ତ୍ରିରଙ୍ଗା
ବନ୍ଦେ ମାତର
କବି ସୌରଭ ବୈଜୟନ୍ତୀ ମାଳା ମହାପାତ୍ର
କେଶରୀ ଉପରେ ଧଳା ଯେ ମଝିରେ
ସବୁଜ ରଙ୍ଗଟି ତଳ
ତିନି ରଙ୍ଗ ଧରି ତ୍ରିରଙ୍ଗା ଆମରି
ବଢାଏ ଆମରି ବଳ ….(୦)
କେଶରୀ ରଙ୍ଗରେ କହେ ସେ ଗର୍ବରେ
ସାହସ ବିରତ୍ଵ ଧରି
ମାତୃଭୂମି ପ୍ରେମ ଢାଳିବ ଅସୀମ
ହେ ଭାରତ ନରନାରୀ
ଧଳା ରଙ୍ଗ ରହି ସତ୍ୟ ଶାନ୍ତି ଦେଇ
ଉଡେ ଏହି ଭୂମଣ୍ଡଳ …..(୧)
ସବୁଜଟି ପରା ଭାବ ଭାଇଚାରା
ମନରେ ସଭିଙ୍କ ବୁଣି
ଏକତା ଡୋରରେ ବାନ୍ଧଇ ଆଦରେ
ସଭିଏଁ ଭାଇ ଭଉଣୀ
ତ୍ରିରଙ୍ଗା ଆମର ପତାକା ଗର୍ବର
ମଥା ନତ ତା’ର ତଳ……(୨)
ଅଶୋକ ଚକ୍ରର ମହିମା ଅପାର
ଚବିଶି ଅଖକୁ ଧରି
ପତାକା ମଝିରେ ସୂଚାଏ ସଧିରେ
ପ୍ରଗତିର ହେ ପ୍ରହରୀ
ଧର୍ମ ପଥେ ଚାଲି ଭେଦ ଭାବ ଭୁଲି
ଦେଶକୁ ଦିଅ ସୁଫଳ …..(୩)
ଉଡୁ ଫର ଫର ତ୍ରିରଙ୍ଗା ଆମର
ସଦା ତା’ର ଜୟ ହେଉ
କି ବା ଧନ ମାନ କିବା ସ୍ବାଭିମାନ
ତା’ ପାଇଁ ଜୀବନ ଯାଉ
ସମସ୍ତ ବିଭବ ସମ୍ମାନ ଗୌରବ
ମାତୃଭୂମି ପାଦତଳ….(୩)
ବନ୍ଦେ ମାତର
ବନ୍ଦେ ଉତ୍କଳ ଜନନୀ
ଫୁଲବାଣୀ, କନ୍ଧମାଳ
