ରାଇଘର ୭/୧୦- ନବରଙ୍ଗପୁର ଜିଲ୍ଲା ରାଇଘର ବ୍ଲକ ଛତିଶଗଡ ସୀମାନ୍ତ ଦୁର୍ଗମ ଟିମନପୁର ପଂଚାୟତ ଠାରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି l ସ୍ଵାମୀର ମୃତ୍ୟୁର ଅଳ୍ପ ସମୟ ମଧ୍ୟରେ ସ୍ତ୍ରୀର ମୃତ୍ୟୁ ଘଟିଥିବା ବେଳେ ଉକ୍ତ ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି l ରାଇଘର ଥାନା ଅନ୍ତର୍ଗତ ଟିମନପୁର ପଂଚାୟତର ଜୁନାନୀ ଗ୍ରାମର ବାଲ୍ ଚନ୍ଦ୍ର ଲହରାଙ୍କ କିଛି ଦିନ ହେବ ଅସୁସ୍ଥ ରହିଥିବା ବେଳେ ଗତକାଲି ଘରେ ମୃତ୍ୟୁ ଘଟିଥିଲା l ପରିବାରବର୍ଗ ପକ୍ଷରୁ ଗାଁ ମଶାଣି ନେବା ନିମନ୍ତେ ସମସ୍ତ ପ୍ରକାର ପ୍ରସ୍ତୁତି ଆରମ୍ଭ ହୋଇଥିବା ବେଳେ ବାଲ୍ ଚନ୍ଦ୍ର ଲହରାଙ୍କ ସ୍ତ୍ରୀ ସୁପତି ଲହରା ଘର ଭିତରୁ ବାହାରିବା ସମୟରେ ବିଦ୍ୟୁତ୍ ଆଘାତରେ ସମ୍ମୁଖିନ ହୋଇଥିଲେ l ଏହି ଖବର ଗ୍ରାମରେ ପ୍ରଚାରିତ ପରେ ସମସ୍ତେ ଘଟଣା ସ୍ଥଳରେ ପହଞ୍ଚି ଦେଖିବା ବେଳକୁ ସୁପତିଙ୍କ ମୃତ୍ୟୁ ଘଟି ସାରି ଥିଲା l ଏ ସଂପର୍କରେ ରାଇଘର ଥାନା ରେ ଖବର ଦେବା ପରେ ଏଏସଆଇ ରବିନ୍ଦ୍ର ନାଥ ପ୍ରଧାନ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ କେଶ୍ ନମ୍ବର୍ ୭୩/୨୨ ରେ ଏକ ଅପ ମୃତ୍ୟୁ ମାମଲା ରୁଜୁ କରି ଶବ ଜବତ କରି ବ୍ୟବଚ୍ଛେଦ କରି ପରିବାରବର୍ଗ କୁ ହସ୍ତାନ୍ତର କରାଯାଇ ତଦନ୍ତ ଜାରୀ ରହିଛି l ତେବେ ସ୍ଵାମୀ ସ୍ତ୍ରୀ ର ଏଭଳି ମୃତ୍ୟୁ ପରେ ଗୋଟିଏ ଜୁଇରେ ଦୁହିଙ୍କ ଶବ ଗାଁ ମଶାଣିରେ ଜଳି ଥିଲା l ବାଲ୍ ଚନ୍ଦ୍ର ଲହରାଙ୍କ ତିନି ପୁଅ ତିନି ଝିଅ ରହିଥିବା ବେଳେ ବାପା ମା କୁ ହରାଇ ସମ୍ପୁର୍ଣ ଭାଙ୍ଗି ପଡିଛନ୍ତି l ଏଭଳି ଘଟଣାକୁ ନେଇ ଗ୍ରାମରେ ମଧ୍ୟ ଶୋକାକୁଳ ପରିବେଶ ସୃଷ୍ଟି ହୋଇଛି l
ରାଇଘର ରୁ କିରଣ କୁମାର ପଟ୍ଟନାୟକ ଙ୍କ ରିପୋର୍ଟ
