ଘାଟବାସୁଳୀ ଗ୍ରାମରେ ବର୍ଷାଜନିତ ପରିସ୍ଥିତିର ସ୍ଥିତି ସମୀକ୍ଷା କଲେ ଜିଲ୍ଲାପାଳ
ଗ୍ରାମବାସୀଙ୍କ ସମସ୍ୟା ଶୁଣି ତ୍ୱରିତ ପଦକ୍ଷେପ ପାଇଁ ଅଧିକାରୀଙ୍କୁ ନିର୍ଦ୍ଦେଶ
ନବରଙ୍ଗପୁର:(ତା. ୨୫.୦୮.୨୦୨୬)(ରବି ନାରାୟଣ ମହାନ୍ତି)ନବରଙ୍ଗପୁର ଜିଲ୍ଲାରେ ଗତ କିଛି ଦିନ ଧରି ହେଉଥିବା ପ୍ରବଳ ବର୍ଷା ଯୋଗୁଁ ଉପୁଜିଥିବା ପରିସ୍ଥିତି ଓ ଜନସାଧାରଣଙ୍କ ସୁରକ୍ଷା ବ୍ୟବସ୍ଥାର ସ୍ଥିତି ସମୀକ୍ଷା କରିବା ପାଇଁ ଜିଲ୍ଲାପାଳ ତଥା ଜିଲ୍ଲା ମାଜିଷ୍ଟ୍ରେଟ୍ ଡ. ମହେଶ୍ୱର ସ୍ୱାଇଁ ଆଜି କୋଷାଗୁମୁଡ଼ା ବ୍ଲକ୍ ଅନ୍ତର୍ଗତ ଉକିଆପାଲ୍ଲୀ ଗ୍ରାମପଞ୍ଚାୟତର ଘାଟବାସୁଳୀ ଗ୍ରାମ ପରିଦର୍ଶନ କରି ସ୍ଥିତି ଅନୁଧ୍ୟାନ କରିଛନ୍ତି।ପ୍ରବଳ ବର୍ଷା ଯୋଗୁଁ ଗତକାଲି ରାତିରୁ ଘାଟବାସୁଳୀ ଗ୍ରାମର ବରଗାଁ ସହିତ ଯୋଗାଯୋଗ ସାମୟିକ ଭାବେ ବିଚ୍ଛିନ୍ନ ହୋଇଥିଲା। ଇନ୍ଦ୍ରାବତୀ ଓ ଭାସ୍କେଲ ନଦୀର ସଙ୍ଗମସ୍ଥଳ ନିକଟସ୍ଥ ଏକ ସମ୍ବେଦନଶୀଳ ସ୍ଥାନରେ ବର୍ଷାଜଳ ଜମିବା ଓ ଜଳସ୍ତର ବୃଦ୍ଧି ପାଇବା ଫଳରେ ଗ୍ରାମବାସୀଙ୍କ ଯାତାୟାତ ଏବଂ ମୁଖ୍ୟ ରାସ୍ତା ସହିତ ଯୋଗାଯୋଗ ପ୍ରଭାବିତ ହୋଇଥିଲା।ଜିଲ୍ଲାପାଳ ଘାଟବାସୁଳୀରେ ପହଞ୍ଚି କୋଷାଗୁମୁଡ଼ା ବିଡିଓ ଏବଂ କୋଡ଼ିଙ୍ଗା ତହସିଲଦାରଙ୍କ ସହ ପରିସ୍ଥିତି ସମ୍ପର୍କରେ ଆଲୋଚନା କରିଥିଲେ। ବର୍ଷାଜନିତ ବିପର୍ଯ୍ୟୟରେ କ୍ଷତିଗ୍ରସ୍ତ ଘରଗୁଡ଼ିକର ପରିବାରକୁ ଆବଶ୍ୟକତା ଅନୁଯାୟୀ ସୁରକ୍ଷିତ ସ୍ଥାନକୁ ସ୍ଥାନାନ୍ତର, ପ୍ରଶାସନ ପକ୍ଷରୁ ଗ୍ରହଣ କରାଯାଇଥିବା ତୁରନ୍ତ ପଦକ୍ଷେପ ଏବଂ ପ୍ରଭାବିତ ପରିବାରଗୁଡ଼ିକର ସ୍ୱାସ୍ଥ୍ୟ ଓ ସୁରକ୍ଷା ସମ୍ପର୍କରେ ସେ ତଥ୍ୟ ନେଇଥିଲେ।