କଳାହାଣ୍ଡିରେ ଗର୍ଜିଲା ଛାତ୍ରଶକ୍ତି: NEET ଦୁର୍ନୀତି ବିରୋଧରେ AISFର ବିଶାଳ ପ୍ରତିବାଦ, କେନ୍ଦ୍ର ଶିକ୍ଷାମନ୍ତ୍ରୀଙ୍କ ଇସ୍ତଫା ଦାବି
ଜୁନାଗଡ଼,୨୭/୫ (ମନୀସ) ନିଟ ପ୍ରଶ୍ନପତ୍ର ପ୍ରଘଟ ମାମଲାକୁ ନେଇ ସାରା ଦେଶରେ ଅସନ୍ତୋଷର ନିଆଁ ଜଳୁଥିବା ବେଳେ ଏହାର ପ୍ରତିଫଳନ ଏବେ କଳାହାଣ୍ଡି ଜିଲ୍ଲାରେ ଦେଖିବାକୁ ମିଳିଛି। ଲକ୍ଷ ଲକ୍ଷ ମେଧାବୀ ଛାତ୍ରଛାତ୍ରୀଙ୍କ ଭବିଷ୍ୟତ ସହ ହୋଇଥିବା ଚଞ୍ଚକତା ଏବଂ ବ୍ୟାପକ ଅନିୟମିତତା ପ୍ରତିବାଦରେ ଅଲ୍ ଇଣ୍ଡିଆ ଛାତ୍ର ସଂଘ (AISF) ପକ୍ଷରୁ ରାଜପଥକୁ ଓହ୍ଲାଇଛନ୍ତି ଶତାଧିକ ଛାତ୍ରଛାତ୍ରୀ। ଆଜି କଳାହାଣ୍ଡି ଜିଲ୍ଲା ଜୁନାଗଡ଼ ବ୍ଲକ୍ ସମ୍ମୁଖରେ AISF ତରଫରୁ ଏକ ବିଶାଳ ଧାରଣା ଓ ପ୍ରତିବାଦ ସଭା ଅନୁଷ୍ଠିତ ହୋଇଯାଇଛି। ଏହି ଅବସରରେ ଆନ୍ଦୋଳନକାରୀମାନେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନୈତିକ ଇସ୍ତଫା ଦାବି କରିବା ସହ କେନ୍ଦ୍ର ସରକାରଙ୍କ ଶିକ୍ଷାନୀତି ବିରୋଧରେ ଜୋରଦାର ସ୍ଲୋଗାନବାଜି କରିଛନ୍ତି।
ଆଜି ପୂର୍ବାହ୍ନରେ AISF କଳାହାଣ୍ଡି ଜିଲ୍ଲା ପରିଷଦର ନେତୃତ୍ୱରେ ଶତାଧିକ ଛାତ୍ରଛାତ୍ରୀ ହାତରେ ବ୍ୟାନର, ପ୍ଲାକାର୍ଡ ଧରି ଏକ ଶୋଭାଯାତ୍ରାରେ ବାହାରି ଜୁନାଗଡ଼ ବ୍ଲକ୍ କାର୍ଯ୍ୟାଳୟ ସମ୍ମୁଖରେ ପହଞ୍ଚିଥିଲେ। ସେଠାରେ ଅନୁଷ୍ଠିତ ପ୍ରତିବାଦ ସଭାରେ ଛାତ୍ରନେତାମାନେ କେନ୍ଦ୍ର ସରକାର ଓ ଜାତୀୟ ପରୀକ୍ଷା ସଂସ୍ଥା (NTA) ଉପରେ ବର୍ଷିଛନ୍ତି। NEET ଭଳି ଏକ ସମ୍ବେଦନଶୀଳ ତଥା ଦେଶର ସର୍ବବୃହତ ମେଡିକାଲ ପ୍ରବେଶିକା ପରୀକ୍ଷାରେ ଯେଭଳି ଭାବେ ଦୁର୍ନୀତି ଓ ପ୍ରଶ୍ନପତ୍ର ଲିକ୍ ହୋଇଛି, ତାହା ଦେଶର ଶିକ୍ଷା ବ୍ୟବସ୍ଥାର ବଡ଼ ବିଫଳତା ବୋଲି ସେମାନେ ଅଭିହିତ କରିଛନ୍ତି। ଏହି ମହାଘୋଟାଲା ଯୋଗୁଁ ବର୍ଷ ବର୍ଷ ଧରି କଠିନ ପରିଶ୍ରମ କରୁଥିବା ଗରିବ, ମଧ୍ୟବିତ୍ତ ଓ ଯୋଗ୍ୟ ଛାତ୍ରଛାତ୍ରୀଙ୍କ ଡାକ୍ତର ହେବାର ସ୍ୱପ୍ନ ସମ୍ପୂର୍ଣ୍ଣ ଧୂଳିସାତ ହୋଇଯାଇଛି ବୋଲି ସଂଘ ଅଭିଯୋଗ କରିଛି।ଆନ୍ଦୋଳନକାରୀଙ୍କ ପ୍ରତିବାଦ ସଭାରେ ସଂଘର ବରିଷ୍ଠ କର୍ମକର୍ତ୍ତାମାନେ ଚେତାବନୀ ଦେଇ କହିଛନ୍ତି ଯେ, କେନ୍ଦ୍ର ସରକାର ଏହି ଦୁର୍ନୀତିର ଚେର ପର୍ଯ୍ୟନ୍ତ ନପହଞ୍ଚି ଏବଂ ଦୋଷୀଙ୍କୁ ସୁରକ୍ଷା ଦେବାକୁ ଚେଷ୍ଟା କରୁଛନ୍ତି। ପରୀକ୍ଷାର୍ଥୀଙ୍କୁ ଯଦି ତୁରନ୍ତ ନ୍ୟାୟ ନମିଳେ, ତେବେ ଆଗାମୀ ଦିନରେ ଏହି ଆନ୍ଦୋଳନ କେବଳ ବ୍ଲକ୍ ବା ଜିଲ୍ଲା ସ୍ତରରେ ସୀମିତ ରହିବ ନାହିଁ। AISF ଏହି ଲଢ଼େଇକୁ ସାରା ରାଜ୍ୟ ତଥା ଦେଶବ୍ୟାପୀ ଏକ ଉଗ୍ର ଗଣ-ଆନ୍ଦୋଳନର ରୂପ ଦେବ ବୋଲି ସ୍ପଷ୍ଟ କରିଛି। ସାଧାରଣ ଜନତା ଓ ଅଭିଭାବକମାନେ ମଧ୍ୟ ଛାତ୍ରଛାତ୍ରୀଙ୍କ ଏହି ନ୍ୟାୟ ଶଙ୍ଖନାଦକୁ ସମର୍ଥନ ଜଣାଇବାକୁ ସଂଘ ଆହ୍ୱାନ ଦେଇଛି। ଏହି ବିକ୍ଷୋଭ ପ୍ରଦର୍ଶନ ପରେ ସ୍ଥାନୀୟ ପ୍ରଶାସନ ଜରିଆରେ ମହାମହିମ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରାଯାଇଛି।
ନରେନ୍ଦ୍ର କ୍ଷିତି ଙ୍କ ରିପୋର୍ଟ୍
