ସରପଞ୍ଚଙ୍କ ଖାତାକୁ ମନରେଗା ଟଙ୍କା? ଚିଚିଆ ପଞ୍ଚାୟତରେ ଉଠିଲା ପ୍ରଶ୍ନ
କଳାହାଣ୍ଡି ଜିଲ୍ଲା ଗୋଲାମୁଣ୍ଡା ବ୍ଲକ ଅନ୍ତର୍ଗତ ଚିଚିଆ ଗ୍ରାମ ପଞ୍ଚାୟତରେ ମନରେଗା କାର୍ଯ୍ୟକ୍ରମକୁ ନେଇ ଅନିୟମିତତାର ଅଭିଯୋଗ ସାମ୍ନାକୁ ଆସିଛି। ସ୍ଥାନୀୟ ସ୍ତରରେ ଉପଲବ୍ଧ ଅନଲାଇନ୍ ମନରେଗା ପେମେଣ୍ଟ ରେକର୍ଡ ଅନୁଯାୟୀ, ଚିଚିଆ ଗ୍ରାମ ପଞ୍ଚାୟତର ସରପଞ୍ଚ ମଦନ ପଟେଲଙ୍କ ବ୍ୟାଙ୍କ ଖାତାରେ ୦୮ ନଭେମ୍ବର ୨୦୨୩ ତାରିଖରେ ମନରେଗା ଯୋଜନା ଅଧୀନରେ ଟଙ୍କା ଜମା ହୋଇଥିବା ଦର୍ଶାଯାଉଛି। ସେହିପରି ସରପଞ୍ଚଙ୍କ ସ୍ତ୍ରୀ ସଙ୍ଗୀତା ପଟେଲଙ୍କ ଖାତାରେ ମଧ୍ୟ ମନରେଗା ଅର୍ଥ ଜମା ହୋଇଥିବା ଅଭିଯୋଗ ହୋଇଛି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ବିଭିନ୍ନ ପ୍ରଶ୍ନ ଉଠିଛି। ମନରେଗା ଯୋଜନାର ଉଦ୍ଦେଶ୍ୟ ଗ୍ରାମାଞ୍ଚଳର ଯୋଗ୍ୟ ଶ୍ରମିକଙ୍କୁ କାମ ଓ ମଜୁରି ପ୍ରଦାନ କରିବା ହୋଇଥିବାରୁ, ଜନପ୍ରତିନିଧି ଏବଂ ତାଙ୍କ ପରିବାର ସଦସ୍ୟଙ୍କ ଖାତାକୁ ଟଙ୍କା ଯାଇଥିବା ଘଟଣା ନିୟମାନୁସାରେ ହୋଇଛି କି ନାହିଁ, ସେନେଇ ଯାଞ୍ଚର ଆବଶ୍ୟକତା ଅନୁଭବ କରାଯାଉଛି। ଏହି ପ୍ରସଙ୍ଗରେ ଗୋଲାମୁଣ୍ଡା ଗୋଷ୍ଠୀ ଉନ୍ନୟନ ଅଧିକାରୀ ବିଶ୍ୱନାଥ ରାଉତ କହିଛନ୍ତି ଯେ, ସରପଞ୍ଚଙ୍କ ବ୍ୟାଙ୍କ ଖାତାରେ ମନରେଗା ଟଙ୍କା ପଡ଼ିପାରେ, ଯଦି ସମ୍ପୃକ୍ତ ବ୍ୟକ୍ତି ମନରେଗା ନିୟମ ଅନୁଯାୟୀ ଯୋଗ୍ୟ ଶ୍ରମିକ ଭାବେ କାମ କରିଥାନ୍ତି ଏବଂ ଆବଶ୍ୟକ ପ୍ରକ୍ରିୟା ପୂରଣ କରିଥାନ୍ତି। ଅନ୍ୟପକ୍ଷରେ, ସରପଞ୍ଚ ମଦନ ପଟେଲ କହିଛନ୍ତି ଯେ ତାଙ୍କ ବ୍ୟାଙ୍କ ଖାତାରେ ମନରେଗା ଟଙ୍କା ଜମା ହୋଇନାହିଁ। ତେବେ ତାଙ୍କ ପରିବାରର ଜଣେ ସଦସ୍ୟଙ୍କ ଖାତାରେ ମନରେଗା ଅର୍ଥ ଜମା ହୋଇଥିବା କଥା ସେ ସ୍ୱୀକାର କରିଛନ୍ତି। ଉଲ୍ଲେଖନୀୟ ଯେ, ସରପଞ୍ଚଙ୍କ ଦାବି ସତ୍ତ୍ୱେ ଉପଲବ୍ଧ ଅନଲାଇନ୍ ମନରେଗା ପେମେଣ୍ଟ ରେକର୍ଡରେ ତାଙ୍କ ବ୍ୟାଙ୍କ ଖାତାକୁ ଟଙ୍କା ପ୍ରଦାନ ହୋଇଥିବା ଦର୍ଶାଯାଉଛି। ଏହି ବିରୋଧାଭାସର ପ୍ରକୃତ କାରଣ ସମ୍ପୃକ୍ତ ସରକାରୀ ଦଲିଲ ଓ ରେକର୍ଡର ଯାଞ୍ଚ ପରେ ହିଁ ସ୍ପଷ୍ଟ ହୋଇପାରିବ। ସ୍ଥାନୀୟ ବାସିନ୍ଦାମାନେ ଜିଲ୍ଲା ପ୍ରଶାସନ, ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା ଏବଂ ସମ୍ପୃକ୍ତ ବିଭାଗକୁ ଘଟଣାର ନିରପେକ୍ଷ ତଦନ୍ତ କରିବା ସହ ମଷ୍ଟର ରୋଲ, ଜବ୍ କାର୍ଡ, ପେମେଣ୍ଟ ରେକର୍ଡ ଓ ଦେୟ ସମ୍ବନ୍ଧୀୟ ସମସ୍ତ ତଥ୍ୟ ସାର୍ବଜନୀନ କରିବାକୁ ଦାବି କରିଛନ୍ତି।
ଦାମୋଦର ଦାସ ଙ୍କ ରିପୋର୍ଟ୍
