ରାଉରକେଲା / ରାଉରକେଲା ବିକାଶ ମଞ୍ଚ ତରଫରୁ ଚତୁର୍ଥ ଜନ ସଚେତନତା ଶିବିର କୋଏଲନଗର ସ୍ଥିତ ଜଗନ୍ନାଥ ମନ୍ଦିର ନିକଟରେ ଅନୁଷ୍ଠିତ ହୋଇଯାଇଛି l ଇଂ ଅଭୟ କୁମାର ଦାସଙ୍କ ସଭାପତିତ୍ବ ଓ ଡଃ ସୁମନ ଦତ୍ତଙ୍କ ଆବାହକତ୍ବରେ ଆୟୋଜିତଏହି କାର୍ଯ୍ୟକ୍ରମ ରେ ଶ୍ରୀ ଦତ୍ତ ରାଉରକେଲା ଏବଂ ସମଗ୍ର ସୁନ୍ଦରଗଡ଼ ଜିଲ୍ଲାର ବିକାଶ ପାଇଁ ରାଉରକେଲାରେ ଏକ ନୂଆ ରେଳ ଡିଭିଜନ ସ୍ଥାପନ କରାଇବା , ସୁପର ସ୍ପେସିଆଲଟି ହସ୍ପିଟାଲକୁ କାର୍ଯ୍ୟକ୍ଷମ କରାଇବା, ୪ସି ଯୁକ୍ତ ବିମାନ ବନ୍ଦର ଚଳାଇବା ଆଦି ଦାବି ଗୁଡିକ ସହ ଏହି ମଞ୍ଚର ଆଭିମୁଖ୍ୟ ଓ ବିଗତ ଦିନରେ ନିଆଯାଇଥିବା ପଦକ୍ଷେପ ବିଷୟରେ ସୂଚନା ଦେଇଥିଲେ l ସମାବେଶରେ ବିଭିନ୍ନ ରାଜନୈତିକ ଦଳର ବରିଷ୍ଠ କର୍ମକର୍ତ୍ତା, ସ୍ବେଛାସେବୀ ଅନୁଷ୍ଠାନ, ବରିଷ୍ଠ ନାଗରିକ ସଂଘ, ସମାଜସେବୀ, ବିଶିଷ୍ଟ ବ୍ୟକ୍ତିବିଶେଷ, ମହିଳା ସ୍ବେଛାସେବୀମାନେ ଯୋଗ ଦେଇ ସେମାନଙ୍କର ବହୁମୂଲ୍ୟ ମତାମତ ପ୍ରଦାନ କରିଥିଲେ l ସମାଜସେବୀ ସଂଜୀବ ମହାନ୍ତି, ରେଳ ଓ ସଡ଼କ ଉପଯୋଗକାରୀ ସଂଘର ଅମୂଲ୍ୟ ଚରଣ ବରାଳ,ଆପ ପାର୍ଟି ର ରଞ୍ଜନ ଲେଙ୍କା, ସିପିଏମ ସମ୍ପାଦକ ସୁରେନ୍ଦ୍ର ଦାଶ, ଜଗଦା ସାଂସ୍କୃତିକ ପରିଷଦର ସଭାପତି ପିତାମ୍ବର ଲେଙ୍କା, ବରଟୋଲି ବିକାଶ ସମିତିର ସମ୍ପାଦକ ପ୍ରଭାତ କୁମାର ଜେନା,ବିଜେଡିର ନଗର ସଭାପତି ଗଗନ ପଣ୍ଡା , ଲିଟୁ ପୁହାଣ, ମାଇକ୍ରୋ ବିଜ୍ଞାନୀ ଗୀତାଞ୍ଜଳି ପାତ୍ର, ଅବସରପ୍ରାପ୍ତ କର୍ମଚାରୀ ସଂଘର କୃତିବାସ ମହାପାତ୍ର, କୋଏଲ କ୍ଲବ ର ଦିଲ୍ଲୀପ ମହାନ୍ତି, ଚକ୍ରା ବିଶୋଇ ସ୍ମୃତି ସଂସଦର ପ୍ରକାଶ ପତି ପ୍ରମୁଖ ବକ୍ତବ୍ଯ ରଖିଥିଲା ବେଳେ ଶେଷରେ କବି ତଥା ସାମ୍ବାଦିକ କୁଞ୍ଜ ବିହାରୀ ରାଉତ ଧନ୍ୟବାଦ ଅର୍ପଣ କରିଥିଲେ l ବକ୍ତା ମାନେ ସେମାନଙ୍କର ସୁଚିନ୍ତିତ ମତାମତ ଦେବା ସହ ରାଜନୈତିକ ବିବାଦ ଭୁଲି, କେନ୍ଦ୍ର ଓ ରାଜ୍ୟ ସରକାରଙ୍କ ସାହାଯ୍ୟରେ ରାଉରକେଲା ତଥା ସୁନ୍ଦରଗଡ଼ ଜିଲ୍ଲାର ଉନ୍ନତି ପାଇଁ ସମସ୍ତଙ୍କୁ ଏକଜୁଟ ହେବାପାଇଁ ଆହ୍ୱାନ ଦେଇଥିଲେ l ବିଗତ ଦିନରେ ଜନ ସଚେତନତା ଅଭାବରୁ ଯେପରି ଇଏସଆଇସି ହସ୍ପିଟାଲ, ଆଇ ଆଇ ଏମ ମହାବିଦ୍ୟାଳୟ,ମେଲେରିଆ ଗବେଷଣା କେନ୍ଦ୍ର ଆଦି ଜିଲ୍ଲାରୁ ସ୍ଥାନାନ୍ତର ହୋଇ ଗଲା ତାହା ନିହାତି ଚିନ୍ତାର ବିଷୟ ବୋଲି ଉଦ୍ବେଗ ପ୍ରକାଶ କରିଥିଲେ l ରାଉରକେଲା ତଥା ସୁନ୍ଦରଗଡ଼ ଜିଲ୍ଲାରେ ବିଭିନ୍ନ କଳକାରଖାନା, ଖଣିଖାଦାନ, ଜାତୀୟ ଓ ଅନ୍ତର୍ଜାତୀୟ ସ୍ତରର ଶିକ୍ଷାନୁଷ୍ଠାନ, ଅଫିସ, ଐତିହାସିକ ସ୍ଥଳ ଥିଲାବେଳେ ଏବଂ ସରକାରଙ୍କୁ ବହୁ ପରିମାଣରେ ରାଜସ୍ବ ଦେଉଥିଲେ ମଧ୍ୟ କୌଣସି ଆଖି ଦୃଶିଆ ଉନ୍ନତି ହେଉନାହିଁ ବୋଲି ବକ୍ତାମାନେ କ୍ଷୋଭ ପ୍ରକାଶ କରିଥିଲେ l ରାଉରକେଲା ବାସୀଙ୍କର ସୁବିଧା ପାଇଁ ଭୁବନେଶ୍ୱର ଠାରେ ସ୍ୱଳ୍ପ ମୂଲ୍ୟରେ ଉପଲବ୍ଧ ହେଉଥିବା ଏକ ରାଉରକେଲା ଭବନ ନିର୍ମାଣ ପାଇଁ ଦାବି ହୋଇଥିଲା l ତେଣୁ ସମସ୍ତେ ରାଉରକେଲା ବିକାଶ ମଞ୍ଚର ଏଇଭଳି ଜନ ସଚେତନତା ଶିବିରର ଆୟୋଜନକୁ ପ୍ରଶଂସା କରିବା ସହ ଏହି ଜିଲ୍ଲାକୁ ଶ୍ରେଷ୍ଠ ଜିଲ୍ଲାରେ ପରିଣତ କରିବା ପାଇଁ ଏକଜୁଟ ହେବାକୁ ମତ ରଖିଥିଲେ l ପ୍ରକାଶ ଥାଉକି ରାଉରକେଲାରେ ବିମାନ ବନ୍ଦରର କାର୍ପେଟ ଏରିଆକୁ ବଢ଼ାଯାଇ ୫୬୫୫ ଫୁଟ୍ ରୁ ୬୨୭୩ ଫୁଟ କୁ ସମ୍ପ୍ରସାରଣ କରାଯାଉଛି ଯାହା ୪ସି ବିମାନ ବନ୍ଦର ପାଇଁ ଉପଯୁକ୍ତ l ଏହାଠାରୁ କମ୍ କାର୍ପେଟ ଏରିଆ ଥିବା ବିମାନ ବନ୍ଦର ଯଥା -ପୋରବନ୍ଦର – ୪୫୦୦ଫୁଟ କାଣ୍ଡଲା -୪୯୯୭ ଫୁଟ , ଡ଼ିଉ -୫୯୨୨ଫୁଟ,ମହୀଶୂର -୫୬୦୯ଫୁଟ, ପୁଡ଼ୁଚେରୀ -୫୮୦୦ଫୁଟ , ଶିଲଙ୍ଗ -୬୦୦୦ ଫୁଟ, ଜଗଦଳପୁର -୫୬୦୦ଫୁଟ ଓ ବିଳାସପୁର -୫୦୩୫ଫୁଟ ଥାଇ ୪ସି ଲାଇସେନ୍ସ ପାଇଛନ୍ତି l ଏଣୁ ରାଉରକେଲା ବିମାନବନ୍ଦରକୁ ୪ସି ଲାଇସେନ୍ସ ପ୍ରଦାନ କରିବାରେ କୌଣସି ଅସୁବିଧା ନାହିଁ ବୋଲି ପ୍ରକାଶ କରିଥିଲେ l ସେହିପରି ଚକ୍ରଧରପୁର ରେଳବାଇ ଡିଭିଜନର ୮୮ ଷ୍ଟେସନରୁ ୧୮ହଜାର କୋଟି ରାଜସ୍ବ ଆଦାୟ ହେଉ ଥିଲା ବେଳେ ପ୍ରସ୍ତାବିତ ରାଉରକେଲା ରେଳବାଇ ଜୋନର ୫୦ଟି ଷ୍ଟେସନରୁ ୧୪ହଜାର କୋଟି ଟଙ୍କା ରାଜସ୍ବ ଆଦାୟ ହୋଇଥାଏ l ବନ୍ଧମୁଣ୍ଡା ଠାରେ ପର୍ଯ୍ୟାପ୍ତ ଜମି ଓ ଭିତ୍ତିଭୂମି ଥିବାରୁ ରାଉରକେଲାରେ ଏକ ରେଳ ଡିଭିଜନ ହୋଇ ପାରିବ ବୋଲି ଦାବି କରିଥିଲେ l ସୂଚନା ଯୋଗ୍ୟ ଯେ ରାଉରକେଲା ବିକାଶ ମଞ୍ଚ ଏହା ପୂର୍ବରୁ ରାଉରକେଲାର ବିଭିନ୍ନ ସ୍ଥାନରେ ଏଇଭଳି ଜନ ସଚେତନତା ଶିବିରର ଆୟୋଜନ କରି ଆସୁଅଛି l
ରାଉରକେଲା ରୁ କୁଞ୍ଜ ବିହାରି ରାଉତ ଙ୍କ ରିପୋର୍ଟ।