ଶିଶୁପୁତ୍ର ନିଖୋଜ ଘଟଣା , ଛଅ ଦିନ ପରେ ପୋଲିସ ହାତ ଖାଲି
ଢେଙ୍କାନାଳ (ମନିସ )3/9/25 +- ହିନ୍ଦୋଳ ବ୍ଲକ ଅନ୍ତର୍ଗତ ଦଣ୍ଡିରୀ ପଞ୍ଚାୟତର କନକା ଗ୍ରାମରେ ଘଟଣା ଘଟିବାର ଛଅ ଦିନ ପରେ ମଧ୍ୟ ନିଖୋଜ ଶିଶୁ ପୁତ୍ରର ସନ୍ଧାନ ମିଳିପାରି ନାହିଁ ।
ଏହି କନକା ଗ୍ରାମଟି ଚାରି ବର୍ଷ ପୂର୍ବରୁ ଏକ ଦୁର୍ଗ ଅଞ୍ଚଳ ଭାବେ ପରିଗଣିତ ହେଉଥିଲା । ଜଙ୍ଗଲ ପାହାଡ ପରିବେଷ୍ଟିତ ଏହି ଗ୍ରାମକୁ ଚାରି ବର୍ଷ ପୂର୍ବରୁ ରାସ୍ତା ନଥିବାରୁ ଏହାକୁ ଏକ ବିଚ୍ଛିନ୍ନାଞ୍ଚଳ ଭାବେ ବିବେଚିତ ହେଉଥିଲା । ଏବେ ଏକ ପ୍ରସସ୍ତ ରାସ୍ତା ଏହି ଗ୍ରାମ ଦେଇ ଯାଇଥିବାରୁ ଏହା ଗ୍ରାମର ସୌନ୍ଦର୍ଯ୍ୟ ବୃଦ୍ଧି ସହ ସଭ୍ୟଜଗତ ସହ ଗ୍ରାମବାସୀଙ୍କୁ ଯୋଡିଛି ।
ଗତ ଶୁକ୍ରବାର ଦିନ ସେହି କନକା ଗ୍ରାମର ହୃଦାନନ୍ଦ ପଧାନ ଓ ବର୍ଷା ପଧାନଙ୍କ ଦେଢବର୍ଷର ତୃତୀୟ ପୁତ୍ର ସନ୍ତାନ ନିଜ ଘର ଅଗଣାରୁ ନିଖୋଜ ହୋଇଯାଇଛି । ଶୁକ୍ରବାର ଦିନ ପ୍ରାୟ ଏଗାରଟା ବେଳେ ଘରେ ଦେଢ ବର୍ଷର ଶିଶୁ ପୁତ୍ରକୁ ଏକା ଛାଡି ବର୍ଷା ପଧାନ ଘର ଅଗଣାରୁ ଘର ପଛ ପାଖ ଜଙ୍ଗଲକୁ ଛେଳି ଛାଡିବା ପାଇଁ ଯାଇଥିଲେ । ସେ ସେଠାରୁ ଫେରିବା ପାଇଁ ପ୍ରାୟ ଦଶ ରୁ ପନ୍ଦର ମିନିଟ ଲାଗିଥିଲା । ସେ ଯିବା ବେଳେ ତାଙ୍କ ତୃତୀୟ ପୁତ୍ରଟି ଘର ଅଗଣାରେ ଖେଳୁଥିଲା । ସେ ଫେରିବା ବେଳକୁ ଶିଶୁ ପୁତ୍ରଟି ସେଠାରେ ନ ଥିଲା। ବହୁତ ଖୋଜା ଖୋଜି ପରେ ମଧ୍ୟ ଶିଶୁପୁତ୍ରଟି ମିଳି ନ ଥିଲା। ଘର ସାମ୍ନାରେ ଗଣେଶ ପୂଜା ବିସର୍ଜନ ପାଇଁ ଗହଳି ଚହଳି ସହ ମାଇକ୍ ସାଉଣ୍ଡରେ ଅଞ୍ଚଳ ପ୍ରକମ୍ପିତ ହେଉଥିଲା ।
ଶିଶୁ ପୁତ୍ରକୁ ସେଠାରୁ ଯିଏବି ଅପହରଣ କରିଛି ସେ ଘରର ପଛ ପାଖରେ ନେଇଯାଇଛି କିମ୍ବା ପଡିଶା ଘର ଦେଇ ନେଇ ଯାଇଛି । ହୁଏତ ଶିଶୁ ପୁତ୍ରକୁ କେହି ଦୁର୍ବୃତ୍ତ ଅପହରଣ କରି ବିକ୍ରି କରିଦେଇଛି କିମ୍ବା ଅନ୍ୟ କୌଣସି ହୀନ ଉଦ୍ଦେଶ୍ୟ ରଖି ଅପହରଣ କରିଛି ବୋଲି ଧାରଣା ଦୃଢ ହୋଇଛି । ଏଭଳି ଏକ ସମ୍ବେଦନଶୀଳ ଘଟଣାର ଛଅ ଦିନ ପରେ ମଧ୍ୟ ପୋଲିସ ହାତ ଖାଲି ରହିଛି । ଯଥାଶୀଘ୍ର ପୋଲିସ ଶିଶୁଟିକୁ ସୁରକ୍ଷିତ ଉଦ୍ଧାର କରି ବାପା ମାଆ ଙ୍କ କୋଳକୁ ଫେରାଇ ଆଣିବାକୁ ସାଧାରଣରେ ଦାବି ହେଉଛି ।
ପ୍ରହ୍ଲାଦ ମୁଦୁଲିଙ୍କ ରିପୋର୍ଟ
