ଆଜିର ଦିବସର ଅନୁଚିନ୍ତା : ଏପ୍ରିଲ୍ ୨୯ ତାରିଖ : ଉତ୍ଥାନ ଓ ପତନର ଐତିହାସିକ ପଦଚିହ୍ନ
ଡ଼ା. ଦେବୀ ପ୍ରସାଦ ମିଶ୍ର,
କାଳର କପାଳରେ ପ୍ରତିଟି ଦିନ ଏକ ନୂତନ ସ୍ଵାକ୍ଷର।ପ୍ରତିଟି ଦିନ ଏକ ନୂତନ ଅଙ୍କନ,ଏକ ଅଦୃଶ୍ୟ ଅନୁଭୂତିର ସ୍ପର୍ଶ ଯେଉଁଠାରେ କଳା,ବିଜ୍ଞାନ ଓ ମାନବୀୟ ଇତିହାସ ଏକ ସୂତ୍ରରେ ବନ୍ଧା।ଆଜି ଏପ୍ରିଲ୍ ୨୯ ତାରିଖ।ଇତିହାସର ପୃଷ୍ଠା ଓଲଟାଇଲେ ଦେଖାଯାଏ ଯେ,ଏହି ଦିନଟି ବିଶ୍ୱ,ଭାରତ ଓ ଓଡ଼ିଶା ପାଇଁ ଅନେକ ଗୁରୁତ୍ଵପୂର୍ଣ୍ଣ ଘଟଣାର ସାକ୍ଷୀ।
ଆଜି ହେଉଛି ଆନ୍ତର୍ଜାତୀୟ ନୃତ୍ୟ ଦିବସ।ଆଧୁନିକ ବାଲେ ନୃତ୍ୟର ଜନକ ଜିନ୍-ଜର୍ଜ ନୋଭେରଙ୍କ ଜନ୍ମଦିନ ଅବସରରେ ୧୯୮୨ ମସିହାରୁ ୟୁନେସ୍କୋ ସହଯୋଗରେ ଏହା ପାଳିତ ହୋଇଆସୁଛି।ଏହି ଦିବସ ଆମକୁ ମନେ ପକାଏ ଯେ ନୃତ୍ୟ କେବଳ ଅଙ୍ଗଭାଙ୍ଗୀର ଖେଳ ନୁହେଁ,ଏହା ମନୁଷ୍ୟର ଅନ୍ତର୍ନିହିତ ଭାବନାର ସ୍ଵତସ୍ଫୂର୍ତ୍ତ ପ୍ରକାଶ।ଜିନ୍-ଜର୍ଜ ନୋଭେରଙ୍କ ସୃଜନଶୀଳ ଚେତନା ଆଜି ମଧ୍ୟ ସମଗ୍ର ବିଶ୍ୱରେ ନୃତ୍ୟର ତାଳକୁ ଜୀବନ୍ତ ରଖିଛି।ଏହା ସହିତ ଆଜିର ଦିନଟିକୁ ମିଳିତ ଜାତିସଂଘ ପକ୍ଷରୁ ରାସାୟନିକ ଅସ୍ତ୍ରଶସ୍ତ୍ର ଯୁଦ୍ଧରେ ପ୍ରାଣ ହରାଇଥିବା ପୀଡିତଙ୍କ ସ୍ମୃତି ଦିବସ ଭାବେ ମଧ୍ୟ ସ୍ଵୀକୃତି ଦିଆଯାଇଛି।୧୮୫୪ ମସିହାରେ ଆଜି ଜନ୍ମଗ୍ରହଣ କରିଥିଲେ ବିଶିଷ୍ଟ ଗଣିତଜ୍ଞ ତଥା ପଦାର୍ଥ ବିଜ୍ଞାନୀ ହେନେରୀ ପଏନକେୟାର।୧୯୯୧ ମସିହାରେ ବାଂଲାଦେଶର ଚିଟ୍ଟାଗଙ୍ଗ ଜିଲ୍ଲାରେ ଏକ ଭୟଙ୍କର ସାମୁଦ୍ରିକ ବାତ୍ୟା ଯୋଗୁଁ ପ୍ରାୟ ୧.୩୮ ଲକ୍ଷ ଲୋକ ପ୍ରାଣ ହରାଇଥିଲେ।୧୯୯୭ ମସିହାରେ ଆନ୍ତର୍ଜାତୀୟ ସ୍ତରରେ ରାସାୟନିକ ଅସ୍ତ୍ରଶସ୍ତ୍ର ଚୁକ୍ତି କାର୍ଯ୍ୟକାରୀ ହୋଇଥିଲା।ଆଜି ହଲିଉଡର ବିଶିଷ୍ଟ ନିର୍ଦ୍ଦେଶକ ଆଲଫ୍ରେଡ୍ ହିଚକକ୍ ଙ୍କ ଶ୍ରାଦ୍ଧ ଦିବସ।
