ନର୍ଲା ଡିଗ୍ରୀ କଲେଜରେ ଭୂଗୋଳ ବିଭାଗର ଫଳାଫଳକୁ ନେଇ ଅଭିଭାବକ ଅସନ୍ତୋଷ
ନର୍ଲା: କଳାହାଣ୍ଡି ଜିଲ୍ଲା ନର୍ଲା ପଞ୍ଚାୟତ ସମିତି ଡିଗ୍ରୀ କଲେଜରେ ଭୂଗୋଳ ବିଭାଗର ଫଳାଫଳକୁ ନେଇ ଏବେ ଅଭିଭାବକ ମହଲରେ ତୀବ୍ର ଅସନ୍ତୋଷ ପ୍ରକଟ ହୋଇଛି। ଏମାନେ ଉକ୍ତ କଲେଜର ଅଧ୍ୟାପକ, ଅଧ୍ୟାପିକା ମାନଙ୍କ ଖାମଖିଆଲି ମନୋଭାବ ଯୋଗୁଁ ନିଜର ଛାତ୍ରଛାତ୍ରୀ ମାନଙ୍କ ଭବିଷ୍ୟତ ଅନ୍ଧାର ହେବାକୁ ବସିଛି ବୋଲି ଅଭିଯୋଗ କରିଛନ୍ତି। ପୁ୍ନଶ୍ଚ ଏହି ଡିଗ୍ରୀ କଲେଜର ଭୂଗୋଳ ବ୍ୟତିତ ଅନ୍ୟ ବିଷୟର ଫଳାଫଳ ଠିକ ରହୁଥିବା ବେଳେ ଭୂଗୋଳ ପରୀକ୍ଷାରେ କାହିଁକି ଫଳାଫଳ ନିମ୍ନ ସ୍ତରରେ ରହୁଛି ତାହା ସମସ୍ତଙ୍କ ଦୃଷ୍ଟିର କାରଣ ହୋଇଛି। ପ୍ରାପ୍ତ ସୂଚନା ମତେ ଭୂଗୋଳ ବିଷୟର ପ୍ରଥମ ସେମିଷ୍ଟାରରେ ୧୫ ଜଣ ରେଗୁଲାର ପରୀକ୍ଷାର୍ଥୀ ପରୀକ୍ଷା ଦେଇଥିବା ବେଳେ ପୂର୍ବରୁ ବେକ ଲାଗିଥିବା ୯ ଜଣ ଅର୍ଥାତ୍ ସର୍ବମୋଟ ୨୪ ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିଲେ। ଏଥିରୁ ରେଗୁଲାର କୈାଣସି ଛାତ୍ରଛାତ୍ରୀ ପାସ କରି ନ ଥିବା ବେଳେ ବେକ ଲାଗିଥିବା ଛାତ୍ରଛାତ୍ରୀ ମାନଙ୍କୁ ମଧ୍ୟରୁ ପାଞ୍ଚ ଜଣ ଉତ୍ତୀର୍ଣ୍ଣ କରିଥିଲେ। ରେଗୁଲାରରେ କୈାଣସି ଛାତ୍ରଛାତ୍ରୀ ଉତ୍ତୀର୍ଣ୍ଣ ହୋଇ ନ ଥିବାରୁ ଶିକ୍ଷା ଦାନ ଉପରେ ପ୍ରଶ୍ନବାଚୀ ସୃଷ୍ଟି ହେଉଛି। ସେହିପରି ତୃତୀୟ ସେମିଷ୍ଟାରରେ ଭୂଗୋଳ ବିଷୟରେ ରେଗୁଲାରରେ ୧୨ ଜଣ ପରୀକ୍ଷାର୍ଥୀଙ୍କ ପରୀକ୍ଷା ଦେଇଥିବା ବେଳେ ବେକ ଲାଗିଥିବା ୫ ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିଲେ।ସର୍ବ ମୋଟ ୧୭ ଜଣ ପରୀକ୍ଷା ଦେଇଥିଲେ। ଏଥିରୁ ପୁଣି ରେଗୁଲାରରୁ ୩ ଜଣ ଉତ୍ତୀର୍ଣ୍ଣ କରିଥିଲେ। ଯାହା କି ଅତି ଲଜ୍ଜାର ବିଷୟ ବୋଲି ଶିକ୍ଷା ପ୍ରେମୀ ଓ ଅଭିଭାବକ ମାନେ କୁହନ୍ତି। ଭୂଗୋଳ ବିଷୟର ଶିକ୍ଷା ଦାନ ଉପରେ ଗୁରୁତ୍ବ ଦେବାପାଇଁ ଛାତ୍ରଛାତ୍ରୀ ମାନେ ଅଧ୍ୟକ୍ଷଙ୍କୁ ଗୁହାରି ଜଣାଇ ଥିବା ଏବେ ପ୍ରକାଶ ପାଉଛି।
ଦୀପକ୍ ଠାକୁର୍ ଙ୍କ ରିପୋର୍ଟ୍
