ମଧୁପୁର-ରାମଚନ୍ଦ୍ରପୁର-ଗୋପାଳପୁରରେ ପୁଲିସ ପକ୍ଷରୁ ଫ୍ଲାଗମାର୍ଚ୍ଚ ଅନୁଷ୍ଠିତ
ଲାଞ୍ଜିଗଡ,୨୮/୦୪(ମନିସ)-ନିର୍ବାଚନକୁ ଶାନ୍ତି ଶୃଙ୍ଖଳାର ସହିତ ସମାପନ କରିବାକୁ ପୁଲିସ ପକ୍ଷରୁ ବିଭିନ୍ନ ସ୍ଥାନରେ ଫ୍ଲାଗ ମାର୍ଚ୍ଚ କରାଯାଇ ଜନ ସାଧାରଣଙ୍କୁ ସଚେତନ କରାଯାଉଛି। ଏହାକୁ ଦୃଷ୍ଟିରେ ରଖି ନର୍ଲା ପୁଲିସ ପକ୍ଷରୁ ଆଜି ଲାଞ୍ଜିଗଡ ବ୍ଲକ ଗୋବର୍ଧନପୁର ପଂଚାୟତ ମଧୁପୁର, ରାମଚନ୍ଦ୍ରପୁର ଓ ଗୋପାଳପୁରଠାରେ ଫ୍ଲାଗ ମାର୍ଚ୍ଚ 
କରାଯାଇଛି। ନର୍ଲା ଥାନାଧିକାରୀ ମମତା ପାଣିଗ୍ରାହୀଙ୍କ ନେତୃତ୍ୱରେ ଏସଆଇ କୃତ୍ତିବାସ ପୂଜାରୀ, ବିଳାସିନୀ ଭୋଇ, ଏଏସଆଇ ଅବନୀ ଖୁରା, ମୀନକେତନ ଶବରଙ୍କ ସମେତ ନର୍ଲା ପୁଲିସ ଓ ସିକେରକୁପାସ୍ଥିତ ସିଆରପିଏଫ ୬୪ ବାଟାଲିୟନର ଏକ ପ୍ଲାଟୁନ ଯବାନ ସାମିଲ ହୋଇଥିଲେ। ଫ୍ଲାଗ ମାର୍ଚ୍ଚ ସହିତ ଆଗାମୀ ନିର୍ବାଚନରେ ଶାନ୍ତି ଶୃଙ୍ଖଳା ରକ୍ଷା କରିବା ଓ ନିର୍ବାଚନକୁ ଅବାଧ ଓ ନିରପେକ୍ଷ କରିବାକୁ ବାର୍ତ୍ତା ଦେବାକୁ ପୁଲିସ ପକ୍ଷରୁ ଏହି ମହତ ପ୍ରଚେଷ୍ଟା କରାଯାଇଥିବା ସୂଚନା ମିଳିଛି। ଏପରିକି ପୁଲିସ ଓ ସିଆରପିଏଫର ମିଳିତ ଫ୍ଲାଗ ମାର୍ଚ୍ଚକୁ ନେଇ ସାଧାରଣରେ ବେଶ ଉତ୍ସାହ ଦେଖିବାକୁ ମିଳିଥିଲା।
ଲାଞ୍ଜିଗଡ ପ୍ରତିନିଧି ସୁଶୀଲ କୁମାର ବାଗଙ୍କ ରିପୋର୍ଟ