ଭାରତ କ୍ଷେତ୍ରରେ ୧୬୩୯ ମସିହାରେ ମୋଗଲ ସମ୍ରାଟ ଶାହାଜାହାନ ନିଜର ନୂତନ ରାଜଧାନୀ ଶାହାଜାହାନାବାଦ (ବର୍ତ୍ତମାନର ପୁରୁଣା ଦିଲ୍ଲୀ) ନିର୍ମାଣ ପାଇଁ ଭିତ୍ତିପ୍ରସ୍ତର ସ୍ଥାପନ କରିଥିଲେ।ଭାରତର ସର୍ବଶ୍ରେଷ୍ଠ ଚିତ୍ରଶିଳ୍ପୀଙ୍କ ମଧ୍ୟରୁ ଅନ୍ୟତମ ରାଜା ରବି ବର୍ମାଙ୍କ ଆଜି ଜନ୍ମ ଜୟନ୍ତୀ।ପାଶ୍ଚାତ୍ୟ ଶୈଳୀରେ ଭାରତୀୟ ପୁରାଣ ଏବଂ ଦେବଦେବୀଙ୍କ ଅମର କୃତି ପାଇଁ ସେ ସର୍ବଦା ସ୍ମରଣୀୟ।ପ୍ରସିଦ୍ଧ ସଂଗୀତ ନିର୍ଦ୍ଦେଶକ ଜୁବିନ୍ ମେହେଟା,ତବଲା ବାଦକ ଉସ୍ତାଦ ଆଲ୍ଲାରଖା ଏବଂ କ୍ରିକେଟର ଆଶିଷ ନେହେରାଙ୍କର ମଧ୍ୟ ଆଜି ଜନ୍ମଦିନ।ଆଜି ଭାରତୀୟ ଅଭିନେତା ଇରଫାନ୍ ଖାନ୍ ଙ୍କର ଶ୍ରାଦ୍ଧ ଦିବସ।
ଆଜିର ଏହି ତିଥି ଆମକୁ ଶିକ୍ଷା ଦିଏ ଯେ,କଳା ହେଉ କିମ୍ବା ବିଜ୍ଞାନ,ପ୍ରତ୍ୟେକ କ୍ଷେତ୍ରରେ ମାନବୀୟ ପ୍ରୟାସ ହିଁ ବିଶ୍ୱକୁ ନୂତନ ଦିଶା ପ୍ରଦାନ କରେ।ଶାହାଜାହାନଙ୍କ ଶାହାଜାହାନାବାଦ ସ୍ୱପ୍ନ ଯେଉଁଠି ଏକ ସଭ୍ୟତାର ଶିଖରକୁ ସୂଚିତ କରେ,ସେଠି ଚିଟ୍ଟାଗଙ୍ଗର ବାତ୍ୟା ମନୁଷ୍ୟର ଅସହାୟତାକୁ ଉଜାଗର କରେ।ଏହି ଦୁଇ ଚିତ୍ର ମଧ୍ୟରେ ମାନବୀୟ ଜୀବନର ସତ୍ୟ ଗୁପ୍ତ ରହିଛି ତାହା ହେଉଛି ସୃଜନ ଓ ବିନାଶର ସହଅସ୍ତିତ୍ୱ।ସୃଜନକୁ ଅଙ୍ଗୀକାର କରି,ମାନବୀୟ ମୂଲ୍ୟକୁ ଉଚ୍ଚସ୍ଥାନ ଦେଇ,ଆମେ ଆଗକୁ ବଢ଼ିବା—ଏହାହିଁ ଏପ୍ରିଲ୍ ୨୯ ର ସତ୍ୟ ସନ୍ଦେଶ।ଇତିହାସର ଦୃଷ୍ଟିରେ ଏହି ଦିନ ଆମକୁ ଶିଖାଏ ଉତ୍ଥାନ ଓ ପତନର ଅବିରତ ଚକ୍ର।ରାଜା ରବି ବର୍ମାଙ୍କ କଳାକୃତି ଭାରତୀୟ ସଂସ୍କୃତିକୁ ନୂତନ ଦୃଷ୍ଟିଦାନ କରିଥିଲା, ଯେଉଁଠି ପଏନକେୟାରଙ୍କ ବିଜ୍ଞାନ ଚିନ୍ତା ଆମକୁ ଅନ୍ୱେଷଣର ପଥ ଦେଖାଇଥିଲା।ଏହି ଦୁଇ ଧାରା ଆମକୁ ଶିଖାଏ ଯେ ଜ୍ଞାନ ଓ ସୃଜନଶୀଳତା ହିଁ ମାନବ ସଭ୍ୟତାର ମୂଳ ଶକ୍ତି।ତେବେ ଆସନ୍ତୁ,ଆଜି ଆମେ ସମସ୍ତେ ଏହି ବିଶିଷ୍ଟ ବ୍ୟକ୍ତିମାନଙ୍କ ଅବଦାନକୁ ସ୍ମରଣ କରିବା।
ଡ଼ା. ଦେବୀ ପ୍ରସାଦ ମିଶ୍ର,
✉️ debisirscience@gmail.com
/ debiprasadmishra085@gmail.com