ଜିଲ୍ଲାପାଳ ଗ୍ରାମବାସୀଙ୍କ ସହ ଗ୍ରାମର ବିଭିନ୍ନ ଅଞ୍ଚଳ ବୁଲି ସ୍ଥିତି ଅନୁଧ୍ୟାନ କରିବା ସହ ରହିଥିବା ସିସି ରାସ୍ତା, ନବନିର୍ମିତ ଅଙ୍ଗନବାଡ଼ି କେନ୍ଦ୍ର, ବର୍ଷାରେ କ୍ଷତିଗ୍ରସ୍ତ ଘର ଓ ଅନ୍ୟାନ୍ୟ ଜନସାଧାରଣଙ୍କ ସୁବିଧା ସମ୍ପର୍କିତ ଭିତ୍ତିଭୂମି ପରିଦର୍ଶନ କରିଥିଲେ। ସେ ଗ୍ରାମବାସୀଙ୍କ ସହ ସିଧାସଳଖ ଆଲୋଚନା କରି ଗର୍ଭବତୀ ମହିଳାଙ୍କ ସ୍ଥିତି, ଗୃହପାଳିତ ପଶୁ ଓ ଗୋରୁ-ଛେଳିଙ୍କ ସୁରକ୍ଷା ଏବଂ ପ୍ରବଳ ବର୍ଷା ଯୋଗୁଁ କୃଷକମାନଙ୍କ ଚାଷଜମି ଓ ଫସଲରେ ହୋଇଥିବା କ୍ଷୟକ୍ଷତି ସମ୍ପର୍କରେ ପଚାରି ବୁଝିଥିଲେ।ମୌଳିକ ସୁବିଧା ଓ ଜନକଲ୍ୟାଣ ପାଇଁ ଗୁରୁତ୍ୱାରୋପ ଗ୍ରାମର କାଦୁଅ ଓ କଚ୍ଚା ରାସ୍ତାଗୁଡ଼ିକୁ ପର୍ଯ୍ୟାୟକ୍ରମେ କଂକ୍ରିଟ୍ ରାସ୍ତାରେ ପରିଣତ କରି ଗମନାଗମନ ବ୍ୟବସ୍ଥା ସୁଦୃଢ଼ କରିବା ପାଇଁ ଜିଲ୍ଲାପାଳ କୋଷାଗୁମୁଡ଼ା ବିଡିଓଙ୍କୁ ନିର୍ଦ୍ଦେଶ ଦେଇଥିଲେ। ବର୍ଷା ଓ ପ୍ରତିକୂଳ ପାଣିପାଗ ସମୟରେ ଗୋରୁ ଓ ଅନ୍ୟାନ୍ୟ ଗୃହପାଳିତ ପଶୁଙ୍କୁ ସୁରକ୍ଷିତ ରଖିବା ପାଇଁ ଆବଶ୍ୟକ ସଂଖ୍ୟକ ବ୍ୟକ୍ତିଗତ ଓ ସାମୁଦାୟିକ ଗୋଶାଳା ନିର୍ମାଣ ପାଇଁ ମଧ୍ୟ ସେ ପରାମର୍ଶ ଦେଇଥିଲେ।