ବିଘ୍ନ ବିନାଶକ 

ବାଲାଜି ସେଠୀ

ବିପଦ ଭଞ୍ଜନ ପ୍ରଭୁ ହେ

            ବିଦ୍ୟାର ଅଧୀଶ୍ଵର

କରପତ୍ର ଯୋଡି ଭକତି

          ଭରେ କରେ ଜୁହାର ।

ଅଙ୍ଗ ମଳୁଖରୁ ଗିରିଜା

            କଲେ ତୁମ୍ଭଙ୍କୁ ଜାତ

ପରାଣ ସଞ୍ଚିଲେ ଶ୍ରୀହରି

              ବିଶ୍ୱ ବ୍ରହ୍ମାଣ୍ଡ ତାତ ।

ବିଘ୍ନ ବିନାଶକ ଗଣେଶ

               ଶିବଙ୍କ ଅତି ପ୍ରିୟ

ବରାଭୟ ଦେଇ ଆମ୍ଭଙ୍କୁ

               ପ୍ରଭୁ ହୁଅ ସଦୟ ।

ଗିରିଜା ନନ୍ଦନ ପ୍ରଭୁ ହେ

            ତୁମ୍ଭେ ଶୁଭ ଦାୟକ

ଅଗ୍ର ପୂଜ୍ୟ ଭାବେ ପୂଜିତ

           ତୁମ୍ଭେ ହେ ବିନାୟକ ।

ସର୍ବ ଦେବଗଣେ ସାର ହେ

                ପ୍ରଭୁ ଗଣାଧିପତି

ସକଳ ଦେବତା ସ୍ମରନ୍ତି

           ପ୍ରାତଃ କାଳରେ ନିତି ।

ଦିଅ ବିଦ୍ୟା ବୁଦ୍ଧି ଆମ୍ଭଙ୍କୁ

             ଆମ୍ଭେ ମୁଢ଼ ଅଜ୍ଞାନ

ଜୀବନ ହୋଇବ ସାର୍ଥକ

           ପାଇଲେ ଦିବ୍ୟ ଜ୍ଞାନ ।

ଶୁଣ ଗଜାନନ ଗୁହାରି

              ଆମ୍ଭେ ଅଧମ ଜନ

ସର୍ବ କାର୍ଯ୍ୟେ ସିଦ୍ଧି ହୁଅନ୍ତୁ

            ପାଦେ କରୁ ଜଣାଣ ।

ଚିତ୍ରକୋଣ୍ଡା, ମାଲକାନଗିରି