ଜଳଛତ୍ର ନାଁରେ ଲୋକଙ୍କ ଟଙ୍କାର ଅପବ୍ୟୟ ? ମହାନଗର ନିଗମର କାର୍ଯ୍ୟକୁ ନେଇ ଉଠିଲା ପ୍ରଶ୍ନ
ବ୍ରହ୍ମପୁର; ୧୧/୦୫ : ଗ୍ରୀଷ୍ମ ପ୍ରବାହରେ ସାଧାରଣ ଲୋକଙ୍କୁ ସୁପେୟ ଜଳ ଯୋଗାଇବା ପାଇଁ ବ୍ରହ୍ମପୁର ମହାନଗର ନିଗମ ପକ୍ଷରୁ ସହରର ବିଭିନ୍ନ ୱାର୍ଡରେ ଜଳଛତ୍ର ସ୍ଥାପନ କରାଯାଇଛି। ଲକ୍ଷାଧିକ ଟଙ୍କା ବ୍ୟୟରେ ଆରମ୍ଭ ହୋଇଥିବା ଏହି ପଦକ୍ଷେପ ଆରମ୍ଭରେ ସ୍ୱାଗତଯୋଗ୍ୟ ଲାଗିଥିଲେ ମଧ୍ୟ, ବର୍ତ୍ତମାନ ତାହାର ପରିଚାଳନା ଓ କାର୍ଯ୍ୟକ୍ଷମତାକୁ ନେଇ ଜନମନରେ ଅସନ୍ତୋଷ ଦେଖାଦେଇଛି।
ସହରର ଅନେକ ସ୍ଥାନରେ ଜଳଛତ୍ର ଥିଲେ ମଧ୍ୟ ସେଠାରେ ସୁପେୟ ଜଳ ମିଳୁନଥିବା ଅଭିଯୋଗ ଆସୁଛି। କେତେକ ସ୍ଥାନରେ ପାଣି ଥିଲେ ମଧ୍ୟ ଦାୟିତ୍ୱରେ କୌଣସି ସ୍ୱୟଂ ସହାୟକ ଗୋଷ୍ଠୀର ମହିଳା କିମ୍ବା କର୍ମଚାରୀ ନଥିବାରୁ ଲୋକମାନେ ସଠିକ୍ ସୁବିଧା ପାଇପାରୁନାହାନ୍ତି। ଏହା ଦେଖାଉଛି ଯେ, ଯୋଜନା କରାଯାଇଥିଲେ ମଧ୍ୟ ତାହାର ସଠିକ୍ ତଦାରଖ ଓ ପରିଚାଳନାରେ ଗୁରୁତର ଅବହେଳା ହୋଇଛି।
ସାଧାରଣ ଲୋକଙ୍କ ମତରେ, କେବଳ ଦେଖାଦେଖି ପାଇଁ ଅସ୍ଥାୟୀ ଜଳଛତ୍ର କରି ଲକ୍ଷାଧିକ ଟଙ୍କା ଖର୍ଚ୍ଚ କରିବାଠାରୁ, ସହରର ୪୨ଟି ୱାର୍ଡର ମୁଖ୍ୟ ଛକରେ ସ୍ଥାୟୀ ଭାବରେ ଫ୍ରିଜ୍ କିମ୍ବା ଶୀତଳ ଜଳ ବ୍ୟବସ୍ଥା କରାଯାଇଥାନ୍ତା ହେଲେ ଲୋକେ ବର୍ଷ ସାରା ଏହାର ସୁବିଧା ପାଇପାରୁଥାନ୍ତେ। କିଛି ସମାଜସେବୀ ଏହାକୁ “ପ୍ରହସନ” ବୋଲି କହୁଥିବା ବେଳେ, ଅନ୍ୟମାନେ ଏହାକୁ “ହରିଲୁଟ ଯୋଜନା” ବୋଲି ଅଭିହିତ କରିଛନ୍ତି।
ବୁଦ୍ଧିଜୀବୀଙ୍କ କହିବା ଅନୁସାରେ, ଜନସାଧାରଣଙ୍କ କଷ୍ଟାର୍ଜିତ ଟଙ୍କାର ସଠିକ୍ ବ୍ୟବହାର ହେବା ଦରକାର। କେବଳ କାଗଜପତ୍ରରେ ଯୋଜନା ଦେଖାଇ ଅପବ୍ୟୟ କରାଯିବା ଲୋକତନ୍ତ୍ର ପାଇଁ ଶୁଭ ସଙ୍କେତ ନୁହେଁ। ମହାନଗର ନିଗମ ପକ୍ଷରୁ ଏହି ଯୋଜନାର ସଠିକ୍ ତଦନ୍ତ କରାଯାଇ ଯେଉଁଠାରେ ଅବ୍ୟବସ୍ଥା ରହିଛି ସେଥିରେ ତୁରନ୍ତ ସୁଧାର ଆଣିବା ଆବଶ୍ୟକ ବୋଲି ଦାବି ହେଉଛି।
ଶେଷରେ ସାଧାରଣରେ ପ୍ରଶ୍ନ ଉଠୁଛି, ଏହି ଜଳଛତ୍ର ଯୋଜନା ସତରେ ଜନହିତ ପାଇଁ କି, ନା କେବଳ କିଛି ବ୍ୟକ୍ତିବିଶେଷଙ୍କ ସ୍ୱାର୍ଥ ସାଧନ ପାଇଁ ?
