ଜଳୁଛି ଭାଟି :ବଢ଼ୁଛି ତାତି
କଣ୍ଟାବାଞ୍ଜି : ମାଟି ତିଆରି ଇଟାକୁ ନିଷିଦ୍ଧ କରାଯାଇଥିବା ବେଳେ ବଲାଙ୍ଗିରରେ ଏହାର ବ୍ୟତିକ୍ରମ ଦେଖିବାକୁ ମିଳିଛି । ଜିଲାର ଗାଁ ଗାଁରେ ଇଟାଭାଟି ତିଆରି କରି ବ୍ୟବସାୟୀ ଲାଭବାନ ହେଉଥିବା ବେଳେ ସରକାରଙ୍କ ନିୟମ ଉଲ୍ଲଙ୍ଘନ ହେଉଛି । ସବୁ ଜାଣି ମଧ୍ୟ ପ୍ରଶାସନ ନିରବ ରହୁଥିବା ବେଳେ ଗ୍ରୀଷ୍ମଋତୁରେ ଜଳୁଥିବା ଇଟାଭାଟି ତାପମାତ୍ରା ବୃଦ୍ଧିର ଏକ ପ୍ରମୁଖ କାରଣ ପାଲଟିଥିବା ପରିବେଶବିତ ଅଭିଯୋଗ କରିଛନ୍ତି ।
ଦିନକୁ ଦିନ ଜନସଂଖ୍ୟା ବୃଦ୍ଧି ସହ ଗାଁ ଓ ସହରାଞ୍ଚଳରେ କଳେବର ବୃଦ୍ଧି ପାଉଛି । ଦୈନନ୍ଦୀନ ଚାରିଆଡ଼େ ନୂଆ ଘର, ଦୋକାନ ଓ ସରକାରୀ ବେସରକାରୀ କାର୍ଯ୍ୟାଳୟ ଆଦି ନିର୍ମାଣ କରାଯାଉଛି । ବିଭିନ୍ନ ସରକାରୀ କୋଠାବାଡ଼ି ନିର୍ମାଣ କାର୍ଯ୍ୟରେ ମାଟିଇଟା ବଦଳରେ ପାଉଁଶ ଇଟା ବ୍ୟବହାର କରାଯାଉଥିଲେ ହେଁ ବେସରକାରୀ କୋଠାବାଡ଼ି ଓ ଘର ଆଦି ତିଆରି ପାଇଁ ମାଟି ତିଆରି ଇଟା ଚାହିଦା ଅଧିକ ରହିଛି । ବଜାରରେ ମାଟିଇଟା ହଜାର ପ୍ରତି ୭-୮ ହଜାର ଟଙ୍କାରେ ବିକ୍ରି ହେଉଥିବା ଜଣାପଡ଼ିଛି । ବଲାଙ୍ଗିର ଜିଲାରେ ଇଟାଭାଟି କୁଟୀରଶିଳ୍ପରେ ପରିଣତ ହୋଇଛି । ଜିଲାର କଣ୍ଟାବାଞ୍ଜି ସହ ଛୋଟ ଛୋଟ ସହରାଞ୍ଚଳରେ ବେଆଇନ ଭାବେ ଇଟାଭାଟି ଗଢ଼ି ଉଠିଥିବା ଦେଖିବାକୁ ମିଳିଛି । କଣ୍ଟାବାଞ୍ଜି ର ବିଭିନ୍ନ ଅଞ୍ଚଳରେ ବର୍ଷ ତମାମ ଇଟାଭାଟି ଗଢ଼ା ଚାଲିଥିବା ବେଳେ ଗ୍ରୀଷ୍ମଋତୁରେ ଇଟାଭାଟିର ନିଆଁ ଓ ଧୂଆଁ ତାପମାତ୍ରା ବୃଦ୍ଧି ସହ ବାୟୁମଣ୍ଡଳକୁ ପ୍ରଦୂଷିତ କରୁଛି । ଜିଲାର ବଲାଙ୍ଗିର, ପୁଇଁନ୍ତଲା, ଲୋଇସିଂହା, ଆଗଲପୁର,ଦେଓଗାଁ, ସଇଲା, ଟିଟିଲାଗଡ଼,କଣ୍ଟାବାଞ୍ଜି, ପାଟଣାଗଡ଼,ବେଲପଡ଼ା,ଖପ୍ରାଖୋଲ ଆଦି ତହସିଲ ଅଞ୍ଚଳରେ ବେଆଇନ ଇଟାଭାଟି ଗଢ଼ି ଉଠିଥିବା ଦେଖିବାକୁ ମିଳିଛି । ଏନେଇ ପ୍ରଶାସନ ଦୋଷ ମେଣ୍ଟାଇବାକୁ ନାଁକୁ ଚଢ଼ଉ କରି ଜୋରିମାନା ଆଦାୟ ପରେ ଦାୟିତ୍ୱ ସାରି ଦେଉଛି । ଜୋରିମାନା ଦାଖଲ ପରେ ବ୍ୟବସାୟୀ ବେଆଇନ ଇଟାଭାଟି ବ୍ୟବସାୟରୁ ବିରତ ନ ହୋଇ ପୁଣି ଇଟା ବ୍ୟବସାୟ ଜାରି ରଖୁଥିବା ଦେଖିବାକୁ ମିଳିଛି । ସରକାରୀ ଆଇନ ଉଲଙ୍ଘନ କରି ଅବୈଧ ଭାବେ ଇଟାଭାଟି ବ୍ୟବସାୟ ପରେ ଆଖୁଦୃଶିଆ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବାରୁ ବେଆଇନ ଇଟାଭାଟି ଉପରେ ପ୍ରଶାସନର ନିୟନ୍ତ୍ରଣ ରହୁ ନ ଥିବା ପ୍ରକାଶ ପାଇଛି । ଏପରିକି ବିଭିନ୍ନ ସ୍ଥାନରେ ଜଙ୍ଗଲରୁ ମୂଲ୍ୟବାନ ଗଛ କାଟି ଇଟାଭାଟିରେ ଜାଳେଣି ଭାବେ ବ୍ୟବହାର କରାଯାଉ ଥିବାରୁ ଜଙ୍ଗଲ ନଷ୍ଟ ହେଉଛି । ରାଜସ୍ୱ, ଖଣି ଓ ବନ ବିଭାଗ ମଧ୍ୟରେ ସମନ୍ଵୟ ଅଭାବ ଯୋଗୁଁ ବେଆଇନ ଇଟାଭାଟି ତିଆରି ବନ୍ଦ ହେଉ ନ ଥିବା ଅଭିଯୋଗ ହେଉଛି ।
ମୀନକେତନ ନିଆଲ ଙ୍କ ରିପୋର୍ଟ୍
