ଜହ୍ନରାତି
ସୂର୍ଯ୍ୟ ଚାରିପଟେ ପୃଥିବୀ ଘୁରଇ
ପୃଥିବୀକୁ ଘୁରେ ଜହ୍ନ
ଶୁକ୍ଳ କୃଷ୍ଣ ପକ୍ଷ ଦୁଇଟି ମଧ୍ୟରୁ
ଶୁକ୍ଳ ପକ୍ଷ କିଣେ ମନ ॥
ବାର ମାସେ ବାର ପୂର୍ଣ୍ଣିମା ପଡ଼ଇ
ଗୋଲାକାର ଜହ୍ନ ଦିଶେ
ଚନ୍ଦ୍ରକଳା ହ୍ରାସ ବୃଦ୍ଧିର ଖେଳରେ
ବୟସ ତା ସରି ଆସେ ॥
ଜହ୍ନ ରାଇଜର ଗହନ କଥାକୁ
କେତେ ରୂପେ ଭାଷେ କିଏ
ଜହ୍ନ ପରି ହୃଦ ଶୀତଳ କରିଲେ
ସଂସାର ସୁନ୍ଦର ହୁଏ ॥
ଶାନ୍ତ ସରଳତା କାନ୍ତ କମନୀୟ
ତା ପରି ହେଲେ ସଭିଏଁ
ସମାଜରେ ଆଉ ଅନର୍ଥ ନ ଘଟି
ମୈତ୍ରୀ ପ୍ରୀତି ବଣ୍ଟା ହୁଏ ॥
ଜହ୍ନରାତି ଦିଏ ଅନେକ ସପନ
ପ୍ରେମ ବନ୍ଧନର ଗାଥା
ଜହ୍ନ ପାଇଁ କଇଁ ହସି ହସି ଫୁଟେ
ସମ୍ପର୍କ ନିବିଡ଼ ଯଥା ॥
ନରମ ହୋଇଲେ ଚନ୍ଦ୍ରାଲୋକ ପରି
ଜୀବନ ଶୃଙ୍ଖଳ ହୁଏ
ଜହ୍ନ ମାମୁଁ ସାଥେ ପବିତ୍ର ବନ୍ଧନେ
ମନରେ ଶାନ୍ତି ଯୋଗାଏ ॥
ଜହ୍ନରାତି ଆଣେ କାହା ପାଇଁ ଖୁସି
କାହା ପାଇଁ ଆଣେ ଭିତି
ଶାନ୍ତ ସ୍ଵଚ୍ଛ ମନ ସରଳ ସ୍ଵଭାବ
ଜୀବନେ ଆଣଇ ଶାନ୍ତି ॥
ରତିନାରାୟଣ ରାଉତ
ହରିଚନ୍ଦନପୁର , କେନ୍ଦୁଝର,ଓଡିଶା
