୮୬ ବର୍ଷୀୟା ବୃଦ୍ଧା ମାଆଙ୍କୁ ମାଡମାରି ଘରୁ ତଡିଲା ପୁଅ
ବାଲେଶ୍ଵର,୧୩/୯/୨୩- ଶେଷ ସମୟରେ ସାହାଭରଷା ହେବା ପାଇଁ ବାପାମାଆ ପୁଅକୁ ଭରଷା କରିଥାନ୍ତି କିନ୍ତୁ ପୁଅ ପାଲଟିଛି ଅମଣିଷ, ମାଡମାରି ଘରୁ ତଡିଦେଲା ମାଆକୁ । ଝିଅ ଘରେ ନେଇଛି ଆଶ୍ରୟ । ଏପରି ଏକ ଘଟଣା ଘଟିଛି ଭଦ୍ରକ ଜିଲ୍ଲାରେ, ଆଶ୍ରୟ ନେଇଛି ବାଲେଶ୍ଵର ଜିଲ୍ଲାରେ । ଖବର ସଂଗ୍ରହରୁ ଜଣାଯାଇଛି ଭଦ୍ରକ ଜିଲ୍ଲା ଭଦ୍ରକ ବ୍ଲକ କଲେଇ ପଞ୍ଚାୟତର କଣ୍ଟାପଡା ଗ୍ରାମର ଶାନ୍ତି ଦାସ ଯାହାଙ୍କର ବୟସ ପ୍ରାୟ ୮୬ ବର୍ଷ । ତାଙ୍କର ୨ ଜଣ ପୁଅ, ବଡ଼ପୁଅ ଅମୁଲ୍ୟ ଦାସ ଏବଂ ସାନପୁଅ ତୋଫାନ ଦାସ । ସାମାନ୍ୟ କେଇଟା ଭତ୍ତା ଟଙ୍କା ସାନପୁଅ ତୋଫାନକୁ କରିଛି ପାଗଳ । ବାରମ୍ବାର ପିଟୁଛି ଜନ୍ମକଲା ମାଆକୁ । ଆହୁରି ମଧ୍ୟ ସମସ୍ତ ଟଙ୍କା ନଦେଲେ ଜୀବନରୁ ମାରିଦେବାର ଧମକ ଦେଉଛି ସାନପୁଅ ତୋଫାନ । ନାତି ନରେନ୍ଦ୍ର ଓରଫ ବାପୁନ ଦାସ ଏବଂ ନାତୁଣୀ ବୋହୂ ମିଟ ଦାସ ଶାନ୍ତି ଦାସଙ୍କୁ ମାଡଗାଳି ଦେବାରେ କରନ୍ତି ନାହିଁ ହେଳା । ମାଡ ଓ କୁଭାଷା ପୂର୍ଣ୍ଣ ଗାଳି ସହ୍ଯକରି ନପାରି ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେଇଛି ଶାନ୍ତି । ହେଲେ ଜୀବନ ପ୍ରତି ଲୋଭ ଥିବାରୁ ଶେଷରେ ଜୀବନ ବଞ୍ଚେଇବା ପାଇଁ ବାଲେଶ୍ଵର ଜିଲ୍ଲା ସିମୁଳିଆ ବ୍ଲକ, ଅଡା ପଞ୍ଚାୟତର ଝିଅ ଘର ଛତ୍ରପୁର ଗ୍ରାମକୁ ଆସୁଥିଲେ । କିନ୍ତୁ ଦୁଃଖ ଓ ଭୋକରେ ଭାଙ୍ଗି ପଡିଥିବା ଶାନ୍ତି ଠିକ୍ ଭାବେ ଚାଲିପାରୁ ନଥିବାରୁ କଳାଶୁଣି ନିକଟରେ ରାସ୍ତା କଡ଼ରେ ପଡିଯାଇଥିଲେ । ଖବର ଖେଳିଯିବା ପରେ ତାଙ୍କର ଜ୍ବାଇଁ ଜଗବନ୍ଧୁ ଦାସଙ୍କ ପରିବାର ପହଞ୍ଚି ଶାନ୍ତି ଦାସକୁ ଉଦ୍ଧାର କରି ଗତ ତା ୦୫/୯/୨୩ ରିଖ ଠାରୁ ନିଜ ଘରେ ଦେଇଛନ୍ତି ଆଶ୍ରୟ । ଘରକୁ ଫେରିବାର ନାଁ ଧରୁ ନାହାନ୍ତି ଶାନ୍ତି ଏଣେ ଜ୍ବାଇଁ ଜଗବନ୍ଧୁଙ୍କ ପାଇଁ ବଢିଛି ଚିନ୍ତା । ଏପରି ସ୍ଥଳେ ଆହୁରି ଭାଙ୍ଗି ପଡିବା ସହିତ ପୁଅ ଜନ୍ମକୁ ଶତ ଧିକ୍କାର କରିଛନ୍ତି ଶାନ୍ତି । ଖବରପାଇ ଗଣମାଧ୍ୟମ ପ୍ରତିନିଧି ଶାନ୍ତି ଦାସଙ୍କ ନିକଟରେ ପହଞ୍ଚି ପଚାରି ବୁଝିବା ପରେ ବଡ଼ପୁଅ ଅମୂଲ୍ୟ ଓ ନାତି ନରେନ୍ଦ୍ର ଓରଫ ବାପୁନ ଦାସଙ୍କୁ ଯୋଗାଯୋଗ କରିଥିଲେ ହେଲେ ମାଆ ପ୍ରତି ସ୍ନେହ ଶ୍ରଦ୍ଧା ନଥିବା ଜଣାପଡିଥିଲା । ୩ ନମ୍ବର ୱାର୍ଡ ମେମ୍ବରଙ୍କୁ ଯୋଗାଯୋଗ କରା ଯାଇଥିଲେ ମଧ୍ୟ ସମ୍ଭବ ହୋଇପାରି ନଥିଲା । ଏବିଷୟରେ ଶାନ୍ତି ଦାସ ଥାନାର ଦ୍ବାରସ୍ଥ ହୋଇ ନାହାନ୍ତି କିନ୍ତୁ ସରପଞ୍ଚଙ୍କୁ ଭେଟିବାରୁ ସରପଞ୍ଚ କହିଲେ ଭୋଟ, ଆଧାର, ଭତ୍ତା ବହି ଓ ମୋବାଇଲ ଇତ୍ୟାଦି ଯାହା ଛଡାଇ ନେଲେ ନେଉ ପଛେ ତୁମେ ଭତ୍ତା ବାରିଦିନ ପଞ୍ଚାୟତକୁ ଆସି ଟିପ ଦେବ ମୁଁ ତୁମକୁ ଭତ୍ତା ଦେବି । ସାମାନ୍ୟ ଭତ୍ତା ଟଙ୍କା ପାଇଁ ୮୬ ବର୍ଷୀୟ ବୃଦ୍ଧା ମାଆଙ୍କୁ ମାଡମାରି ଘରୁ ତଡିବା ସମାଜ ପାଇଁ କେତେ ଠିକ୍ ଓ କେତେ ଭୁଲ୍ ଜନସାଧାରଣରେ ଆଲୋଚନା ହେବାରେ ଲାଗିଛି ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
