ଡ୍ରିମ୍ ଇଣ୍ଡିଆ ପବ୍ଲିକ୍ ସ୍କୁଲ୍ରେ ସାଇପ୍ରିୟା ୱାକର୍ କ୍ଲବ୍ର ଡିବେଟ୍ ପ୍ରତିଯୋଗିତା
‘ପ୍ରଭାତୀ ଭ୍ରମଣର ଉପକାରିତା ଓ ଅପକାରିତା’ ଉପରେ ଛାତ୍ରଛାତ୍ରୀଙ୍କ ଯୁକ୍ତିତର୍କ — ଲୁକ୍କାୟିତ ପ୍ରତିଭାର ବିକାଶ ସହ ବଢ଼ିଲା ଆତ୍ମବିଶ୍ୱାସ
ରାୟଗଡ଼ା, ୦୮/୦୮/୨୦୨୬: ଛାତ୍ରଛାତ୍ରୀଙ୍କ ମଧ୍ୟରେ ଲୁକ୍କାୟିତ ପ୍ରତିଭାର ଅନ୍ୱେଷଣ, ଯୁକ୍ତିଶୀଳ ଚିନ୍ତନର ବିକାଶ, ସ୍ପଷ୍ଟ ଭାବରେ ନିଜ ମତ ପ୍ରକାଶ କରିବାର ଦକ୍ଷତା ଓ ଆତ୍ମବିଶ୍ୱାସ ବୃଦ୍ଧି ଲକ୍ଷ୍ୟରେ ସାଇପ୍ରିୟା ୱାକର୍ କ୍ଲବ୍, ରାୟଗଡ଼ା ପକ୍ଷରୁ ସ୍ଥାନୀୟ ଡ୍ରିମ୍ ଇଣ୍ଡିଆ ପବ୍ଲିକ୍ ସ୍କୁଲ୍ ପରିସରରେ ଏକ ଡିବେଟ୍ ପ୍ରତିଯୋଗିତା ଆୟୋଜିତ ହୋଇଯାଇଛି।
‘ନିତ୍ୟ ପ୍ରଭାତୀ ଭ୍ରମଣର ଉପକାରିତା ଓ ଅପକାରିତା’ ବିଷୟକୁ ନେଇ ଆୟୋଜିତ ଏହି ପ୍ରତିଯୋଗିତାରେ ବିଦ୍ୟାଳୟର ଛାତ୍ରଛାତ୍ରୀମାନେ ବେଶ୍ ଉତ୍ସାହ ଓ ଆତ୍ମବିଶ୍ୱାସର ସହ ଅଂଶଗ୍ରହଣ କରିଥିଲେ। ପ୍ରତିଯୋଗୀମାନେ ବିଷୟର ଉଭୟ ପକ୍ଷ ଉପରେ ନିଜର ମତାମତ, ତଥ୍ୟ ଓ ଯୁକ୍ତିକୁ ସୁନ୍ଦର ଭାବରେ ଉପସ୍ଥାପନ କରିଥିଲେ।
କାର୍ଯ୍ୟକ୍ରମରେ ସାଇପ୍ରିୟା ୱାକର୍ କ୍ଲବ୍ର ସଭାପତି ୱାକର୍ ଜୟକୃଷ୍ଣ ପ୍ରଧାନ ମୁଖ୍ୟ ଅତିଥି ଭାବେ ଯୋଗଦେଇ ପ୍ରତିଯୋଗିତାର ଶୁଭାରମ୍ଭ କରିଥିଲେ। ଏହି ଅବସରରେ ୱାକର୍ କିଶୋର ଚନ୍ଦ୍ର ପଣ୍ଡା, ୱାକର୍ ପ୍ରକାଶ ଚନ୍ଦ୍ର ବାଉରୀ (ଗଭର୍ନର ଇଲେକ୍ଟ–୨୦୨୭), ୱାକର୍ ଡା. ଏମ୍. ସୁରେଶ କୁମାର, ୱାକର୍ ସୁବାସ ବେହେରା (ସଂସ୍ଥାପକ), ୱାକର୍ ଜଗନ୍ନାଥ ନାୟକ (ସାଧାରଣ ସମ୍ପାଦକ), ୱାକର୍ ଲାଲ୍ ମୋହନ ବେହେରା (ଉପସଭାପତି–I), ୱାକର୍ ବିପ୍ର ଚରଣ ବ୍ରହ୍ମା (ଉପସଭାପତି–II), ୱାକର୍ ବାସୁଦେବ ହୋତା, ୱାକର୍ ଭାସ୍କର ପାଣିଗ୍ରାହୀ ଓ ୱାକର୍ ସଦାନନ୍ଦ ଖାଡ଼ଙ୍ଗା ପ୍ରମୁଖ ଉପସ୍ଥିତ ରହି ଛାତ୍ରଛାତ୍ରୀଙ୍କୁ ଉତ୍ସାହିତ କରିଥିଲେ।
ଅତିଥିମାନେ ନିଜ ଅଭିଭାଷଣରେ ଡିବେଟ୍ର ଶିକ୍ଷାମୂଳକ ଗୁରୁତ୍ୱ ସମ୍ପର୍କରେ ଛାତ୍ରଛାତ୍ରୀଙ୍କୁ ଅବଗତ କରାଇଥିଲେ। କେବଳ ନିଜ ମତ ଉପସ୍ଥାପନ ନକରି, ତଥ୍ୟ, ଯୁକ୍ତି ଓ ସୁଚିନ୍ତିତ ଭାବନା ଆଧାରରେ ନିଜ ମତକୁ ସ୍ପଷ୍ଟ ଓ ସଂଯମିତ ଭାବରେ ପ୍ରକାଶ କରିବାକୁ ସେମାନେ ପରାମର୍ଶ ଦେଇଥିଲେ।
