ସଂଘର୍ଷ
ଉପେନ୍ଦ୍ର କୁମାର ବସ୍ତିଆ
ପେଟ ଫୁଲା ନଈ ବଙ୍କେଇ ଚାଲଇ
କର୍ମରେ ବିରାମ ନାହିଁ
ନଈର ଜଳକୁ ପାଇବା ପାଇଁ କି
ସମୁଦ୍ର ରହିଛି ଚାହିଁ ।।
ନୀଳ ସମୁଦ୍ରର ହୃଦୟ ନିର୍ମଳ
ଛାତିକୁ ଦେଇଛି ପାରି
ଆଗପଛ ହୋଇ ଯିଏ ବା ଆସୁଛି
ନେଇଛି ନିଜର କରି ।।
ଅମଡ଼ା ବାଟଟି ନିଜେ ସିନା ବଙ୍କା
ଅନ୍ୟଟି ରାସ୍ତା ଦେଖାଏ
ସମୟ ସହିତ ବାଟ ଚାଲୁଥିଲେ
ବାଟୋଇ ଘରକୁ ଯାଏ ।।
ଅଙ୍କାବଙ୍କା ପଥ ଜୀବନେ ଆସଇ
ଚାଲିଲେ ପାର କରିବା
ସୁଖଦୁଃଖ ସଦା କର୍ମରେ ମିଳଇ
ସଂଘର୍ଷ କଲେ ପାଇବା ।।
ଦୃଢ଼ ସଂକଳ୍ପରେ ବାଟ ଚାଲୁଥିଲେ
ଆନନ୍ଦେ ଜୀବନ କଟେ
ନିଜ ହସ ଖୁସି ଅଙ୍ଗେ ଲିଭାଇବା
ଜୀବନ ସଂଘର୍ଷ ଅଟେ ।।
ଥିରିଥିରି କେବେ ମଳୟ ଏଇଠି
କେବେ ଝାଞ୍ଜି କେବେ ଖରା
ଶୀତ ବରଷାକୁ ସହିବାକୁ ହେବ
ଏଇତ ଜୀବନ ପରା ।।
ରାଉରକେଲା