ଗ୍ରାମରେ ଥିବା ସମସ୍ତ କଚ୍ଚା ଓ ମାଟିଘରର ସର୍ଭେ କରି ଯୋଗ୍ୟ ପରିବାରଗୁଡ଼ିକୁ ଚିହ୍ନଟ କରି ଆଣ୍ଟ୍ୟୋଦୟ ହାଉସ୍ ସର୍ଭେରେ ସାମିଲ କରିବା ପାଇଁ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ। ବର୍ଷାରେ ଘର କ୍ଷତିଗ୍ରସ୍ତ ହୋଇଥିବା ଏବଂ ଅସୁରକ୍ଷିତ ଅବସ୍ଥାରେ ଥିବା ପରିବାରଙ୍କୁ ଆବଶ୍ୟକତା ଅନୁଯାୟୀ ନିକଟସ୍ଥ ବିଦ୍ୟାଳୟ କିମ୍ବା ପଞ୍ଚାୟତ କାର୍ଯ୍ୟାଳୟକୁ ସ୍ଥାନାନ୍ତର କରିବା ସହ ସେମାନଙ୍କ ସୁରକ୍ଷା ସୁନିଶ୍ଚିତ କରିବାକୁ କୁହାଯାଇଥିଲା।କ୍ଷତିଗ୍ରସ୍ତ ଓ ଆବଶ୍ୟକତା ଥିବା ପରିବାରମାନଙ୍କୁ ପର୍ଯ୍ୟାପ୍ତ ସଂଖ୍ୟକ ତାରପୋଲିନ୍ ବଣ୍ଟନ କରିବା ପାଇଁ କୋଡ଼ିଙ୍ଗା ତହସିଲଦାରଙ୍କୁ ନିର୍ଦ୍ଦେଶ ଦିଆଯାଇଥିଲା। ଏଥିସହ ପୁରୁଣା ଗ୍ରାମ ପୋଖରୀର ପୁନରୁଦ୍ଧାର ଓ ନବୀକରଣ କରି ଏହାକୁ ଗ୍ରାମବାସୀ ଏବଂ ଗୃହପାଳିତ ପଶୁଙ୍କ ଉପଯୋଗ ପାଇଁ ସୁବ୍ୟବସ୍ଥିତ କରିବାକୁ ନିର୍ଦ୍ଦେଶ ଦିଆଯାଇଥିଲା। ସମ୍ଭାବ୍ୟତା ଓ ପ୍ରଚଳିତ ବ୍ୟବସ୍ଥା ଅନୁଯାୟୀ ପୁରୁଣା ସ୍ଥାନରେ ଆଲେଖ ମହିମା ସମ୍ପ୍ରଦାୟ ଗୃହ ନିର୍ମାଣ ପାଇଁ ମଧ୍ୟ ବିଡିଓଙ୍କୁ ଆବଶ୍ୟକ ପଦକ୍ଷେପ ନେବାକୁ କୁହାଯାଇଥିଲା।ସ୍ଥାନୀୟ କୃଷିଜାତ ଉତ୍ପାଦକୁ ବଜାର ସଂଯୋଗ ଉପରେ ଗୁରୁତ୍ୱ ପରିଦର୍ଶନ ସମୟରେ ଜିଲ୍ଲାପାଳ ଜଣେ ଆଦିବାସୀ ମହିଳାଙ୍କୁ ସ୍ଥାନୀୟ ଭାବେ ଉତ୍ପାଦିତ ବାଇଗଣ, ମୁନଗା ଶାଗ ଓ ଭେଣ୍ଡି ବିକ୍ରି କରୁଥିବା ଦେଖି ତାଙ୍କ ସହ ଆଲୋଚନା କରିଥିଲେ। ସେ ମହିଳାଙ୍କଠାରୁ କିଛି ପରିବା ବିକ୍ରୟ କରିବା ସହ ସ୍ଥାନୀୟ କୃଷିଜାତ ଉତ୍ପାଦର ପ୍ରଚାର ଓ ବଜାର ସୁବିଧା ବୃଦ୍ଧି ଉପରେ ଗୁରୁତ୍ୱାରୋପ କରିଥିଲେ।