ବାରମ୍ବାର ପ୍ରଚାର ପ୍ରସାର ପରେ ବି କୁମ୍ଭକର୍ଣ୍ଣ ନିଦ୍ରାରେ ଅଧିକାରୀ ଓ ଡବଲ ଇଞ୍ଜିନ ସରକାର
ଖଇରା,୨୩/୦୨/୨୫ – କଥାରେ ଅଛି ବିପଦ ଏକା ଆସେନି ଯେତେବେଳେ ଆସେ ସାଙ୍ଗସାଥି ନେଇ ଆସେ । ଏଭଳି ଘଟଣାର ଦୃଶ୍ୟ ଏ ସମାଜରେ ଦୈନିକ ପ୍ରାୟ ଦେଖିବାକୁ ମିଳୁଛି । ରାସ୍ତାଘାଟ ଠାରୁ ଆରମ୍ଭ କରି ବିଭିନ୍ନ କ୍ଷେତ୍ରରେ ତ ବିପଦ ଅଛି ହେଲେ ମଣିଷ ବା ପ୍ରଶାସନ ଦ୍ବାରା ଯେଉଁ ବିପଦ ସୃଷ୍ଟି କରାଯାଏ ତାହା ଅତ୍ୟନ୍ତ ନିନ୍ଦନୀୟ ଅଟେ ।
ଜନସାଧାରଣଙ୍କ ଯାତାୟତ କିପରି ବିପଦ ମୁକ୍ତ ହେବ ସେଥିପାଇଁ ସରକାର କୋଟି କୋଟି ଅର୍ଥ ବ୍ୟୟବରାଦ କରି ନୂତନ ଓ ଚଉଡା ରାସ୍ତା ନିର୍ମାଣ କରୁଛନ୍ତି ଏବଂ ପୁରୁଣା ରାସ୍ତାକୁ ପ୍ରଶସ୍ତି କରଣ କରୁଛନ୍ତି କିନ୍ତୁ ଜନସାଧାରଣଙ୍କ ଜୀବନ ପ୍ରତି ଧ୍ଯାନ ଦେଉ ନାହାନ୍ତି । ଏହି ପରିପ୍ରେକ୍ଷୀରେ ବାଲେଶ୍ଵର ଜିଲ୍ଲା ସୋର-ଖଇରା -କୁପାରି ୫୭ ନମ୍ବର ରାଜ୍ୟ ରାଜପଥ ଏକ ଉଦାହରଣ । ଏହି ରାସ୍ତାରେ ଅସଂଖ୍ୟ ମାଳମାଳ ରଙ୍ଗ ବିହୀନ ହମ୍ପସ୍ । ରାଜ୍ୟର ବିଭିନ୍ନ ସ୍ଥାନକୁ ସଂଯୋଗ କରୁଥିବା ଏହି ରାସ୍ତାଟି ଏବେ ଏତେ ପରିମାଣରେ ବିପଦ ପୂର୍ଣ୍ଣ ସାଜିଛି ଯାହା ତୁଳନା କରି ହେବନାହିଁ । ଉକ୍ତ ରାସ୍ତାରେ ହମ୍ପସ୍ ନିର୍ମାଣ ପାଇଁ ସରକାରୀ ନିୟମ ଅଛି କି ନାହିଁ ଜଣା ନାହିଁ ହେଲେ ଏପରି ରଙ୍ଗ ବିହୀନ ହମ୍ପସ୍ ତିଆରି କରି ଲୋକଙ୍କ ଜୀବନ ସହିତ ଖେଳ ଖେଳିବା ଠିକ୍ କି ? ଅନେକ ସମୟରେ ହମ୍ପସ୍ ଜନିତ ଦୁର୍ଘଟଣା ମଧ୍ୟ ଦୃଷ୍ଟି ଗୋଚର ହେଉଛି । ଅନେକ ଯାନବାହନ ମଧ୍ୟ ରଙ୍ଗ ବିହୀନ ହମ୍ପସ୍ କୁ ଜାଣି ନପାରି ଦୁର୍ଘଟଣାର ସମ୍ମୁଖୀନ ହେଉଛନ୍ତି ।
ବାଇକ୍ ଆରୋହୀଙ୍କ କଥା ନ କହିବା ଭଲ । ଦୃତଗତିରେ ଯାଉଥିବା ବାଇକ୍ ଆରୋହୀ ହମ୍ପସ୍ ଜାଣି ପାରୁ ନଥିବାରୁ ବାଇକ୍ ପଛରେ ବସିଥିବା ବ୍ଯକ୍ତିଙ୍କର ପ୍ରାଣ ମଧ୍ୟ ଚାଲି ଯାଉଛି । ଖଇରା ବ୍ଲକ ଖଇରା ବଜାର ବଣପାରିଆ ଛକ ଠାରୁ ଆଳଦା ଛକ ପର୍ଯ୍ୟନ୍ତ ମାଳମାଳ ରଙ୍ଗ ବିହୀନ ହମ୍ପସ୍ ଯାହାକି ନୂଆ ପୁରୁଣା ଆରୋହୀଙ୍କ ପାଇଁ ଅତ୍ୟନ୍ତ ବିପଦ ପୂର୍ଣ୍ଣ ଓ ଦୁର୍ଘଟଣା ଯୁକ୍ତ । ଏ ବିଷୟରେ ମତାମତ ନେବାପାଇଁ ବିଭାଗୀୟ ଅଧିକାରୀଙ୍କୁ ବାରମ୍ବାର ଯୋଗାଯୋଗ କରାଯାଉଥିଲେ ମଧ୍ୟ କୌଣସି କାରଣରୁ ସମ୍ଭବ ହୋଇ ପାରି ନାହିଁ । ରଙ୍ଗ ବିହୀନ ହମ୍ପସ୍ ଉଠାଯାଉ ନଚେତ୍ ହମ୍ପସ୍ ରଙ୍ଗ କରାଯାଉ ବୋଲି ବହୁ ବୁଦ୍ଧିଜୀବୀ ମାନେ ଗଣମାଧ୍ୟମ ନିକଟରେ ଅଭିଯୋଗ କରିଛନ୍ତି । ଗଣମାଧ୍ୟମରେ ବାରମ୍ବାର ପ୍ରଚାର ପ୍ରସାର ହୋଇ ଆସୁଥିଲେ ମଧ୍ୟ ନା କର୍ଣ୍ଣପାତ କରୁଛି ବିଭାଗୀୟ ଅଧିକାରୀ ନା ଗୁରୁତ୍ୱ ଦେଉଛି ଡବଲ ଇଞ୍ଜିନ ସରକାର । ଏ ସରକାର ଜୀବନ ରକ୍ଷାର ସରକାର ନା ଜୀବନ ନେବାର ସରକାର ବିଚାର କରନ୍ତୁ ଆପଣ ମାନେ । ତେଣୁ ତୁରନ୍ତ ରଙ୍ଗ ବିହୀନ ହମ୍ଫସ୍ ପ୍ରତି ସରକାର ଧ୍ଯାନ ଦିଅନ୍ତୁ ।।
ବାଲେଶ୍ଵର ଖଇରାରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
