କିରୋସିନି ଢାଳି ଆତ୍ମହତ୍ୟା ଉଦ୍ୟମ କରିଥିବା ଯୁବତୀର ମୃତ୍ୟୁ
ରାଉରକେଲା ୨୦/୮, ରାଉରକେଲାର ଝିରିପାଣି ଅଞ୍ଚଳରେ ପ୍ରେମିକଙ୍କ ଘର ବାହାରେ ଦେହରେ କିରୋସିନ୍ ଢାଳି ନିଆଁ ଲଗାଇ ଆତ୍ମହତ୍ୟା ଉଦ୍ୟମ କରିଥିବା ଜଣେ ଯୁବତୀ ବୁଧବାର ଦିନ ଇସ୍ପାତ ଜେନେରାଲ୍ ହସ୍ପିଟାଲ (ଆଇଜିଏଚ୍)ରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଛନ୍ତି। ଅଗଷ୍ଟ ୧୪ ତାରିଖ ଦିନ ଏହି ଘଟଣାଟି ଘଟିଥିଲା ଝିରପାଣି ଅଞ୍ଚଳରେ। ପୋଲିସ ପକ୍ଷରୁ ଏହି ଘଟଣାର ତଦନ୍ତ ଆରମ୍ଭ କରାଯାଇଛି।
ସୂଚନା ଅନୁସାରେ, ରାଉରକେଲା ସେକ୍ଟର-୧ର ଏକ ବସ୍ତିରେ ରହୁଥିବା ପ୍ରଭାସିନୀ ଗତ ଦୁଇ ବର୍ଷ ଧରି ଝିରିପାଣି ଅଞ୍ଚଳରେ ରହୁଥିବା ବିକି ଦାସଙ୍କ ସହିତ ପ୍ରେମ ସମ୍ପର୍କ ଥିଲା। ବିକି ତାଙ୍କୁ ବିବାହର ପ୍ରତିଶ୍ରୁତି ଦେଇ ସମ୍ପର୍କ ବଜାୟ ରଖିଥିଲେ ବୋଲି ଅଭିଯୋଗ ହୋଇଛି। ବିକି ତାଙ୍କଠାରୁ କିଛି ସୁନା ଅଳଙ୍କାର ନେଇଥିବା ମଧ୍ୟ ଅଭିଯୋଗ ହୋଇଛି।
ପରେ ବିକି ପ୍ରଭାସିନୀଙ୍କୁ ବିବାହ କରିବାକୁ ମନା କରିଦେଇଥିଲେ। ଅଗଷ୍ଟ ୧୪ ତାରିଖ ଦିନ ପ୍ରଭାସିନୀ ଟଙ୍କା ଦାବି କରିବାକୁ ଝିରିପାଣିସ୍ଥିତ ବିକିଙ୍କ ଘରକୁ ଯାଇଥିଲେ। ଉଭୟଙ୍କ ମଧ୍ୟରେ ଯୁକ୍ତିତର୍କ ହେବା ପରେ ପ୍ରଭାସିନୀ ନିଜ ଉପରେ କିରୋସିନି ଢାଳି ନିଆଁ ଲଗାଇ ଦେଇଥିବା ଅଭିଯୋଗ ହୋଇଛି।
ସୂଚନା ଅନୁସାରେ ଭିକି ପ୍ରଭାସିନୀଙ୍କୁ ଗୁରୁତର ଅବସ୍ଥାରେ ରାଉରକେଲା ସରକାରୀ ଡାକ୍ତରଖାନାକୁ ନେଇ ଯାଇଥିଲେ। ତାଙ୍କ ପରିବାର ସଦସ୍ୟଙ୍କୁ ଖବର ଦେବା ପରେ ଘଟଣାସ୍ଥଳରୁ ପଳାଇ ଯାଇଥିଲେ। ଖବର ପାଇ, ପ୍ରଭାସିନୀଙ୍କ ପରିବାର ସଦସ୍ୟମାନେ ଡାକ୍ତରଖାନାରେ ପହଞ୍ଚି ତାଙ୍କୁ ଅଧିକ ଚିକିତ୍ସା ପାଇଁ ରାଉରକେଲା ସରକାରୀ ଡାକ୍ତରଖାନାରୁ ଇସ୍ପାତ ଜେନେରାଲ୍ ହସ୍ପିଟାଲ (ଆଇଜିଏଚ୍)କୁ ସ୍ଥାନାନ୍ତର କରିଥିଲେ।
ଆଇଜିଏଚର ବର୍ଣ୍ଣ ଓ୍ବାର୍ଡରେ ଚିକିତ୍ସା ସତ୍ତ୍ୱେ, ବୁଧବାର ଦିନ ପ୍ରଭାସିନୀଙ୍କ ମୃତ୍ୟୁ ଘଟିଥିଲା। ଭିକି ଫେରାର୍ ଥିବା ଜଣାପଡ଼ିଛି। ଘଟଣାର ପାରିପାର୍ଶ୍ୱିକ ପରିସ୍ଥିତି ସମ୍ପର୍କରେ ପୋଲିସ ପକ୍ଷରୁ ତଦନ୍ତ ଜାରି ରହିଛି।
କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
