ନାଟକ “ସ୍ବର୍ଗ ” ଦେଖି ବିଭୋର ହେଲେ ଦର୍ଶକ
ରାଉରକେଲା:ରାଉରକେଲାର ଅଗ୍ରଣୀନାଟ୍ଯାନୁଷ୍ଠାନ ସଂପର୍କ କୁମାର ପୂର୍ଣ୍ଣିମୀ ଅବସରରେ ମ୍ୟୁଜିକ ସର୍କଲର ଗଂଗାଧର ମେହର ମଞ୍ଚରେ ମଂଚନ କରିଛି ନାଟକ “ସ୍ବର୍ଗ ” । ଏହି ନାଟକକୁ ଆନୁଷ୍ଠାନିକ ଭାବେ ଉଦଘାଟନ କରିଛନ୍ତି ରାଉରକେଲାର ମାନ୍ଯବର ବିଧାୟକ ସାରଦା ପ୍ରସାଦ ନାୟକ । ସମ୍ମାନିତ ଅତିଥି ଭାବେ ପ୍ରଫେସର ଡ ସମର ମୁଦାଲି ଓ ଡ ପ୍ରଭାତ ମଲ୍ଲିକ ଯୋଗଦାନ କରି ସଂପର୍କର ଏହି ସ୍ବତନ୍ତ୍ର ପ୍ରୟାସର ଭୂୟସି ପ୍ରଶଂସା କରିଛନ୍ତି । ଅନୁଷ୍ଠାନର ସାଂସ୍କୃତିକ ସଂପାଦିକା ସୁଦେଷ୍ଣା ରାଣୀ ରାଉତ ମଂଚ ପରିଚଳନା କରିଥିବାବେଳେ ବରିଷ୍ଠ ସଦସ୍ଯ ସଂଜୀବ ଚାନ୍ଦ ଧନ୍ୟବାଦ ଅର୍ପଣ କରିଛନ୍ତି।
ଟିକିଏ ସୁଖ ଓ ଶାନ୍ତି ପାଇଁ ମଣିଷ ଜୀବନ ସାରା ଅକ୍ଳାନ୍ତ ପରିଶ୍ରମ କରୁଛି । ହେଲେ ଅନେକ ଅଶାନ୍ତି ଅପ୍ରାପ୍ତି ଓ ଅତୃପ୍ତିରେ ଛନ୍ଦି ହୋଇ ସେ ଶେଷ ନିଶ୍ବାସ ତ୍ଯାଗ କରିବାକୁ ବାଧ୍ଯ ହେଉଛି। କେତେକ କହନ୍ତି, ମଣିଷ ନିଜ କୃତ ସତକର୍ମର ଫଳ ପର ଜନ୍ମ ରେ ଲାଭ କରିବ ନହେଲେ ସ୍ବର୍ଗରେ ସୁଖରେ ବସ ବାସ କରିବ । ହେଲେ ମୃତ୍ଯୁ ପରେ ମଣିଷ ସ୍ବର୍ଗକୁ ଯାଉଛି କି ନର୍କକୁ ଯାଉଛି ତାହା କେହି ଜାଣି ନାହାଁନ୍ତି । ଏମିତି ତର୍କ ବିତର୍କ ଭିତରେ କିଛି ଲୋକ ଦି ଢୋକ ମଦ୍ୟପାନ କରି ସ୍ବର୍ଗ ସୁଖ ପାଉଛନ୍ତି ବୋଲି ଦାବି କରୁଛନ୍ତି । ତାହେଲେ ପ୍ରକୃତ ସ୍ୱର୍ଗ କେଉଁଠି ? ମଦ ନିଶାରେ ନା ତ୍ଯାଗ ଓ ସତକର୍ମରେ ? ମୃତ୍ଯୁ ପରେ ନା ମଣିଷର ଜୀବଦ୍ଦଶାରେ ? ଏମିତି ଅସମାହିତ ପ୍ରଶ୍ନକୁ ହାସ୍ୟ ଓ ବ୍ଯଙ୍ଗ ମାଧ୍ୟମରେ ସମାଧାନ କରିଛନ୍ତି ନାଟ୍ଯକାର ଭାସ୍କର ଚନ୍ଦ୍ର ମହାପାତ୍ର ନାଟକ ସ୍ବର୍ଗ ରେ । ତାଙ୍କର ଉଚ୍ଚକୋଟୀର ନିର୍ଦ୍ଦେଶନା ସହିତ କଳାକାର ମାନଙ୍କର ନିଖୁଣ ଅଭିନୟ , ଶକ୍ତି ପ୍ରସାଦ ମିଶ୍ରଙ୍କ ସୁମଧୁର ସଂଗୀତ ପରିବେଷଣ, ସାଗର ସ୍ବରୂପ ସ୍ବାଇଁଙ୍କ ଆଲୋକ ସଂପାତ , ବିଧାନ ପାଣିଗ୍ରାହୀଙ୍କ ସୁନ୍ଦର ରୂପସଜ୍ଜା ,ଦୀପମାଲା ଲାକ୍ରାଙ୍କ ନୃତ୍ଯ ସଂଯୋଜନା ବିଶେଷ କରି ପ୍ରଳୟ ଶତପଥୀଙ୍କ ମନୋରମ ମଂଚସଜ୍ଜା ନାଟକଟିକୁ ବେଶ ଆକର୍ଷଣୀୟ କରିପାରିଥିଲା ।
ମଂଚରେ ଭାସ୍କର ଚନ୍ଦ୍ର ମହାପାତ୍ର, ସୁରେନ୍ଦ୍ର ପାଢୀ, ବିବେକାନନ୍ଦ ଦାଶ, ପ୍ରଳୟ ଶତପଥୀ, ଜନ୍ମେଜୟ ମହାନ୍ତି, ସୌମ୍ୟରଞ୍ଜନ ଭାରତୀ, ପୁଷ୍ପ ଲତା ବିଷୋଇ, ସସ୍ମିତା ବେକ୍ ,ନିକିତା ଜେନା ମନଜିତ କଉର ଓ ରିସିକା ସାହୁଙ୍କ ନିଖୁଣ ଅଭିନୟ ଦର୍ଶକଙ୍କୁ ବାନ୍ଧି ରଖିବାରେ ସଫଳ ହୋଇଥିଲା।
କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
