ନାଡୁଙ୍କ ପରିବାରକୁ ଆବାସ ଘର ମିଳିବ କେବେ ?
ନବରଙ୍ଗପୁର: (ତା ୦୨/୦୮)(ରବି ନାରାୟଣ ମହାନ୍ତି)-କେନ୍ଦ୍ର ସରକାରଙ୍କ ଦ୍ୱାରା ପ୍ରଣିତ ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନାରେ କୋଟି କୋଟି ଲୋକ ଉପକୃତ ହେଉଥିବା ବେଳେ ପ୍ରକୃତ ହିତାଧିକାରୀ କିନ୍ତୁ ଏହି ଯୋଜନାରୁ ବାଦ ପଡିଯାଉଛନ୍ତି |ଯୋଉଁଥିପାଇଁ କି କେନ୍ଦ୍ର ସରକାରଙ୍କ ଏହି ଯୋଜନା ଅନେକ ସ୍ଥାନରେ ଫେଲ ମାରିଥିବା ସାଧାରଣରେ ଆଲୋଚନା ହେଉଛି |ପ୍ରକୃତ ହିତାଧିକାରୀ ଯଥା ଗରିବ, ଖଟିଖିଆ, ଦିନ ମଜୁରୀଆ ଭଳି ଅତି ଗରିବ ପରିବାର ଆଜି ଵି ଝାଟିମାଟି କୁଡ଼ିଆ, ଭଙ୍ଗା ଦଦରା ଘର ଓ ପଲିଥିନ ତଳେ ନିଜ ପରିବାର ସହ ବସବାସ କରୁଥିବା ଦୃଷ୍ଟି ଗୋଚର ହେଉଛି |ନବରଙ୍ଗପୁର ଜିଲ୍ଲା ଉମରକୋଟ ବ୍ଲକରେ ଏହି ଯୋଜନାଟା ସମ୍ପୂର୍ଣ୍ଣ ଫେଲ ମାରିଥିବା ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଥିବା କର୍ଣ୍ଣଗୋଚର ହେଉଛି |ଉମରକୋଟ ବ୍ଲକ ମୁଣ୍ଡିଗୁଡା ଗ୍ରାମ ପଂଚାୟତ ଅଧୀନରେ ଥିବା ଫୁକାଗୁଡା ଗ୍ରାମର ନାଡୁ ହରିଜନ (୫୦)ଆଜି ଵି ନିଜ ପରିବାର ସହିତ ମାତ୍ର ଦୁଇ ବଖରା ବିଶିଷ୍ଟ ଏକ ମାଟି କୁଡ଼ିଆରେ ଦିନ କାଟୁଥିବା ଦୃଷ୍ଟି ଗୋଚର ହୋଇଛି |ମାଟି କାନ୍ଥରେ କିଛି ଆଜବେଷ୍ଟ ପକେଇ ଘରଟି ନିର୍ମାଣ କରିଛନ୍ତି |ଘରର ଆର୍ଥିକ ସ୍ଥିତି ଏତେ ଖରାପ ଯେ ଯେତେ ଚେଷ୍ଟା କଲେ ମଧ୍ୟ ଘର ଟିଏ ତୋଳି ପାରୁନାହାନ୍ତି |ପରିବାରରେ ନାଡୁଙ୍କୁ ମିଶାଇ ୬ସଦସ୍ୟ |ପୁଅବୋହୁ ଓ ୩ଜଣ ନାତି ନାତୁଣୀ |ପୁଅ ଘର ଚଳେଇବା ପାଇଁ ବର୍ଷର ବାରମାସ ଦାଦନ ଯାଉଥିବା ବେଳେ ବୋହୁ ଘରେ ରହି ପିଲାଛୁଆଙ୍କ ଦେଖାରେଖା କରୁଛି ତ ନାଡୁ ଗାଁରେ ରହି କୁଲିଭୁତି କରିବା ସହ ପରିବାର କୁ ଜଗିରହୁଛି |ଚାଷବାସ କରିବା ପାଇଁ ମାତ୍ର ଗୋଟିଏ ଏକରରୁ ଵି କମ ଜମି ରହିଥିବା ବେଳେ କୁଲିମଜୁରୀ କରିବା ହିଁ ସେମାନଙ୍କ ପେଟପାଟଣା ର ଏକମାତ୍ର ଭରଷା ପାଲଟିଛି |ପଂଚାୟତରୁ ମାତ୍ର ୩୫କେଜି ପିଡ଼ିଏସ ଚାଉଳ ମିଳୁଥିବା ନାଡୁ କହିଛନ୍ତି |ଏପରି ସ୍ଥଳେ ଭଲ ଘରଟିଏ ତିଆରି କରିବା ସେମାନଙ୍କ ପକ୍ଷେ କଠିନ କାର୍ଯ୍ୟ ଭଳି ପ୍ରତୀତ ହେଉଛି |ଏଣୁ ପ୍ରଶାସନ ଉକ୍ତ ପରିବାରକୁ ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନାରେ ସାମିଲ କରି ଘରଟିଏ ପ୍ରଦାନ କଲେ ଉକ୍ତ ପରିବାର ଉପକୃତ ହୁଅନ୍ତେ ବୋଲି ଗ୍ରାମବାସୀ ଦାବୀ କରିଛନ୍ତି |
ମସିହା ନିୟୁଜ୍ ସର୍ଭିସ୍