ସ୍ଥାନୀୟ କୃଷକ ଓ ଆଦିବାସୀ ପରିବାରଗୁଡ଼ିକ ଯେପରି ସେମାନଙ୍କ ଉତ୍ପାଦର ଉଚିତ ମୂଲ୍ୟ ପାଇପାରିବେ, ସେଥିପାଇଁ କୋଷାଗୁମୁଡ଼ା ସ୍ଥାନୀୟ ହାଟ ସହିତ ଉତ୍ପାଦକମାନଙ୍କୁ ଯୋଡ଼ିବା ଏବଂ ଆବଶ୍ୟକ ବଜାର ସଂଯୋଗ ସୁବିଧା ଯୋଗାଇବାକୁ ବିଡିଓଙ୍କୁ ନିର୍ଦ୍ଦେଶ ଦେଇଥିଲେ।ଦିବ୍ୟାଙ୍ଗ ବ୍ୟକ୍ତିଙ୍କୁ ତୁରନ୍ତ ସହାୟତା ପାଇଁ ନିର୍ଦ୍ଦେଶ ଗ୍ରାମବାସୀଙ୍କ ସହ ଆଲୋଚନା ସମୟରେ ଜଣେ ଦିବ୍ୟାଙ୍ଗ ବ୍ୟକ୍ତି ଟ୍ରାଇସାଇକେଲ୍ ପାଇଁ ଜିଲ୍ଲାପାଳଙ୍କ ନିକଟରେ ଅନୁରୋଧ କରିଥିଲେ। ଏହାକୁ ଗୁରୁତ୍ୱର ସହ ନେଇ ଯୋଗ୍ୟତା ଅନୁଯାୟୀ ସମ୍ପୃକ୍ତ ସାମାଜିକ ସୁରକ୍ଷା/କଲ୍ୟାଣକାରୀ ଯୋଜନା ଅଧୀନରେ ଟ୍ରାଇସାଇକେଲ୍ ଯୋଗାଇବା ପାଇଁ ତୁରନ୍ତ ଆବଶ୍ୟକ ପଦକ୍ଷେପ ନେବାକୁ ଜିଲ୍ଲାପାଳ ବିଡିଓଙ୍କୁ ନିର୍ଦ୍ଦେଶ ଦେଇଥିଲେ।ମହିଳାଙ୍କ ସମସ୍ୟା ଶୁଣିଲେ ଜିଲ୍ଲାପାଳ ଘାଟବାସୁଳୀ ଗ୍ରାମ ପ୍ରବେଶ ପଥ ନିକଟରେ ଜିଲ୍ଲାପାଳ ମହିଳା ଗ୍ରାମବାସୀଙ୍କ ସହ ଆଲୋଚନା କରି ସେମାନଙ୍କ ବିଭିନ୍ନ ଦାବି ଓ ସମସ୍ୟା ଶୁଣିଥିଲେ। ବିଶେଷକରି ନାଗରନାର ଦିଗକୁ ସେତୁ ନିର୍ମାଣ ଏବଂ ପ୍ରବଳ ବର୍ଷା ସମୟରେ ଅସୁରକ୍ଷିତ ହେଉଥିବା ବରଗାଁ-ଘାଟବାସୁଳୀ ଆର୍ଡି ରାସ୍ତାର ଉଚ୍ଚତା ବୃଦ୍ଧି ପାଇଁ ସେମାନେ ଦାବି ଜଣାଇଥିଲେ।