୩୭ ବର୍ଷର ଶିକ୍ଷକତା ଜୀବନରେ ପୂର୍ଣ୍ଣଚ୍ଛେଦ
ଅବସର ନେଲେ ପ୍ରଧାନ ଶିକ୍ଷୟିତ୍ରୀ ପ୍ରଭାତୀ ଦେବନାଥ
ଉମରକୋଟ:(୦୨/୧୧/୨୬ )(ରବି ନାରାୟଣ ମହାନ୍ତି): ଦୀର୍ଘ ୩୭ ବର୍ଷର ନିରବଚ୍ଛିନ୍ନ ଶିକ୍ଷକତା ଜୀବନରେ ପଡ଼ିଲା ପୂର୍ଣ୍ଣଚ୍ଛେଦ। ଅବସର ଗ୍ରହଣ କଲେ ଗତିଗୁଡ଼ା ସରକାରୀ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ପ୍ରଭାତୀ ଦେବନାଥ। ତାଙ୍କ ଅବସର ଉପଲକ୍ଷେ ବିଦ୍ୟାଳୟ ପରିସରରେ ଏକ ଭାବବିହ୍ୱଳ ଅବସରକାଳୀନ ସମ୍ବର୍ଦ୍ଧନା ସମାରୋହ ଆୟୋଜିତ ହୋଇଥିଲା।ଜଣେ ଶିକ୍ଷକ ବା ଶିକ୍ଷୟିତ୍ରୀ କେବଳ ପାଠ ପଢ଼ାନ୍ତି ନାହିଁ, ବରଂ ଛାତ୍ରଛାତ୍ରୀଙ୍କ ଜୀବନରେ ଜ୍ଞାନର ଆଲୋକ ଜାଳିବା ସହ ସେମାନଙ୍କ ଭବିଷ୍ୟତ ଗଠନରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇଥାନ୍ତି। ଏହି ମହତ୍ତର ଦାୟିତ୍ୱକୁ ଦୀର୍ଘ ୩୭ ବର୍ଷ ଧରି ନିଷ୍ଠା ଓ ଦାୟିତ୍ୱବୋଧର ସହ ତୁଲାଇ ଆସିଥିଲେ ଶ୍ରୀମତୀ ଦେବନାଥ।ସୂଚନା ଅନୁଯାୟୀ, ସେ ୧୯୮୯ ମସିହା ସେପ୍ଟେମ୍ବର ୨ ତାରିଖରେ ଶିକ୍ଷକତା ବୃତ୍ତିରେ ଯୋଗଦାନ କରିଥିଲେ। ଦୀର୍ଘ ୩୭ ବର୍ଷର କର୍ମମୟ ଜୀବନରେ ଅନେକ ଛାତ୍ରଛାତ୍ରୀଙ୍କୁ ଶିକ୍ଷାଦାନ କରିବା ସହ ସେମାନଙ୍କୁ ଉଚିତ ମାର୍ଗଦର୍ଶନ ଦେଇ ଆସିଥିଲେ। ଶେଷରେ ୨୦୨୬ ଅକ୍ଟୋବର ୩୧ ତାରିଖରେ ସରକାରୀ ଚାକିରିରୁ ଅବସର ଗ୍ରହଣ କରିଥିଲେ।ଅବସରକାଳୀନ ସମାରୋହରେ ତାଙ୍କୁ ଉପଢ଼ୌକନ, ପୁଷ୍ପଗୁଚ୍ଛ ଓ ବିଭିନ୍ନ ଉପହାର ପ୍ରଦାନ କରି ସହକର୍ମୀ ଓ ଉପସ୍ଥିତ ଅତିଥିମାନେ ସମ୍ମାନିତ କରିଥିଲେ। ଏହି ଅବସରରେ ଶିକ୍ଷକ, ଶିକ୍ଷୟିତ୍ରୀ, ଛାତ୍ରଛାତ୍ରୀଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଯୋଗଦେଇ ତାଙ୍କ ଦୀର୍ଘ ଶିକ୍ଷକତା ଜୀବନର ଅଭୁଲା ସ୍ମୃତିଚାରଣ କରିଥିଲେ। ଏଥିସହ ତାଙ୍କର ଆଗାମୀ ଅବସର ଜୀବନ ସୁଖମୟ, ଶାନ୍ତିମୟ ଓ ନିରାମୟ ହେଉ ବୋଲି କାମନା କରିଥିଲେ।ସମାରୋହର ସବୁଠାରୁ ଭାବବିହ୍ୱଳ ମୁହୂର୍ତ୍ତ ଥିଲା ଶ୍ରୀମତୀ ଦେବନାଥଙ୍କ ଅଭିଭାଷଣ। ଦୀର୍ଘ ବର୍ଷର ଶିକ୍ଷକତା ଜୀବନର ସ୍ମୃତି, ବିଦ୍ୟାଳୟ ସହ ଜଡ଼ିତ ଅନୁଭୂତି, ସହକର୍ମୀଙ୍କ ସହଯୋଗ ଏବଂ ଛାତ୍ରଛାତ୍ରୀଙ୍କ ସହ ବିତାଇଥିବା ଅଭୁଲା ମୁହୂର୍ତ୍ତଗୁଡ଼ିକୁ ମନେ ପକାଇ ସେ ଭାବବିହ୍ୱଳ ହୋଇପଡ଼ିଥିଲେ। ତାଙ୍କ ଆଖିରୁ ଝରିପଡ଼ିଥିବା ଲୁହ ସଭାରେ ଉପସ୍ଥିତ ସମସ୍ତଙ୍କୁ ମଧ୍ୟ ଭାବପ୍ରବଣ କରିଦେଇଥିଲା।ଉପସ୍ଥିତ ଅତିଥିମାନେ କହିଥିଲେ ଯେ, ଜଣେ ଆଦର୍ଶ ଶିକ୍ଷୟିତ୍ରୀ ଭାବେ ପ୍ରଭାତୀ ଦେବନାଥଙ୍କ ନିଷ୍ଠା, କର୍ତ୍ତବ୍ୟପରାୟଣତା ଓ ଛାତ୍ରଛାତ୍ରୀଙ୍କ ପ୍ରତି ସ୍ନେହ ଶ୍ରଦ୍ଧା ସର୍ବଦା ସ୍ମରଣୀୟ ହୋଇ ରହିବ।ସରକାରୀ ଚାକିରିରୁ ଅବସର ନେଇଛନ୍ତି ସତ, ମାତ୍ର ତାଙ୍କ ଦ୍ୱାରା ଶିକ୍ଷିତ ଅଗଣିତ ଛାତ୍ରଛାତ୍ରୀଙ୍କ ଜୀବନରେ ଜାଳିଥିବା ଜ୍ଞାନର ଦୀପ ଓ ଛାଡ଼ିଯାଇଥିବା ଅମୂଲ୍ୟ ସ୍ମୃତି କେବେ ଅବସର ନେବ ନାହିଁ। ଏକ ଭାବପୂର୍ଣ୍ଣ ପରିବେଶ ମଧ୍ୟରେ ସମାରୋହର ପରିସମାପ୍ତି ଘଟିଥିଲା।
ନବରଙ୍ଗପୁର ଜିଲ୍ଲାରୁ ରବି ନାରାୟଣ ମହାନ୍ତିଙ୍କ ରିପୋର୍ଟ ମସିହା ନିଉଜ୍
