ରାୟଗଡ଼ା-ଜୟପୁର ରେଳପଥରେ ECoR ଜିଏମ୍ଙ୍କ ଯାଞ୍ଚ
ସୁରକ୍ଷା, ଦୋହରୀକରଣ ଓ ଷ୍ଟେସନ ବିକାଶକୁ ଗୁରୁତ୍ୱ
ରାୟଗଡ଼ା, ୧୨।୯: ପୂର୍ବତଟ ରେଳପଥ (ECoR) ମହାପ୍ରବନ୍ଧକ ପରମେଶ୍ୱର ଫୁଙ୍କୱାଲ ଶନିବାର ରାୟଗଡ଼ା-କୋରାପୁଟ-ଜୟପୁର ରେଳପଥ ନିରୀକ୍ଷଣ କରିଛନ୍ତି। ଏହି ଅବସରରେ ରେଳ ସୁରକ୍ଷା, ଟ୍ରେନ୍ ଚଳାଚଳ, ଚାଲିଥିବା ନିର୍ମାଣ କାର୍ଯ୍ୟ ଓ ଯାତ୍ରୀ ସୁବିଧା ସମ୍ପର୍କରେ ସେ ସମୀକ୍ଷା କରିଥିଲେ।
ରାୟଗଡ଼ାରୁ ଜୟପୁର ପର୍ଯ୍ୟନ୍ତ ୱିଣ୍ଡୋ ଟ୍ରେଲିଂ ନିରୀକ୍ଷଣ କରି ଜିଏମ୍ ରେଳଧାରଣାର ସ୍ଥିତି, ସିଗ୍ନାଲ ବ୍ୟବସ୍ଥା, ଟ୍ରେନ୍ ପରିଚାଳନା ଓ ବିଭିନ୍ନ ଭିତ୍ତିଭୂମି କାର୍ଯ୍ୟର ଅଗ୍ରଗତି ଯାଞ୍ଚ କରିଥିଲେ।
ବିଶେଷକରି ସିଙ୍ଗାପୁର ରୋଡ୍-କୋରାପୁଟ ରେଳପଥ ଦୋହରୀକରଣ କାର୍ଯ୍ୟର ଅଗ୍ରଗତି ସମ୍ପର୍କରେ ସେ ଅଧିକାରୀଙ୍କଠାରୁ ସୂଚନା ନେଇଥିଲେ। ଏହି କାର୍ଯ୍ୟ ଶେଷ ହେଲେ ରେଳପଥର କ୍ଷମତା ବୃଦ୍ଧି ସହ ଟ୍ରେନ୍ ଚଳାଚଳ ଅଧିକ ସୁଗମ ହେବ ବୋଲି ଆଶା କରାଯାଉଛି।
ଜିଏମ୍ ବିଭିନ୍ନ ଷ୍ଟେସନରେ ସୁରକ୍ଷା ବ୍ୟବସ୍ଥା, ପରିମଳ, ଯାତ୍ରୀ ସୁବିଧା ଓ ଷ୍ଟେସନ ଭିତ୍ତିଭୂମିର ସମୀକ୍ଷା କରିଥିଲେ। ‘ଅମୃତ ଭାରତ ଷ୍ଟେସନ ଯୋଜନା’ ଅଧୀନରେ ଚାଲିଥିବା କାର୍ଯ୍ୟ ମଧ୍ୟ ଯାଞ୍ଚ କରି ଗୁଣବତ୍ତା ଓ କାର୍ଯ୍ୟସ୍ଥଳୀ ସୁରକ୍ଷା ବଜାୟ ରଖି ନିର୍ଦ୍ଧାରିତ ସମୟରେ କାମ ଶେଷ କରିବାକୁ ସେ ନିର୍ଦ୍ଦେଶ ଦେଇଥିଲେ।
ଚାଲିଥିବା ପ୍ରକଳ୍ପଗୁଡ଼ିକର ନିୟମିତ ତଦାରଖ କରିବା ସହ ଯାତ୍ରୀଙ୍କୁ ସର୍ବନିମ୍ନ ଅସୁବିଧା ହେବା ଭଳି ଭାବେ କାର୍ଯ୍ୟ ସମ୍ପାଦନ କରିବାକୁ ଜିଏମ୍ ଅଧିକାରୀମାନଙ୍କୁ କହିଥିଲେ।
ନିରୀକ୍ଷଣ ସମୟରେ ECoRର ବରିଷ୍ଠ ଅଧିକାରୀଙ୍କ ସମେତ ରାୟଗଡ଼ା ଡିଭିଜନାଲ ରେଳ ପ୍ରବନ୍ଧକ (DRM) ଅମିତାଭ ସିଙ୍ଗଲ ଉପସ୍ଥିତ ଥିଲେ।
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
