ସାଧବ ବୋହୂ
ସରୋଜ କୁମାର ସାହୁ
ଧରଣୀ ମାଟିର କୋମଳତା ପରେ
ଯେବେଯେବେ ମାଟି ବାସେ
ଉଭା ହୋଇଥାଏ କୋମଳ ତନୁଟି
ଏଇ ଆମ ଚର୍ତୁପାଶେ।
ଦେହଟି ତାହାର ଭାରି ମନୋହର
ସଭିଁଙ୍କ ମନକୁ ମୋହେ
ଚିକ୍କଣ ଦେହକୁ ନାଲି ରଙ୍ଗ ସତେ9
ବୋଳି ଦେଇଆସେ ବହେ।
କୁନିକୁନି ପାଦ ଦିଏ ତା ଆନନ୍ଦ
ଲାଜରେ ଭରା ତା ମୁହଁ
ପାଇଲେ ପରଶ ଝାଉଁଳି ପଡଇ
ହାତେ ଧରି ଅବା ଛୁଇଁ ।
ଢଳଢଳ ହୁଏ ଓଠେ ତାର ହସ
ନୂଆ ବୋହୂଟିଏ ପରି
ଘାସ ଗାଲିଚାର କଅଁଳ ଖରାରେ
ଚାଲେ ଯେବେ ଥିରିଥିରି।
କୁନିକୁନି ପିଲା ଖେଳନ୍ତି ସାଥିରେ
କୁନି ପାପୁଲିରେ ତୋଳି
କେତେ ଆନନ୍ଦ ପାଆନ୍ତି ଛୁଆଁରେ
ପାରିବେନି କେହି କଳି।
ମାଟିର ଦେହରେ ଖେଳିବୁଲି କରି
ମାଟିରେ ତୋଳେ ଘର
ପାଛୋଟି ଆଣଇ ବରଷକେ ଥରେ
ପ୍ରିୟ ସାଥି ସହୋଦର।
ସରୋଜ କୁମାର ସାହୁ
ଆଠଗଡ଼ .କଟକ
