ଆଦାନୀ ଗ୍ରୁପ୍ର ନଜରରେ ରାୟଗଡ଼ା!
ଥେରୁବାଲି ଇମ୍ଫା ପରିସର ଗସ୍ତରେ ଗୌତମ ଓ କରନ ଆଦାନୀ
ଓଡ଼ିଶାରେ ₹୧.୦୮ ଲକ୍ଷ କୋଟିର ସମନ୍ୱିତ ଆଲୁମିନିୟମ ପ୍ରକଳ୍ପ ନେଇ ଚର୍ଚ୍ଚା • ରାୟଗଡ଼ା ପାଇଁ ₹୪୧,୬୫୦ କୋଟିର ଆଲୁମିନା ରିଫାଇନେରୀ ପ୍ରସ୍ତାବକୁ ନେଇ ବଢ଼ିଲା ଆଶା
ରାୟଗଡ଼ା: ରାୟଗଡ଼ା ଜିଲ୍ଲା ତଥା ଦକ୍ଷିଣ ଓଡ଼ିଶାରେ ବୃହତ୍ ଶିଳ୍ପାୟନର ସମ୍ଭାବନାକୁ ନେଇ ପୁଣିଥରେ ଚର୍ଚ୍ଚା ଜୋର ଧରିଛି। ଆଦାନୀ ଗ୍ରୁପ୍ର ଅଧ୍ୟକ୍ଷ ଗୌତମ ଆଦାନୀ ଓ କରନ ଆଦାନୀଙ୍କ ଥେରୁବାଲିସ୍ଥିତ ଇମ୍ଫା ପରିସର ଗସ୍ତ ଶିଳ୍ପ ମହଳରେ ନୂଆ ଉତ୍ସାହ ସୃଷ୍ଟି କରିଛି। କମ୍ପାନୀର ବରିଷ୍ଠ ଅଧିକାରୀ ଓ ବୈଷୟିକ ଦଳ ଅଞ୍ଚଳର ଖଣିଜ ସମ୍ପଦ, ଭୂମି, ପରିବହନ ଓ ଶିଳ୍ପ ଭିତ୍ତିଭୂମିର ସମୀକ୍ଷା କରିଥିବା ସୂଚନା ମିଳିଛି।
ସୂତ୍ର ଅନୁଯାୟୀ, ଆଦାନୀ ଏଣ୍ଟରପ୍ରାଇଜେସ୍ ଓ ୟୁଏଇ ଭିତ୍ତିକ International Resources Holding (IRH) ମିଳିତ ଭାବେ ଓଡ଼ିଶାରେ ପ୍ରାୟ ₹୧.୦୮ ଲକ୍ଷ କୋଟି ବ୍ୟୟରେ ଏକ ସମନ୍ୱିତ ଆଲୁମିନିୟମ ଇକୋସିଷ୍ଟମ୍ ବିକଶିତ କରିବା ପାଇଁ ଯୋଜନା କରୁଛନ୍ତି। ଏଥିରେ ୪ ମିଲିୟନ ଟନ କ୍ଷମତାର ଆଲୁମିନା ରିଫାଇନେରୀ, ୨ ମିଲିୟନ ଟନ ଆଲୁମିନିୟମ ସ୍ମେଲଟର, ଡାଉନଷ୍ଟ୍ରିମ୍ ପାର୍କ, ୪,୦୦୦ ମେଗାୱାଟ୍ କ୍ୟାପ୍ଟିଭ୍ ପାୱାର ପ୍ଲାଣ୍ଟ ଓ ୪୦୦ ମେଗାୱାଟ୍ ଗ୍ରୀନ୍ ଏନର୍ଜି ୟୁନିଟ୍ ସ୍ଥାପନର ପ୍ରସ୍ତାବ ରହିଥିବା ଚର୍ଚ୍ଚା ହେଉଛି।
ରାୟଗଡ଼ାରେ ପ୍ରାୟ ₹୪୧,୬୫୦ କୋଟି ବ୍ୟୟରେ ବାର୍ଷିକ ୪ ମିଲିୟନ ଟନ କ୍ଷମତାର ଆଲୁମିନା ରିଫାଇନେରୀ ଏବଂ ଆନୁସଙ୍ଗିକ ପାୱାର ପ୍ଲାଣ୍ଟ ସ୍ଥାପନ ପ୍ରସ୍ତାବକୁ ନେଇ ମଧ୍ୟ ଶିଳ୍ପ ମହଳରେ ଆଶା ବଢ଼ିଛି। ଥେରୁବାଲି ଇମ୍ଫା ପରିସର ଗସ୍ତ ପରେ ପ୍ରକଳ୍ପ ସମ୍ପର୍କିତ ପ୍ରକ୍ରିୟା ଅଧିକ ଗତିଶୀଳ ହୋଇପାରେ ବୋଲି ଆଲୋଚନା ଚାଲିଛି।
ମୁଖ୍ୟ ଆକର୍ଷଣ
ମୋଟ ସମ୍ଭାବ୍ୟ ପୁଞ୍ଜିନିବେଶ: ₹୧.୦୮ ଲକ୍ଷ କୋଟି
ରାୟଗଡ଼ା ପାଇଁ ପ୍ରସ୍ତାବିତ ବିନିଯୋଗ: ₹୪୧,୬୫୦ କୋଟି
ଆଲୁମିନା ରିଫାଇନେରୀ କ୍ଷମତା: ୪ ମିଲିୟନ ଟନ/ବର୍ଷ
ଆଲୁମିନିୟମ ସ୍ମେଲଟର: ୨ ମିଲିୟନ ଟନ/ବର୍ଷ
କ୍ୟାପ୍ଟିଭ୍ ପାୱାର ପ୍ଲାଣ୍ଟ: ୪,୦୦୦ ମେଗାୱାଟ୍
ଗ୍ରୀନ୍ ଏନର୍ଜି ୟୁନିଟ୍: ୪୦୦ ମେଗାୱାଟ୍
ଦକ୍ଷିଣ ଓଡ଼ିଶା ପାଇଁ କ’ଣ ବଦଳିପାରେ?
ପ୍ରକଳ୍ପ କାର୍ଯ୍ୟକାରୀ ହେଲେ ରାୟଗଡ଼ା ସମେତ ଦକ୍ଷିଣ ଓଡ଼ିଶାରେ ହଜାର ହଜାର ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବା ସହ ରାସ୍ତା, ବିଦ୍ୟୁତ, ପରିବହନ, ବ୍ୟବସାୟ ଓ ସ୍ଥାନୀୟ ଅର୍ଥନୀତିରେ ବଡ଼ ପରିବର୍ତ୍ତନ ଆସିପାରେ। ତେବେ ପରିବେଶ ସୁରକ୍ଷା, ସ୍ଥାନୀୟ ଲୋକଙ୍କ ପୁନର୍ବାସ ଏବଂ ନିଯୁକ୍ତିରେ ସ୍ଥାନୀୟଙ୍କୁ ପ୍ରାଥମିକତା ଭଳି ବିଷୟଗୁଡ଼ିକୁ ସମାନ ଗୁରୁତ୍ୱ ଦେବା ଆବଶ୍ୟକ ବୋଲି ବିଶେଷଜ୍ଞମାନେ ମତ ଦେଉଛନ୍ତି।
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
