ବର୍ଷା
ଆଦରମଣି ପ୍ରଧାନ
ବରଷା ଗୋ ,ମୋର ଧୂଷର ବନରେ
ଅସରା କାତର ଲୁହ
ଝରୁଛି ଅଧିରେ ମରମ ବୀଣାରେ
ବେଦନା ଉଛୁଳା କୋହ,,,
ବିରହ ମରୁର ନିଦାଘ ଜୁଇରେ
ଶାଖା ମୋ ଯାଇଛି ଜଳି,
ନୀଳ ଗୋଧୂଳିର ଅନ୍ଧାର ମାଖି
ବହୁ ଦୂରେ ରହିଗଲି,,,
ଝରା ପତରରେ ପ୍ରୀତିର ତୁଳୀରେ
ଅଙ୍କିଅଛି ତୁମ ମୁହଁ,,
ବରଷା ଗୋ ମୋର ଧୂଷର ମନରେ
ଅସରା କାତର ଲୁହ,,,
ମୌସୁମୀ ଆଜି ପାରେ ନାହିଁ ଛୁଇଁ
ବୟସର ସୀମାରେଖା,,
କ୍ଲାନ୍ତ ଆଖି ମୋ ଖୋଜୁଛି ନିରବେ
ସ୍ମୃତିର ସବୁଜ ଲେଖା,,,
କେଉଁ ଶ୍ରାବଣୀର ଆକାଶରେ ତୁମେ
ହଜିଗଲ ଥରେ କୁହ,,,
ବରଷାଗୋ ମୋର ଧୂଷର ମନରେ
ଅସରା କାତର ଲୁହ,,,
ଚାନ୍ଦବାଲି , ଭଦ୍ରକ