ମହାବିଷୁବ ସଂକ୍ରାନ୍ତି
ବାସନ୍ତୀ ଲତା ଜେନା
ଓଡ଼ିଆଙ୍କ ନବ ବର୍ଷ ପଣା ସଂକ୍ରାନ୍ତି
ବୈଶାଖ ପ୍ରଥମ ଦିନ ଲୋକେ ବୋଲନ୍ତି l୧l
ଗ୍ରୀଷ୍ମର ଆରମ୍ଭ ହୁଏ ବସନ୍ତ ଶେଷ
ଝାଞ୍ଜି ପବନ ବହଇ ଶରୀର ଶୁଷ୍କ l୨l
ସୂର୍ଯ୍ୟଙ୍କର ତେଜ ବଢେ ପ୍ରଖର ଖରା
ଅଥୟ ଜୀବନ ହୁଏ ଶୁଷ୍କ ଏ ଧରା l୩l
ପଖାଳ ଭାତରେ ମନ ହୁଏ ସନ୍ତୁଷ
ଥଣ୍ଡା ପାନୀୟ ଜଳରେ ମନ ହରଷ l୪l
ଏହି ଦିନ ମାଠିଆରେ ରଖନ୍ତି ପଣା
ଚଉଁରା ମୂଳେ ବାନ୍ଧନ୍ତି କରିଣ କଣା l୫l
ତୁଳସୀ ମୂଳରେ ପାଣି ଟୋପା ଝରଇ
ବସୁନ୍ଧରା ବର୍ଷା କରେ ତୁଳସୀ ପାଇଁ l୬l
ଛତୁଆ କଦଳୀ ଦହି କୋରା ନଡ଼ିଆ
ଚଉଁରା ପାଖରେ ଭୋଗ ଲାଗେ ବଡ଼ିଆ l୭l
ସାରଳା ବିରଜା ଚଣ୍ଡୀ ଦେଵୀ ମନ୍ଦିର
ଝାମୁ ଯାତ୍ରା ହୋଇ ଥାଏ ଭାରି ସୁନ୍ଦର l୮l
ଘଣ୍ଟ ପାଟୁଆ ନାଚନ୍ତି ଘଣ୍ଟ ମୁଣ୍ଡାଇ
ରଡ଼ ନିଆଁରେ ଚାଲନ୍ତି ଦେବୀଙ୍କୁ ଧ୍ୟାୟୀ l୯l
ଦଣ୍ଡ ନାଟ ଅନ୍ତ ହୁଏ ମେରୁ ଯାତରେ
ବ୍ରତ ସମାପନ ହୁଏ ପଣା ଭୋଗରେ l୧୦l
ଛତୁ ପଣା ଭୋଗ ହୁଏ ଘର ମନ୍ଦିରେ
ଶାହି ପଡିଶା ବାଣ୍ଟନ୍ତି ଖୁସି ମନରେ l୧୧l
ପଣା ସଙ୍କରାନ୍ତି ଠାରୁ ପଥିକ ପାଇଁ
ଜଳ ଛତ୍ର ଦାନ ହୁଏ ତୃଷ୍ଣା ମେଣ୍ଟଇ l୧୨l
ଓଡ଼ିଆ ପାଞ୍ଜି ଚଳନ ଆଜ ଦିନରେ
ଶ୍ରୀମନ୍ଦିରେ ପାଠ ହୁଏ ଜଗା ପାଖରେ l୧୩l
ହନୁମାନଙ୍କ ଜୟନ୍ତୀ ଆଜିର ଦିନ
ଶ୍ରଦ୍ଧାଳୁ ଭକ୍ତ ପୂଜନ୍ତି ଦେଇଣ ମନ l୧୪l
ଓଡ଼ିଆ ସଂସ୍କୃତି ଆମ ଜଗା ନାମରେ
ପରମ୍ପରା ପାଳି ଥାଉ ହସ ଖୁସିରେ l୧୫l
ଗାନ୍ଧୀନଗର, ନବରଙ୍ଗପୁର l