ଡାବୁଗାଁ,୨୩/୬ (ମ.ନି.ସ.)- ଏମଜିଏନଆରଇଜିଏସ ଯୋଜନାରେ କେଉଁଠି ମେସିନ କାମ କରୁଛି ତ ଆଉ କେଉଁଠି ଗୋଟିଏ ସ୍ଥାନ ପରିବର୍ତ୍ତେ ଅନ୍ୟ ଏକ ସ୍ଥାନରେ ପ୍ରକଳ୍ପ ଗୁଡିକ କାମ କରି ସାରି ଦେଉଛନ୍ତି । ଫଲ୍ମ ବିଲ ହେଉଥିବା ମଧ୍ୟ ଗୁରୁତର ଅଭିଯୋଗ ହୋଇ ଆସୁଛି । ଅଧିକାରୀ, ବୈଷୟିକ କର୍ମଚାରୀ ଓ ଠିକାଦାର ମଧ୍ୟରେ ଭିତିରିଆ ସମ୍ପର୍କରେ ବିଲ ହୋଇ ଯାଉଛି । ଅଭିଯୋଗ କଲେ କାହାକୁ ଧମକ ମିଳେତ ଆଉ କାହାକୁ କିଛି ଉପାୟ କରି କଲମ ମୁନକୁ ଚାପି ଦେବାକୁ ଉଦ୍ୟମ କରାଯାଉଛି । ସରକାରଙ୍କ ମୂଳ ଉଦ୍ଦେଶ୍ୟ ମଉଳି ଯାଉଛି । ପ୍ରକୃତରେ ଶ୍ରମିକ କମଧନ୍ଦା ନପାଇ ବେରୋଜଗାର ହୋଇ ଦାଦନ ଖଟିବାକୁ ଚାଲି ଯାଉଛନ୍ତି । ନବରଙ୍ଗପୁର ଜିଲା ଡାବୁଗାଁ ବ୍ଲକ ଅଧୀନ ଅଞ୍ଚଳା ପଞ୍ଚାୟତ ଭଣ୍ଡିମାଳ ଗାଁରେ ଜାନୀ ସାହିଠାରେ ଷ୍ଟ୍ରେଞ୍ଚ ନିର୍ମାଣ ପ୍ରକଳ୍ପ କୋର୍ଡ ନମ୍ବର ୧୦୫୫୮୯୯୪ରେ ହୋଥିବା ସୂଚନା ଫଳକରେ ରହିଛି । ତେବେ ପ୍ରକଳ୍ପର ଫଳକ ଗୋଟିଏ ସ୍ଥାନରେ ଓ କାର୍ଯ୍ୟହୋଇଛି ଭଣ୍ଡିମାଳ ଛକରୁ ହଳଦି ଗାଁକୁ ଯିବା ରାସ୍ତା କଡରେ ଷ୍ଟ୍ରେଞ୍ଚ ନିର୍ମାଣ କାର୍ଯ୍ୟ ହୋଇଛି । ଏଥିରେ କାର୍ଯ୍ୟ ଓ କାର୍ଯ୍ୟଦେଶ ନେଇ ଚଞ୍ଚକତା କରାଯାଇଛି । ଅନ୍ୟପକ୍ଷେ ରହିଥିବା ଫଳକରେ କାର୍ଯ୍ୟାରମ୍ଭ ଓ ଶେଷ ତାରିଖ ନାହିଁ । ଅଣ କୂଶଳି ଶ୍ରମିକଙ୍କ ଅଂଶ ଓ ଶ୍ରମ ଦିବସ ମଧ୍ୟ ଉଲ୍ଲେଖ ହାଇନାହିଁ । ୨୦୨୨-୨୩ ବର୍ଷରେ ଏହି କାମ ଅଟକଳ ମୂଲ୍ୟ ୮ ଲକ୍ଷ ଟଙ୍କା ଉଲ୍ଲେଖ ରହିଛି । ଏନେଇ ବିଡିଓ ଶରତ ମାଝୀଙ୍କୁ ପଚାରିବାରୁ କଣ ହୋଇଛି ମୁଁ ଜାଣି ନାହିଁ ଅଲଗା କାମରେ ରହିଛି ଗଲେ ମୁଁ ଦେଖିବି ବୋଲି କହିଥିଲେ ।
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
