ପ୍ରଧାନମନ୍ତ୍ରୀ ଆବାସ ଯୋଜନା (ଗ୍ରାମୀଣ) ଗୃହ ସର୍ଭେ ନେଇ ପ୍ରଚାର
ଡାବୁଗାଁ, ୧/୧୨ (ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ବ୍ଲକରେ ପ୍ରଧାନମନ୍ତ୍ରୀ ଆବାସ ଯୋଜନା (ଗ୍ରାମୀଣ) ଗୃହ ସର୍ଭେ ନେଇ ପ୍ରଚାର କାର୍ଯ୍ୟକ୍ରମ ରବିବାର କରାଯାଇଛି | ସୋମବାର ଡାବୁଗାଁ ବ୍ଲକ ର ସମସ୍ତ ପଞ୍ଚାୟତରେ ପ୍ରଧାନ ମନ୍ତ୍ରୀ ଆବାସ ଯୋଜନା (ଗ୍ରାମୀଣ) ଗୃହ ପାଇଁ ପ୍ରତ୍ୟେକ ଯୋଗ୍ୟ ହିତାଧିକାରୀ ଚୟନ ପାଇଁ ସର୍ଭେ ଡିଜିଟାଲ ଆପ ମାଧ୍ୟମରେ ଆରମ୍ଭ କରାଯିବ | ବ୍ଲକ ଓ ପଞ୍ଚାୟତ ସ୍ତରୀୟ ଅଧିକାରୀମାନେ ପଞ୍ଚାୟତରେ ଲୋକ ମାନଙ୍କୁ ଏହି ଆପ ଉପରେ ତାଲିମ ଦେବେ | ଯୋଗ୍ୟ ହିତାଧିକାରୀ ମାନେ ଏହି ଆପ ମାଧ୍ୟମରେ ଗୃହ ପାଇଁ ଆବେଦନ କରିପାରିବେ ଏବଂ ଅଧିକାରୀ ମାନେ ମଧ୍ୟ ପ୍ରତି ଗ୍ରାମ, ସାହିକୁ ଯାଇ ଏହି ଆପ ମାଧ୍ୟମରେ ସର୍ଭେ କରି ଯୋଗ୍ୟ ହିତଧିକାରୀଙ୍କ ନାମ ପଞ୍ଜୀକୃତ କରିବେ | ଏନେଇ ଆଜି ଡାକବାଜି ଯନ୍ତ୍ର ମାଧ୍ୟମରେ ବ୍ଲକ ର ବିଭିନ୍ନ ଗ୍ରାମରେ ସୂଚନା ଦିଆଯାଇଛି | ଏହି ପ୍ରଚାର ଗାଡିକୁ ବ୍ଲକ କାର୍ଯ୍ୟ|ଳୟରେ ଉଦଘାଟନ କରାଯାଇଛି | ଏହି ସମୟରେ ବିଡିଓ ଶରତ ମାଝି, ଗ୍ରାମ ପଞ୍ଚାୟତ ଉନ୍ନୟନ ଅଧିକାରୀ ପଦ୍ମନାଭ ଭାଲ୍ଲା, ବିପିସି ଯୋଗେନ୍ଦ୍ର ମାଝି, ପଞ୍ଚାୟତ ନିର୍ବାହୀ ଅଧିକାରୀ ଏ. ଡି ପ୍ରସାଦ ପ୍ରମୁଖ ଉପସ୍ଥିତ ଥିଲେ |
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
