କିଡିଙ୍ଗ ଛକ ନିକଟରେ ବୁଲକନରକୁ ସାଇଡ୍ ଦେବା ବେଳେ ଚାଷ ଜମିରେ ଓଲଟିଲା କୋଇଲା ବୋଝେଇ ଟ୍ରକ
କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ଅନ୍ତର୍ଗତ କିଡିଙ୍ଗ ଛକ ନିକଟରେ ଭବାନୀପାଟଣାରୁ ବିଶାଖାପାଟଣାକୁ ସଂଯୋଗ କରୁଥିବା ୬ ନମ୍ବର ରାଜ୍ୟ ରାଜପଥରେ ଏକ କୋଇଲା ବୋଝେଇ ଟ୍ରକ୍ ଧାନ ଚାଷ ଜମିକୁ ଓଲଟି ପଡ଼ିଛି। ମଙ୍ଗଳବାର ଅପରାହ୍ନ ପ୍ରାୟ ୫ଟା ସମୟରେ ଏହି ଦୁର୍ଘଟଣା ଘଟିଛି।
ସୂଚନା ଅନୁଯାୟୀ, ସିଜି-୦୭-ସିଏମ୍-୩୬୧୨ ନମ୍ବର ବିଶିଷ୍ଟ କୋଇଲା ବୋଝେଇ ଟ୍ରକ୍ଟି ଆନ୍ଧ୍ରପ୍ରଦେଶର ବିଶାଖାପାଟଣାରୁ କୋଇଲା ନେଇ ଛତିଶଗଡ଼ର ରାୟପୁର ଅଭିମୁଖେ ଯାଉଥିଲା। କିଡିଙ୍ଗ ଛକ ନିକଟରେ ରାସ୍ତା କଡ଼ରେ ଛିଡ଼ା ହୋଇଥିବା ଜିଜେ-୧୮-ବିଭି-୧୭୬୫ ନମ୍ବର ବିଶିଷ୍ଟ ଏକ ବୁଲକନରକୁ ସାଇଡ୍ ଦେବା ସମୟରେ ଟ୍ରକ୍ଟି ନିୟନ୍ତ୍ରଣ ହରାଇ ଧାନ ଚାଷ ଜମି ତଳକୁ ଓଲଟି ପଡ଼ିଥିଲା।
ଦୁର୍ଘଟଣା ପରେ ଡ୍ରାଇଭର ଟ୍ରକ୍ ଭିତରେ ଫସି ରହିଥିଲେ। ଘଟଣାସ୍ଥଳରେ ସ୍ଥାନୀୟ ଯୁବକମାନେ ତୁରନ୍ତ ପହଞ୍ଚି ଡ୍ରାଇଭରଙ୍କୁ ସୁରକ୍ଷିତ ଭାବେ ଉଦ୍ଧାର କରିବା ସହ ସିକେରକୁପା ଫାଣ୍ଡିକୁ ଖବର ଦେଇଥିଲେ। ଖବର ପାଇ ନର୍ଲା ଥାନା ଅଧୀନସ୍ଥ ସିକେରକୁପା ଫାଣ୍ଡି ଅଧିକାରୀ ମୂରଲୀ ମୋହନ ପିଡିକା ଓ ପୁଲିସ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।
ଅନ୍ୟପଟେ, ଦୁର୍ଘଟଣାରେ ଟ୍ରକ୍ରେ ଥିବା କୋଇଲା ଚାଷ ଜମିରେ ପଡ଼ିଯାଇଛି। ଜମିରେ ଧାନ ତଳି ରହିଥିବାରୁ କୋଇଲା ଯୋଗୁଁ ଫସଲ ନଷ୍ଟ ହେବା ଆଶଙ୍କା ରହିଛି। ଏହାକୁ ନେଇ ଜମି ମାଲିକ ଚିନ୍ତାରେ ପଡ଼ିଛନ୍ତି।
ରିପୋର୍ଟ:ବିଷ୍ଣୁ ଚରଣ ସ୍ୱାଇଁ
