଼ା ଜିଲ୍ଲାର ରାଜନୀତିରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ। ଆଜି ମଧ୍ୟ ଏହି ସଂଗଠନ ଜିଲ୍ଲାରେ ନିଜସ୍ୱ ସଂଗଠନାତ୍ମକ ଶକ୍ତି ଓ ପରିଚୟ ବଜାୟ ରଖିଛି।
୭୪ ବର୍ଷ ବୟସରେ ପଦାର୍ପଣ କରିଥିଲେ ମଧ୍ୟ ଏନ୍. ଭାସ୍କର ରାଓ ଆଜି ମଧ୍ୟ ସମାନ ଉତ୍ସାହରେ ସାମାଜିକ, ରାଜନୈତିକ ଓ ଜନକଲ୍ୟାଣମୂଳକ କାର୍ଯ୍ୟକଳାପରେ ସକ୍ରିୟ ରହିଛନ୍ତି। ଜନସାଧାରଣଙ୍କ ସହ ତାଙ୍କର ନିବିଡ଼ ସମ୍ପର୍କ ଏବଂ ସରଳ ବ୍ୟକ୍ତିତ୍ୱ ତାଙ୍କୁ ଜିଲ୍ଲାରେ ଜଣେ ‘ଜନନାୟକ’ ଭାବେ ପ୍ରତିଷ୍ଠିତ କରିଛି।
ଜନ୍ମଦିବସ ଅବସରରେ ବିଭିନ୍ନ ମହଳରୁ ତାଙ୍କ ନିକଟକୁ ଶୁଭେଚ୍ଛା ବାର୍ତ୍ତା ପହଞ୍ଚିଥିବା ବେଳେ ସମର୍ଥକମାନେ ତାଙ୍କର ସୁସ୍ଥତା, ଦୀର୍ଘାୟୁ ଓ ନିରନ୍ତର ଜନସେବା ପାଇଁ ଶୁଭକାମନା ଜଣାଇଥିଲେ।
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
