ନବରଙ୍ଗପୁରରେ ଭୋଟର ତାଲିକା ସମ୍ବନ୍ଧୀୟ କାର୍ଯ୍ୟର ସମୀକ୍ଷା
ଦାବି ଓ ଆପତ୍ତି ଅବଧିରେ ଦାଖଲ ଆବେଦନର କେସ୍ ରେକର୍ଡ ଯାଞ୍ଚ କଲେ ନିର୍ବାଚନ ଭୋଟର ତାଲିକା ପର୍ଯ୍ୟବେକ୍ଷକ
ନବରଙ୍ଗପୁର:( ୦୮ ସେପ୍ଟେମ୍ବର ୨୦୨୬)(ରବି ନାରାୟଣ ମହାନ୍ତି)ନବରଙ୍ଗପୁର ଜିଲ୍ଲାରେ ଭୋଟର ତାଲିକା ସମ୍ବନ୍ଧୀୟ କାର୍ଯ୍ୟର ଅଗ୍ରଗତି ଓ ଗୁଣାତ୍ମକ ମାନ ଅନୁଧ୍ୟାନ ନିମନ୍ତେ ଭୋଟର ତାଲିକା ପର୍ଯ୍ୟବେକ୍ଷକ ତଥା ସାଧାରଣ ଉଦ୍ୟୋଗ ବିଭାଗର କମିଶନର ତଥା ଶାସନ ସଚିବ ଶ୍ରୀ ମହମ୍ମଦ ସାଦିକ୍ ଆଲମ୍, ଆଇଏଏସ୍ ଆଜି ନବରଙ୍ଗପୁର ଗସ୍ତ କରିଥିଲେ। ଏହି ଅବସରରେ ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ଡଃ ମହେଶ୍ୱର ସ୍ୱାଇଁଙ୍କ ଉପସ୍ଥିତିରେ ଜିଲ୍ଲାପାଳଙ୍କ କାର୍ଯ୍ୟାଳୟସ୍ଥିତ ଅଶୋକ ମେହେତା ସମ୍ମିଳନୀ କକ୍ଷଠାରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା।ସମୀକ୍ଷା ବୈଠକରେ ଦାବି ଓ ଆପତ୍ତି ଅବଧିରେ ଦାଖଲ ହୋଇଥିବା ବିଭିନ୍ନ ଆବେଦନର ପ୍ରକ୍ରିୟାକରଣ ସ୍ଥିତି ସମୀକ୍ଷା କରାଯିବା ସହ ସୁପର ଚେକିଂ ଅନ୍ତର୍ଗତ ବିଭିନ୍ନ କେସ୍ ରେକର୍ଡ ଯାଞ୍ଚ କରାଯାଇଥିଲା। ବିଶେଷକରି ଭୋଟର ତାଲିକାରେ ନାମ ଅନ୍ତର୍ଭୁକ୍ତି, ନାମ ବାଦ ଓ ତଥ୍ୟ ସଂଶୋଧନ ପାଇଁ ଦାଖଲ ହୋଇଥିବା ଫର୍ମ-୬, ଫର୍ମ-୭ ଓ ଫର୍ମ-୮ର ପ୍ରକ୍ରିୟାକରଣ, ଶୁଣାଣି ସମ୍ବନ୍ଧୀୟ ରେକର୍ଡ ଏବଂ ମାମଲା ଗୁଡ଼ିକର ନିଷ୍ପତ୍ତିକରଣ ସ୍ଥିତି ଅନୁଧ୍ୟାନ କରାଯାଇଥିଲା।ଏହି ଅବସରରେ ଶ୍ରୀ ଆଲମ୍ ଜିଲ୍ଲାର ବିଭିନ୍ନ ରାଜନୈତିକ ଦଳର ପ୍ରତିନିଧିଙ୍କ ସହ ଆଲୋଚନା କରି ଭୋଟର ତାଲିକା ପ୍ରସ୍ତୁତି, ସଂଶୋଧନ ଓ ପ୍ରକ୍ରିୟା ସମ୍ବନ୍ଧୀୟ ବିଭିନ୍ନ ବିଷୟରେ ସେମାନଙ୍କ ମତାମତ ଓ ପରାମର୍ଶ ଶୁଣିଥିଲେ।ଭୋଟର ତାଲିକାକୁ ତ୍ରୁଟିମୁକ୍ତ, ସଠିକ, ସ୍ୱଚ୍ଛ ଓ ନିରପେକ୍ଷ ରଖିବା ଦିଗରେ ରାଜନୈତିକ ଦଳ ଓ ସମ୍ପୃକ୍ତ ସମସ୍ତ ଅଂଶୀଦାରଙ୍କ ସହଯୋଗର ଗୁରୁତ୍ୱ ଉପରେ ସେ ଆଲୋକପାତ କରିଥିଲେ।ନିର୍ବାଚନ ଭୋଟର ତାଲିକା ପର୍ଯ୍ୟବେକ୍ଷକ ନୂତନ ଭୋଟରମାନଙ୍କ ସହ ମଧ୍ୟ ଆଲୋଚନା କରି ଭୋଟର ତାଲିକାରେ ନାମ ପଞ୍ଜୀକରଣ ସମ୍ବନ୍ଧୀୟ ସେମାନଙ୍କ ଅନୁଭୂତି ଓ ମତାମତ ଜାଣିଥିଲେ। ପଞ୍ଜୀକରଣ ପ୍ରକ୍ରିୟାରେ ସେମାନେ ପାଇଥିବା ସୁବିଧା ଓ ସମ୍ମୁଖୀନ ହୋଇଥିବା ସମସ୍ୟା ସମ୍ପର୍କରେ ମଧ୍ୟ ସେ ଅବଗତ ହୋଇଥିଲେ।