ପ୍ରତିଯୋଗିତାରେ କୁନି କୁନି ଛାତ୍ରଛାତ୍ରୀଙ୍କ ନିର୍ଭୀକ ଭାବରେ ମଞ୍ଚ ଉପରେ ନିଜ ମତ ରଖିବାର ଶୈଳୀ, ଚିନ୍ତନର ପରିପକ୍ୱତା ଓ ଯୁକ୍ତି ପ୍ରଦାନର ଦକ୍ଷତା ଉପସ୍ଥିତ ଅତିଥି ଓ ଶିକ୍ଷକ-ଶିକ୍ଷୟିତ୍ରୀଙ୍କୁ ବେଶ୍ ପ୍ରଭାବିତ କରିଥିଲା। ଡିବେଟ୍ଟି କେବଳ ଏକ ପ୍ରତିଯୋଗିତାରେ ସୀମିତ ନରହି ଛାତ୍ରଛାତ୍ରୀଙ୍କ ଅନ୍ତର୍ନିହିତ ପ୍ରତିଭା ଚିହ୍ନଟର ଏକ ଉତ୍କୃଷ୍ଟ ମଞ୍ଚରେ ପରିଣତ ହୋଇଥିଲା।ଏହି ଅବସରରେ ଡ୍ରିମ୍ ଇଣ୍ଡିଆ ପବ୍ଲିକ୍ ସ୍କୁଲ୍ର ପ୍ରିନ୍ସିପାଲ୍ ରଞ୍ଜନ କୁମାର ପଟ୍ଟନାୟକ, ପ୍ରିନ୍ସିପାଲ୍ ମ୍ୟାଡାମ୍ ସୁନୀତା ପଟ୍ଟନାୟକଙ୍କ ସମେତ ଶିକ୍ଷୟିତ୍ରୀ ଅନିତା ଦେ, ଗାୟତ୍ରୀ ପଟ୍ଟନାୟକ, ମେଘା ଶର୍ମା, ପୂଜା, ଭାଗ୍ୟଶ୍ରୀ ଓ ଶ୍ରୀବାଲି ପଟ୍ଟନାୟକ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମର ସୁଚାରୁ ପରିଚାଳନାରେ ସହଯୋଗ କରିଥିଲେ।
ପ୍ରତିଯୋଗିତାରେ ପ୍ରଥମ, ଦ୍ୱିତୀୟ ଓ ତୃତୀୟ ସ୍ଥାନ ହାସଲ କରିଥିବା କୃତୀ ଛାତ୍ରଛାତ୍ରୀଙ୍କୁ ସାଇପ୍ରିୟା ୱାକର୍ କ୍ଲବ୍ ପକ୍ଷରୁ ପ୍ରମାଣପତ୍ର ପ୍ରଦାନ ସହ ସମ୍ମାନିତ ଓ ପୁରସ୍କୃତ କରାଯାଇଥିଲା। ଏହା ଛାତ୍ରଛାତ୍ରୀଙ୍କ ମନରେ ନୂତନ ଉତ୍ସାହ ଓ ଭବିଷ୍ୟତରେ ଆହୁରି ଭଲ କରିବାର ପ୍ରେରଣା ସୃଷ୍ଟି କରିଥିଲା।
ସାଇପ୍ରିୟା ୱାକର୍ କ୍ଲବ୍ର ଏଭଳି ଶିକ୍ଷାମୂଳକ ପ୍ରୟାସ ଛାତ୍ରଛାତ୍ରୀଙ୍କ ବୌଦ୍ଧିକ ବିକାଶ ସହ ନେତୃତ୍ୱ ଗୁଣ, ଯୁକ୍ତିଶୀଳ ଚିନ୍ତନ, ସାମାଜିକ ସଚେତନତା ଓ ମଞ୍ଚରେ ନିର୍ଭୀକ ଭାବରେ ମତ ପ୍ରକାଶ କରିବାର ଦକ୍ଷତା ବୃଦ୍ଧିରେ ସହାୟକ ହେବ ବୋଲି ଉପସ୍ଥିତ ଅତିଥି, ଶିକ୍ଷକ-ଶିକ୍ଷୟିତ୍ରୀ ଓ ଅଭିଭାବକମାନେ ମତପ୍ରକାଶ କରିଥିଲେ।
“ଶିଶୁ ପ୍ରତିଭାର ଅନ୍ୱେଷଣ ସହ ଆତ୍ମବିଶ୍ୱାସର ବିକାଶ—ଏହି ଲକ୍ଷ୍ୟରେ ସାଇପ୍ରିୟା ୱାକର୍ କ୍ଲବ୍ର ଏହି ପଦକ୍ଷେପ ନିଶ୍ଚିତ ଭାବେ ଏକ ପ୍ରଶଂସନୀୟ ପ୍ରୟାସ।”
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
