ଅନ୍ଧାର

                   କୈଳାସ ଚ଼ନ୍ଦ୍ର ପାଢ଼ୀ

 

ବାହାରେ ଅନ୍ଧାର

ଭିତରେ ଅନ୍ଧାର

ସବୁଠିଁ ତ ଖାଲି

           ଅନ୍ଧାର ର କଳାଛାଇ,

ଆଲୁଅ ଟିକିଏ କାହିଁ ?

ଅନ୍ଧାର ଠାରୁ

ଆଲୁଅ ଆହୁରି

           ଭୀଷଣ ଛଳନାମୟୀ ।।

 

ସାରା ଅନ୍ଧାରେ

ଧର୍ଷିତା ଏଇ

          ସୁନ୍ଦରୀ ମାଟି ମାଆ,

ସର୍ବେ ତ ଏଠି

ମତ୍ତ-ମାତଙ୍ଗ

         କିଏସେ କରିବ ଆହା 

ସରି ସରି ଯାଏ ରାହା

କାପାଳିକ ଏଠି

ତାମସିକତାରେ

          ସୃଷ୍ଟିକୁ କରେ ସ୍ବାହା ।।

 

ଧର୍ମ ତ ଆଜି

ଅଜ୍ଞାତ ବାସେ

          ସମୟ ମାରୁଛି ହାଇ,

ମଥୁରା କଟକେ

ଖେଳି ଯାଉଅଛି

         କାଳର-କରାଳ ଛାଇ

ଚା଼ରିଆଡ଼େ ବିଭୀଷିକା

ପାଣ୍ଡବ ଏଠି

ଯାତନା ଭୋଗଇ

          କଉରବ ମାରେ ଛକା ।।

 

ବସୁଦେବ ଏଠି

ଅନ୍ଧାରେ ସଢେ଼

          ଦେବକୀ ଆଖିରେ ଲୁହ,

ଉଗ୍ରସେନର 

ଅନ୍ତର ତଳେ

          ଅସରା ଅସରା କୋହ

ବସୁଧା ଯେ ଥରହର

ହେ କୃଷ୍ଣ ତୁମେ

ଓହ୍ଲାଇ ଆସ

          ଧର୍ମର ଅବତାର ।।

         

କୁମାର ପୁର। ଅନନ୍ତ ପୁର।

ବାସୁଦେବ ପୁର। ଭଦ୍ରକ ।