ନୂତନ ଭୋଟରମାନଙ୍କୁ ନିଜର ନାମ ଭୋଟର ତାଲିକାରେ ସଠିକ ଭାବେ ପଞ୍ଜୀକୃତ ହୋଇଛି କି ନାହିଁ ଯାଞ୍ଚ କରିବା ସହ ନିର୍ବାଚନ ପ୍ରକ୍ରିୟା ପ୍ରତି ସଚେତନ ରହି ଗଣତାନ୍ତ୍ରିକ ପ୍ରକ୍ରିୟାରେ ସକ୍ରିୟ ଭାବେ ଅଂଶଗ୍ରହଣ କରିବାକୁ ସେ ଆହ୍ୱାନ ଦେଇଥିଲେ l ପରବର୍ତ୍ତୀ ସମୟରେ ଜିଲ୍ଲାର ସମସ୍ତ ନିର୍ବାଚନ ପଞ୍ଜୀକରଣ ଅଧିକାରୀ (ERO) ଓ **ସହକାରୀ ନିର୍ବାଚନ ପଞ୍ଜୀକରଣ ଅଧିକାରୀ (AERO)**ମାନଙ୍କ ସହ ସମୀକ୍ଷା ବୈଠକ ହୋଇଥିଲା। ବୈଠକରେ ଫର୍ମ-୬, ଫର୍ମ-୭ ଓ ଫର୍ମ-୮ର ପ୍ରକ୍ରିୟାକରଣ, ଶୁଣାଣି ସମ୍ବନ୍ଧୀୟ କେସ୍ ରେକର୍ଡର ସଠିକ ସଂରକ୍ଷଣ ଏବଂ ଦାଖଲ ଆବେଦନଗୁଡ଼ିକର ନିୟମାନୁସାରେ ଓ ସମୟୋଚିତ ନିଷ୍ପତ୍ତିକରଣ ଉପରେ ବିସ୍ତୃତ ଆଲୋଚନା ହୋଇଥିଲା।ପ୍ରତ୍ୟେକ ମାମଲାରେ ଆବଶ୍ୟକ ଦସ୍ତାବିଜ ଓ ରେକର୍ଡର ଯଥାର୍ଥ ଯାଞ୍ଚ, ଶୁଣାଣି ପ୍ରକ୍ରିୟାର ସଠିକ ପାଳନ ଏବଂ ନିଷ୍ପତ୍ତି ସମ୍ବନ୍ଧୀୟ ରେକର୍ଡର ସୁଚାରୁ ସଂରକ୍ଷଣ ନିଶ୍ଚିତ କରିବାକୁ ଶ୍ରୀ ଆଲମ୍ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ।ଭୋଟର ତାଲିକା ପ୍ରସ୍ତୁତି ଓ ସଂଶୋଧନ କାର୍ଯ୍ୟକୁ ନିର୍ଦ୍ଧାରିତ ନିୟମ, ମାନଦଣ୍ଡ ଓ ସମୟସୀମା ଅନୁଯାୟୀ ସମ୍ପାଦନ କରିବା ସହ ସମଗ୍ର ପ୍ରକ୍ରିୟାରେ ସ୍ୱଚ୍ଛତା, ନିରପେକ୍ଷତା, ସଠିକତା ଓ ଜବାବଦେହିତା ବଜାୟ ରଖିବା ଉପରେ ସେ ବିଶେଷ ଗୁରୁତ୍ୱାରୋପ କରିଥିଲେ।ଏହି ବୈଠକରେ ବିଭିନ୍ନ ରାଜନୈତିକ ଦଳର ପ୍ରତିନିଧି ମାନେ ଯଥା ଭାରତୀୟ ଜାତୀୟ କଂଗ୍ରେସ ଦଳ ର ପ୍ରତିନିଧି ଭାବେ ପ୍ରଦୀପ କୁମାର ସାହୁ, ବିଜୁ ଜନତା ଦଳର ପ୍ରତିନିଧି ଭାବେ ରଜନୀକାନ୍ତ ଶାସମଲ ଏବଂ ପ୍ରମୋଦ ରଥ, ଭାରତୀୟ ଜନତା ପାର୍ଟି ର ପ୍ରତିନିଧି ଭାବେ ସରୋଜ ବେହେରା, ଅତିରିକ୍ତ ଜିଲ୍ଲାପାଳ (ସାଧାରଣ) ଡଃ ପ୍ରମୋଦ କୁମାର ପୃଷ୍ଟି, ଅତିରିକ୍ତ ଜିଲ୍ଲାପାଳ (ରାଜସ୍ୱ) ବିଶ୍ୱଜିତ ବର୍ମାନ, ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ବିରଞ୍ଚି ନାରାୟଣ ଦରୱାନ, ଉପଜିଲ୍ଲାପାଳ ପ୍ରକାଶ କୁମାର ମିଶ୍ର, ଡେପୁଟି କଲେକ୍ଟର (ନିର୍ବାଚନ) ଚିନ୍ମୟ କୁମାର ସାହୁ, ଉପଖଣ୍ଡ ସୂଚନା ଓ ଲୋକ ସମ୍ପର୍କ ଅଧିକାରୀ ସତ୍ୟ ନାରାୟଣ ପ୍ରଧାନ ଙ୍କ ସମେତ ଜିଲ୍ଲାର ସମସ୍ତ ERO, AERO ଏବଂ ବିଭିନ୍ନ ରାଜନୈତିକ ଦଳର ପ୍ରତିନିଧିମାନେ ଉପସ୍ଥିତ ଥିଲେ।
ନବରଙ୍ଗପୁର ଜିଲ୍ଲାରୁ ରବି ନାରାୟଣ ମହାନ୍ତିଙ୍କ ରିପୋର୍ଟ ମସିହା ନିଉଜ୍
