ବାଲି ମାଫିଆ ବନ୍ଧା ହେବେ ଘୋଷଣା ପରେବି ବେଧଡକ ଚୋରା ବାଲି ଚାଲାଣ
ହାଇୱାରେ ବାଲି ପରିବହନ ପ୍ରଧାନମନ୍ତ୍ରୀ ଗ୍ରାମ ସଡକ ଭାଙ୍ଗୁଛି
ନଦୀ ଗତିପଥ ବଦଳୁଛି ଓ ବିପଦ ସୃଷ୍ଟି କରୁଛି
ଟ୍ରାକ୍ଟର ଓ ହାଇୱା ଗୁଳା ପାଇଁ ନଦୀ ବନ୍ଧ ଜରାଜୀର୍ଣ୍ଣ
ଯାଜପୁର ୧୩ ଜୁନ ୨୦୨୫ ( ପ୍ରଦୀପ କୁମାର ମଲ୍ଲିକ ) ବାଲି ମାଫିଆ ସରକାରଙ୍କ ତଣ୍ଟିର କଣ୍ଟା ହୋଇଛି। ଅନ୍ୟ ପଟେ ବେଆଇନ୍ ବାଲି ଚାଲାଣ ଯୋଗୁଁ ସରକାର କୋଟି କୋଟି ଟଙ୍କାର ରାଜସ୍ବ ହରାଉଛନ୍ତି । ଅନ୍ୟପଟେ ବାଲି ହାଇୱା ଯୋଗୁଁ ଗ୍ରାମ୍ୟ ରାସ୍ତା ସମେତ ପ୍ରଧାନମନ୍ତ୍ରୀ ଗ୍ରାମ ସଡ଼କ ରାସ୍ତା ଭାଙ୍ଗୁଛି। ସେହିପରି ନଦୀବନ୍ଧ ନଷ୍ଟ ହେଉଛି। ନଦୀର ଗତିପଥ ବଦଳିବା ସହ ନଦୀ ପ୍ରତି ବିପଦ ସୃଷ୍ଟି କରୁଛି। ଚୋରା ବାଲି ଚାଲାଣ କାରୀ ଓ ନଦୀ ଗର୍ଭରୁ ବାଲି ଉତ୍ତୋଳନକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ରାଜ୍ୟ କ୍ୟାବିନେଟ୍ ନିଷ୍ପତ୍ତି ନେଇଛି। ଏପରିକି ଯେତେ ପ୍ରଭାବଶାଳୀ ହେଲେବି ବାଲି ମାଫିଆଙ୍କୁ ଛଡ଼ା ଯିବ ନାହିଁ,ପ୍ରଶାସନ ସେମାନଙ୍କୁ ବାନ୍ଧିବ ବୋଲି ରାଜସ୍ବ ମନ୍ତ୍ରୀ ସ୍ପଷ୍ଟ ଭାବେ ଶୁଣାଇଛନ୍ତି । ଏତେ ସବୁ ସତ୍ତ୍ଵେ ବାଲି ମାଫିଆ ନିସଂକୋଚରେ ସ୍ପଷ୍ଟ ଦିବାଲୋକରେ ବାଲି ଉତ୍ତୋଳନ ଓ ବେଆଇନ୍ ପରିବହନ କରୁଥିବା ଦେଖାଦେଇଛି । ବାଲି ମାଫିଆଙ୍କ ପ୍ରାଦୁର୍ଭାବ ନଦୀ ଜଳ ପ୍ରବାହକୁ ପ୍ରଭାବିତ କରୁଛି। ନଦୀ ଗର୍ଭରୁ ବାଲି ମାଫିଆ ବାଲି କୋରି ନେଉଛନ୍ତି । କୌଣସି ଅନୁମତି ବା ସରକାରୀ କାଗଜପତ୍ର ନଥାଇ ବାଲି ମାଫିଆ କିଭଳି ଅବିଚାରିତ ଭାବରେ ବାଲି ଉତ୍ତୋଳନ ଓ ପରିବହନ କରୁଛନ୍ତି ବୁଝାପଡୁନି। ବିଭିନ୍ନ ଗଣମାଧ୍ୟମରେ ଏମାନଙ୍କ ଚୋରା କାରବାର ଓ ଦୌରାତ୍ମ୍ୟ ଖବର ପ୍ରକାଶିତ ହେଉଛି। ମାତ୍ର ପ୍ରକୃତପକ୍ଷେ ସେମାନଙ୍କ ବିରୋଧରେ ଠୋସ ପଦକ୍ଷେପ ନିଆଯାଉନି। ବାଲି ମାଫିଆଙ୍କ ରାଜୁତି ତଳ ସ୍ତରରୁ ଶାସନ ପ୍ରଶାସନ ପର୍ଯ୍ୟନ୍ତ ଯେ ରହିଛି ଏହା ଜଳ ଜଳ ହୋଇ ଦିଶୁଛି। ବୈତରଣୀ ଓ ଖରସ୍ରୋତା ନଦୀ ଗର୍ଭରୁ ବେଧଡକ ବାଲି ଉତ୍ତୋଳନ ବିଞ୍ଝାରପୁର ବ୍ଲକ , ପଡୋଶୀ ଦଶରଥପୁର ଓ ଯାଜପୁର ସହର ନିକଟରେ ହେଉଛି ।ଏହି ବାଲି କେନ୍ଦ୍ରାପଡ଼ା ଜିଲାକୁ ନିୟମିତ ହାଇୱା ଯୋଗେ ବିଭିନ୍ନ ଥାନା, ତହସିଲ ଓ ବ୍ଲକ ଆଖି ଆଗରେ ପରିବହନ ହେଉଛି। ପୋଲିସ , ବିଭାଗୀୟ ଅଧିକାରୀ ସବୁ ଦେଖୁଥିଲେ ମଧ୍ୟ ବାଲି ମାଫିଆଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନେବାକୁ ସାହସ କରିପାରିନାହାନ୍ତି । ଏହା ପଛରେ ମୋଟା ଅଙ୍କର ମାସିକିଆ ଏପରିକି ଟ୍ରିପ ଅନୁସାରେ ଘୁଷ୍ କାରବାର ରହିଛି ବୋଲି ବୁଦ୍ଧିଜୀବି କୁହନ୍ତି।
