ମିଳନ

ନଳିନୀ ପ୍ରଭା ମିଶ୍ର

ମିଳନର ସତ୍ତା ଧରି ଭାବ ବତ୍ତା

  ଧରଣୀ ରାଣୀ ଟି ହସେ

ଶାଶ୍ବତ ପ୍ରେମର ଅପୂର୍ବ ରାଗିଣୀ

  ପ୍ରତି ମାନସ ରୁ ଆସେ।

ଭୂମି ଠାରୁ ଭୂମା ପରି ବ୍ୟାପ୍ତ

  ସୀମା ମିଳନର କଥା କହେ

ଦୂର ଦିଗବଳୟରେ ସାଗର ଆକାଶ

  ପ୍ରତି ମାନସ କୁ ମୋହେ।

ମିଳନ ପରଶ ଭରି ଦିବ୍ୟ ରସ

  ପ୍ରଭାତ ରବି କିରଣ

ପତିତ ପଦ୍ମିନୀ ମନ ଆହ୍ଲାଦ ରେ

    ନେତ୍ର କରେ ଉନ୍ମୀଳନ।

ବିରହୀ ବିଚ୍ଛେଦ ପ୍ରେମର ମିଳନ

    ଐକାନ୍ତିକ ଭାବ ଧରି

ମହା ମିଳନର ଅପୁର୍ବ ଉଚ୍ଛ୍ୱାସ

 ହୂଦଯରୁ ଆସେ ଝରି।

ଉଛୁଳା ତଟିନୀ ସାଗର ସଙ୍ଗମ

  ଲକ୍ଷ୍ୟ ପଥେ ତା’ ଧାବ

ମିଳନ ହିଁ ସେତୁ ଦୁଇଟି ମଧ୍ୟରେ

   ବଢାଏ ତାହାର ଭାବ।

ମିଳନର ବିନା ଅଛି କି! ସମ୍ଭବ

  ଏହି ଜଗତର‌ ସ୍ଥିତି।

ବିଚ୍ଛେଦ ମିଳନ ଏକ ପରେ ଅନ୍ୟ

  ଚିରନ୍ତନ ଏହି ରୀତି।

ମୁକୁନ୍ଦ ପୁର, ଆସ୍କା, ଗଞ୍ଜାମ