ମ.ରାମପୁର,୧୯/୫( ମସୀହା) : ୨୦୨୨ ମସିହା ଫେବୃୟାରୀ ପାଞ୍ଚ ତାରିଖର ମାଓ ବାଦୀଙ୍କ ଲ୍ୟାଣ୍ଡ ମାଇନ୍ ବିସ୍ଫୋରଣ ଘଟଣା ଦୃଶ୍ୟ ମନେ ପଡ଼ିଲେ ଆଜି ବି ଶିହରୀ ଉଠେ ଛାତି l ଖବର ସଂଗ୍ରହ କରିବାକୁ ଯାଇ ନିଜେ ଖବର ପାଲଟି ଯାଇଥିଲେ ମୋହନଗିରି ର ସାମ୍ବାଦିକ ରୋହିତ ବିଶ୍ୱାଳ । ଗତ ଫେବୃଆରୀ ୫ ତାରିଖ ଦିନ ମାଓ ସଂଗଠନ ତରଫରୁ ଦୁଲେନ୍ ନିକଟରେ ମାଓ ପୋଷ୍ଟର ଲାଗିଥିଲା l ଏହାର ସୂଚନା ପାଇ ସାମ୍ବାଦିକ ରୋହିତ ବିଶ୍ଵାଳ ଖବର ସଂଗ୍ରହ ପାଇଁ ତୁରନ୍ତ ଉକ୍ତ ସ୍ଥାନ ରେ ପହଞ୍ଚି ଯାଇଥିଲେ ଏବଂ ମାଓ ବାଦୀଙ୍କ ଦ୍ଵାରା ଖଞ୍ଜା ଯାଇଥିବା ଲ୍ୟାଣ୍ଡ ମାଇନର ଶିକାର ହେଲେ । 
ଘଟଣା ସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା l ତେବେ ଏହି ଘଟଣାକୁ ନେଇ ମାଓ ସଂଗଠନ ଦୀର୍ଘ ତିନିମାସ ପରେ ଅଂଚଳବାସୀ ତଥା ପରିବାର ବର୍ଗଙ୍କ ପାଖରେ କ୍ଷମା ମାଗିଛନ୍ତି l ଗତକାଲି କନ୍ଧମାଳ ଜିଲ୍ଲା ଲଣ୍ଡାଗାଁ ଅଞ୍ଚଳରେ ଲାଗିଥିବା ହାତଲେଖା ପୋଷ୍ଟରରେ ଲେଖାଅଛି ଯେ,ଗତ ଫେବୃୟାରୀ ମାସରେ ଆମ ପିଏଲଜିଏ ଦ୍ୱାରା ପୋଲିସକୁ ଟାର୍ଗେଟ କରି ଆଇଇଡି ଵିଛା ଯାଇଥିଲା । କିନ୍ତୁ ପୁଲିସ ବଦଳେ ସାମ୍ବାଦିକ ରୋହିତ ବିଶ୍ୱାଳଙ୍କ ମୃତ୍ୟୁ ହୋଇଥିଲା l ଏହି ଦୁଃଖଦ ଘଟଣାପାଇଁ ଆମେ ଜନତା ଏବଂ ମୃତ ପରିବାରଙ୍କ ଠାରୁ କ୍ଷମା ମାଗୁଛୁ l ସାମ୍ବାଦିକ ରୋହିତ ବିଶ୍ୱାଳଙ୍କ ମୃତ୍ୟୁ ପାଇଁ ପୋଲିସ ଦାୟୀ ଅଟେ ବୋଲି ଭାକପା (ମାଓବାଦୀ) ସଂଗଠନ ଉଲ୍ଲେଖ କରିଛି । ତେବେ ଘଟଣାକୁ ତିନିମାସରୁ ଅଧିକ ସମୟପରେ ମାଓ ସଂଗଠନର କ୍ଷମା ପ୍ରାର୍ଥନା ପରେ ପୁଣି ଥରେ ସାମ୍ବାଦିକ ରୋହିତ ବିଶ୍ୱାଳଙ୍କ ବିୟୋଗର ସ୍ମୃତିକୁ ତାଜା କରିଛି । ଆଶ୍ଵାସନାର ବିଷୟ ଯେ ସରକାର ଘୋଷଣା କରିଥିବା ଅନୁକମ୍ପା ରାଶି ମୃତକଙ୍କ ପରିବାର ପାଇସାରିଛନ୍ତି l ଏଠାରେ ସୂଚନା ଥାଉକି, ସ୍ବର୍ଗତ ରୋହିତ ବିଶ୍ଵାଳଙ୍କ ପରିବାର ଦୁଇଜଣ ନାବାଳକ ପୁଅ ଓ ଝିଅ, ବିଧବା ପତ୍ନୀ,ବୃଦ୍ଧା ମାଆ ସମେତ ପରିବାର ବର୍ଗ,ସାଙ୍ଗସାଥୀ ଆଜି ବି ରୋହିତଙ୍କୁ ଝୁରି ହେଉଛନ୍ତି ।
ମ ରାମପୁରରୁ ପରମାନନ୍ଦ ବିଶି ଙ୍କ ରିପୋର୍ଟ୍ l