ଜିଲ୍ଲାପାଳ ଗ୍ରାମବାସୀଙ୍କ ଆବେଦନ ଗ୍ରହଣ କରି ଦାବିଗୁଡ଼ିକର ଯଥାର୍ଥତା ଓ ସମ୍ଭାବ୍ୟତା ଅନୁଧ୍ୟାନ କରାଯାଇ ଉପଯୁକ୍ତ ପ୍ରକଳ୍ପ ଗ୍ରହଣ ପାଇଁ ପଦକ୍ଷେପ ନିଆଯିବ ବୋଲି ଆଶ୍ୱାସନ ଦେଇଥିଲେ। ସେହିପରି ପୂର୍ବରୁ ମଞ୍ଜୁର ହୋଇଥିବା ପିଏମ୍ଏୱାଇ ଓ ଏଜିୱାଇ ଆବାସଗୁଡ଼ିକର ନିର୍ମାଣ କାର୍ଯ୍ୟ ସମୟୋପଯୋଗୀ ଭାବେ ସମାପ୍ତ କରିବାକୁ ହିତାଧିକାରୀମାନଙ୍କୁ ପରାମର୍ଶ ଦେଇଥିଲେ। ଆଗାମୀ ଦିନରେ ଯୋଗ୍ୟ ଓ ପ୍ରକୃତ ହିତାଧିକାରୀମାନେ ପିଏମ୍ଏୱାଇ ଆବାସ ଯୋଜନାରୁ ବଞ୍ଚିତ ନ ହେବା ପାଇଁ ବିଡିଓ ଓ ପିଇଓମାନଙ୍କୁ ମଧ୍ୟ ନିର୍ଦ୍ଦେଶ ଦେଇଥିଲେ।ଅଙ୍ଗନବାଡ଼ି କେନ୍ଦ୍ର ଓ ବିଦ୍ୟାଳୟ ପରିଦର୍ଶନ ପରବର୍ତ୍ତୀ ସମୟରେ ଜିଲ୍ଲାପାଳ ଅଙ୍ଗନବାଡ଼ି କେନ୍ଦ୍ର ଓ ଘରସୁଲୁ ପ୍ରାଥମିକ ବିଦ୍ୟାଳୟ ପରିଦର୍ଶନ କରିଥିଲେ। ସେଠାରେ ଅଙ୍ଗନବାଡ଼ି କର୍ମୀ ଓ ଆଶା କର୍ମୀଙ୍କ ସହ ଆଲୋଚନା କରି ପ୍ରବଳ ବର୍ଷା ସମୟରେ ସ୍ଥାନୀୟ ଲୋକଙ୍କୁ ସେମାନେ ଯୋଗାଇଥିବା ସହଯୋଗ ଓ ସେବା ସମ୍ପର୍କରେ ପଚାରି ବୁଝିଥିଲେ।ଅଙ୍ଗନବାଡ଼ି କେନ୍ଦ୍ର ମାଧ୍ୟମରେ ଯୋଗାଇ ଦିଆଯାଉଥିବା ଖାଦ୍ୟର ଉପଲବ୍ଧତା ଓ ଗୁଣବତ୍ତା ସମୀକ୍ଷା କରି ଗର୍ଭବତୀ ମହିଳା ଓ କିଶୋରୀମାନଙ୍କୁ ସମୟୋପଯୋଗୀ ଭାବେ ଉତ୍ତମମାନର ପୌଷ୍ଟିକ ଖାଦ୍ୟ ଯୋଗାଇ ଦେବାକୁ ଜିଲ୍ଲାପାଳ ଗୁରୁତ୍ୱାରୋପ କରିଥିଲେ।
ଫେରିବା ସମୟରେ ଗ୍ରାମବାସୀମାନେ ନିୟମିତ ମେଗା ପାଇପ୍ ଜଳ ଯୋଗାଣ ପାଇଁ ଜିଲ୍ଲାପାଳଙ୍କୁ ଅନୁରୋଧ କରିଥିଲେ। ଗ୍ରାମବାସୀଙ୍କୁ ନିୟମିତ ପାନୀୟଜଳ ଯୋଗାଣ ସୁନିଶ୍ଚିତ କରିବା ଦିଗରେ ତୁରନ୍ତ ଆବଶ୍ୟକ ପଦକ୍ଷେପ ନେବାକୁ ସେ କୋଷାଗୁମୁଡ଼ା ବିଡିଓଙ୍କୁ ନିର୍ଦ୍ଦେଶ ଦେଇଥିଲେ।