ବଜ୍ରପାତରେ ଦନ୍ତାହାତୀର ମୃତ୍ୟୁ ସନ୍ଦେହ,ଚୂଡ଼ାନ୍ତ ପୋଷ୍ଟମର୍ଟମ ରିପୋର୍ଟକୁ ଅପେକ୍ଷା
ଢେଙ୍କାନାଳ – ଢେଙ୍କାନାଳ ବନଖଣ୍ଡର ହିନ୍ଦୋଳ ରେଞ୍ଜ ଅଧୀନ ବମ୍ପା ଗ୍ରାମ ନିକଟରେ ଆଜି ପ୍ରାୟ ୨୫ରୁ ୩୦ ବର୍ଷ ବୟସର ଏକ ପୂର୍ଣ୍ଣବୟସ୍କ ଦନ୍ତାହାତୀ ମୃତ ଅବସ୍ଥାରେ ଠାବ ହୋଇଛି। ଘଟଣା ସମ୍ପର୍କରେ ସୂଚନା ମିଳିବା ପରେ ବନ ବିଭାଗର ଅଧିକାରୀମାନେ ତୁରନ୍ତ ଘଟଣାସ୍ଥଳରେ ପହଞ୍ଚି ଅଞ୍ଚଳକୁ ସୁରକ୍ଷିତ କରିବା ସହ ନିର୍ଦ୍ଧାରିତ ପ୍ରକ୍ରିୟା ଅନୁଯାୟୀ ତଦନ୍ତ ଆରମ୍ଭ କରିଥିଲେ। ବନ ବିଭାଗର ଅଧିକାରୀମାନଙ୍କ ଉପସ୍ଥିତିରେ ପଶୁ ଚିକିତ୍ସକ ଦଳ ମାନକ କାର୍ଯ୍ୟପଦ୍ଧତି (SOP) ଅନୁସାରେ ହାତୀର ଶବ ବ୍ୟବଚ୍ଛେଦ କରିଥିଲେ। ଘଟଣାସ୍ଥଳ ପରିଦର୍ଶନ ସମୟରେ ବିଦ୍ୟୁତ ବିଭାଗର ଅଧିକାରୀମାନେ ମଧ୍ୟ ଉପସ୍ଥିତ ରହି ବନ ବିଭାଗ ସହ ମିଳିତ ଭାବେ ସ୍ଥଳ ପରୀକ୍ଷା କରିଥିଲେ। ପ୍ରାରମ୍ଭିକ ଘଟଣାସ୍ଥଳ ପରୀକ୍ଷା ଏବଂ ଶବ ବ୍ୟବଚ୍ଛେଦରୁ ମିଳିଥିବା ସୂଚନା ଆଧାରରେ ହାତୀଟିର ମୃତ୍ୟୁ ବଜ୍ରପାତ ଯୋଗୁଁ ଘଟିଥିବା ସନ୍ଦେହ କରାଯାଉଛି। ମିଳିତ ଯାଞ୍ଚ ସମୟରେ ବିଦ୍ୟୁତ ଆଘାତ ଯୋଗୁଁ ମୃତ୍ୟୁ ଘଟିଥିବାର କୌଣସି ପ୍ରାରମ୍ଭିକ ପ୍ରମାଣ, ଯଥା ବିଦ୍ୟୁତ ଲାଇନ୍ କିମ୍ବା ଅନ୍ୟ ବିଦ୍ୟୁତ ଭିତ୍ତିଭୂମି ସହ ସମ୍ପର୍କ ଥିବାର ସଙ୍କେତ,ମିଳିନାହିଁ। ତେବେ ଚୂଡ଼ାନ୍ତ ପୋଷ୍ଟମର୍ଟମ ମତାମତ ଏବଂ ସମସ୍ତ ବୈଷୟିକ ଓ ବିଭାଗୀୟ ତଦନ୍ତ ଶେଷ ହେବା ପରେ ହାତୀଟିର ମୃତ୍ୟୁର ପ୍ରକୃତ କାରଣ ସ୍ପଷ୍ଟ କରାଯିବ ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି।
ପ୍ରହ୍ଲାଦ ମୁଦୁଲି ଙ୍କ ରିପୋର୍ଟ୍
