ବେଲଝରୀ ଗ୍ରାମରେ ବଡ ଆଡମ୍ବରରେ ରଜ ପର୍ବ ପାଳିତ
ନବରଙ୍ଗପୁର:(ତା ୧୪/୦୬)-ନବରଙ୍ଗପୁର ଜିଲ୍ଲା ସାରା ରଜ ପର୍ବ ପାଳନ କରୁଥିବା ବେଳେ ଝରୀଗାଁ ବ୍ଲକ ପାଲିଆ ପଂଚାୟତର ବେଲଝରୀ ଗ୍ରାମରେ ରଜପର୍ବ ଚଳିତ ବର୍ଷ ଧୁମଧାମରେ ପାଳିତ ହୋଇଥିବା ଦେଖିବାକୁ ମିଳିଛି |ଚଳିତ ବର୍ଷ ଗ୍ରାମର ପୂଜାରୀ, ଚଲାନ ଓ ସମସ୍ତ ଗ୍ରାମବାସୀ ପୂର୍ଣ୍ଣ ସହଯୋଗ କରିଥିବାରୁ ରଜପର୍ବଟି ବେଶ ହର୍ଷ ଉଲ୍ଲାସର 
ସହ ପାଳିତ ହୋଇଥିବା ଦେଖିବାକୁ ମିଳିଛି |ଗ୍ରାମର କୁଆରୀ ଝିଅମାନେ ପ୍ରଥମେ ଗ୍ରାମର ପୂଜାରୀ, ଚଲାନ ଓ ଗ୍ରାମର ବରିଷ୍ଠ ବ୍ୟକ୍ତି ମାନଙ୍କୁ ନିମନ୍ତ୍ରଣ କରି ରଜଦୋଳି ପଡିଆକୁ ପାଛୋଟି ନେଇଥିଲେ ଓ ପରେ ଗ୍ରାମର ସମସ୍ତ ଦେଵୀଙ୍କ ପୀଠରେ ପହଂଚି ପୂଜାର୍ଚ୍ଚନା କରିବା ପରେ ରଜଦୋଳି ବନ୍ଧା ଯାଇଥିବା ପଡିଆରେ ପହଂଚି ବସୁମତୀ ମାଙ୍କ ପୂଜାର୍ଚ୍ଚନା କରି ଦୋଳିଖେଳ ଆରମ୍ଭ କରିଥିଲେ |ରଜପର୍ବ ସମସ୍ତ ପର୍ବ ମଧ୍ୟରେ ରାଜା ଓ ଏହା ଏକ କୃଷି ଭିତ୍ତିକ ପର୍ବ |ଏହି ପର୍ବ ପାଳନ କରିବାର ପୂର୍ବ ଦିନରୁ ହିଁ ଚଷାଭାଇ ନିଜ ଚାଷକାର୍ଯ୍ୟରୁ ନିବୃତ ରହି ୪ଦିନ ଯାଏ ପୂର୍ଣ୍ଣ ବିଶ୍ରାମ ନିଏ |ଠିକ ସେହିପରି ଗ୍ରାମର କୁଆରୀ ଝିଅ ଓ ସଧବା ବୋହୁମାନେ ପହିଲି ରଜ ର ପୂର୍ବ ଦିନରେ(ରଜ ସଜବାଜ )ହିଁ ସମସ୍ତ ପ୍ରସ୍ତୁତି ଶେଷ କରିଥାନ୍ତି |ପହିଲି ରଜ ଦିନ ସମସ୍ତେ ନୁଆଁ ବସ୍ତ୍ର ପରିଧାନ କରି ପାଦରେ ଅଳତା ଲଗେଇ ହୋଇ ନିଜକୁ ସୁନ୍ଦର ଭାବେ ସୁସଜ୍ଜିତ କରି ରଜଦୋଳି ପଡିଆରେ ଯାଇ ଦୋଳି ଖେଳରେ ମସଗୁଲ ହୋଇଯାଆନ୍ତି |ଉକ୍ତ ଦିନ ଗ୍ରାମରେ ଏକ ପ୍ରକାର ଉତ୍ସାହର ବାତାବରଣ ଦେଖିବାକୁ ମିଳିଥାଏ |ଝରୀଗାଁ ବ୍ଲକ ଏକ ଆଦିବାସୀ ଅଧ୍ୟୁଷିତ ଅଞ୍ଚଳ ହୋଇଥିବା ସତ୍ତ୍ୱେ ଏଠାକାର ଆଦିବାସୀମାନେ ଏହି ରଜ ଉତ୍ସବ କୁ ବେଶ ଧୁମଧାମରେ ପାଳନ କରୁଥିବା ଦେଖିବାକୁ ମିଳିଛି |
ମସିହା ନିୟୂଜ ସର୍ଭିସ୍