କୋଷାଗୁମୁଡ଼ା ବ୍ଲକ୍ କାର୍ଯ୍ୟାଳୟରେ ସମୀକ୍ଷା ବୈଠକ ଘାଟବାସୁଳୀ ଗ୍ରାମ ପରିଦର୍ଶନ ଶେଷ କରି ଜିଲ୍ଲାପାଳ କୋଷାଗୁମୁଡ଼ା ବ୍ଲକ୍ କାର୍ଯ୍ୟାଳୟର ସମ୍ମିଳନୀ କକ୍ଷରେ ପହଞ୍ଚିଥିଲେ। ସେଠାରେ ବ୍ଲକ୍ ଓ ବିଭିନ୍ନ ଲାଇନ୍ ବିଭାଗର ଅଧିକାରୀ, ପିଇଓ, ଏସିଡିଇଓ ଏବଂ ତୃଣମୂଳସ୍ତରୀୟ କର୍ମଚାରୀଙ୍କୁ ନେଇ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା।ପ୍ରବଳ ବର୍ଷା ସମୟରେ ବ୍ଲକ୍ ଓ ତହସିଲ୍ ପ୍ରଶାସନ ପକ୍ଷରୁ ତ୍ୱରିତ ପଦକ୍ଷେପ ଗ୍ରହଣ କରାଯାଇଥିବାରୁ ଜିଲ୍ଲାପାଳ ସମସ୍ତ ଅଧିକାରୀ ଓ କର୍ମଚାରୀଙ୍କୁ ପ୍ରଶଂସା କରିଥିଲେ। ପ୍ରଭାବିତ ଗ୍ରାମବାସୀଙ୍କ ସୁରକ୍ଷା ଓ କଲ୍ୟାଣ ପାଇଁ ବିଭିନ୍ନ ବିଭାଗ ମଧ୍ୟରେ ରହିଥିବା ସମନ୍ୱୟମୂଳକ ପଦକ୍ଷେପକୁ ସେ ସ୍ୱାଗତ କରିଥିଲେ।ବର୍ଷା ଓ ପ୍ରତିକୂଳ ପାଣିପାଗ ସମୟରେ କାର୍ଯ୍ୟ ସମ୍ପାଦନ କରିବା ବେଳେ ଅଧିକାରୀ ଓ କର୍ମଚାରୀମାନେ ସାମ୍ନା କରୁଥିବା ସମସ୍ୟା ଏବଂ ବ୍ୟବହାରିକ ଚ୍ୟାଲେଞ୍ଜ ସମ୍ପର୍କରେ ଜିଲ୍ଲାପାଳ ଆଲୋଚନା କରିଥିଲେ। ଭବିଷ୍ୟତରେ ଏଭଳି ପରିସ୍ଥିତିରେ ସମସ୍ତେ ସତର୍କ ରହିବା ସହ ପରସ୍ପର ମଧ୍ୟରେ ଘନିଷ୍ଠ ସମନ୍ୱୟ ରକ୍ଷା କରି ଅସୁରକ୍ଷିତ ଓ ପ୍ରଭାବିତ ପରିବାରଙ୍କ ନିକଟରେ ତୁରନ୍ତ ସହାୟତା ପହଞ୍ଚାଇବାକୁ ସେ ପରାମର୍ଶ ଦେଇଥିଲେ।ବୈଠକରେ ନବରଙ୍ଗପୁରର ମାନ୍ୟବର ବିଧାୟକ ତଥା ଜିଲ୍ଲା ଯୋଜନା ବୋର୍ଡ ଅଧକ୍ଷ ଶ୍ରୀ ଗୌରୀଶଙ୍କର ମାଝୀ, କୋଷାଗୁମୁଡ଼ା ଉପାଧ୍ୟକ୍ଷ ଶ୍ରୀ ଯୋଗେନ୍ଦ୍ର ସ୍ୱାଇଁ, କୋଷାଗୁମୁଡ଼ା ବିଡିଓ ଶ୍ରୀ ଆଶିଷ ତ୍ରିପାଠୀ, କୋଡ଼ିଙ୍ଗା ତହସିଲଦାର ଶ୍ରୀ ତୁଳାରାମ ମୁଦୁଲିଙ୍କ ସମେତ ବିଭିନ୍ନ ପିଇଓ, ଏସିଡିଇଓ ଏବଂ ବ୍ଲକ୍ ଓ ବିଭିନ୍ନ ଲାଇନ୍ ବିଭାଗର ଅଧିକାରୀ ଓ କର୍ମଚାରୀ ଉପସ୍ଥିତ ଥିଲେ।
ଜନସୁରକ୍ଷା ଓ ତ୍ୱରିତ ପଦକ୍ଷେପକୁ ପ୍ରାଥମିକତା ଜିଲ୍ଲାପାଳଙ୍କ ଏହି କ୍ଷେତ୍ର ପରିଦର୍ଶନ ଦ୍ୱାରା ଘାଟବାସୁଳୀ ଗ୍ରାମର ବାସ୍ତବ ସ୍ଥିତି, ଦୁର୍ବଳ ଓ ବିପଦପ୍ରବଣ ପରିବାର, ମୌଳିକ ସୁବିଧା, ଯୋଗାଯୋଗ ବ୍ୟବସ୍ଥା, ପାନୀୟଜଳ, ଜୀବିକା, ଗୃହପାଳିତ ପଶୁଙ୍କ ସୁରକ୍ଷା ଏବଂ ସରକାରୀ କଲ୍ୟାଣମୂଳକ ସହାୟତା ସମ୍ପର୍କରେ ସିଧାସଳଖ ଅନୁଧ୍ୟାନ କରାଯାଇଥିଲା।ଜିଲ୍ଲାପାଳ ଦେଇଥିବା ନିର୍ଦ୍ଦେଶଗୁଡ଼ିକର ତ୍ୱରିତ ଅନୁପାଳନ କରିବା ସହ ରାସ୍ତା ଓ ଯୋଗାଯୋଗ ବ୍ୟବସ୍ଥାର ସୁଦୃଢ଼ୀକରଣ, ଆବାସ, ପାନୀୟଜଳ, ସ୍ଥାନୀୟ କୃଷିଜାତ ଉତ୍ପାଦର ବଜାର ସଂଯୋଗ, ପଶୁ ସୁରକ୍ଷା, ବିପର୍ଯ୍ୟୟ ପ୍ରସ୍ତୁତି ଓ ଦୁର୍ବଳ ବର୍ଗଙ୍କୁ କଲ୍ୟାଣମୂଳକ ସହାୟତା ଯୋଗାଇବା ଦିଗରେ ପ୍ରାଥମିକତା ଭିତ୍ତିରେ ପଦକ୍ଷେପ ନେବାକୁ ବ୍ଲକ୍ ଓ ତହସିଲ୍ ପ୍ରଶାସନକୁ କୁହାଯାଇଛି।ଜିଲ୍ଲାପାଳ ସମସ୍ତ ଅଧିକାରୀ, କର୍ମଚାରୀ ଓ କ୍ଷେତ୍ରସ୍ତରୀୟ କର୍ମୀମାନଙ୍କୁ ସେମାନଙ୍କ ସକ୍ରିୟ ସହଯୋଗ, ସମନ୍ୱୟ ଓ ନିଷ୍ଠାପୂର୍ଣ୍ଣ କାର୍ଯ୍ୟ ପାଇଁ ଧନ୍ୟବାଦ ଜଣାଇଥିଲେ।
ନବରଙ୍ଗପୁର ଜିଲ୍ଲାରୁ ରବି ନାରାୟଣ ମହାନ୍ତିଙ୍କ ରିପୋର୍ଟ ମସିହା ନିଉଜ୍
