ସକାଳର ଜଣାଣ
ବିଜୟ କୁମାର ଜେନା
ମଣିଷ ଜୀବନ ସଂଘର୍ଷରେ ପୂର୍ଣ୍ଣ
କେତେବେଳେ ଆସେ ଦୁଃଖ
ଦୈବ ଦୁର୍ବିପାକ ରୋଗ ଜରା ବ୍ୟାଧି
ଛଡ଼ାଇ ନିଅଇ ସୁଖ।
ପୁଣି କେବେ ଆସେ ବେକାରୀ ଦାରିଦ୍ର୍ୟ
ସମାଜ ତ୍ରୁଟି ବିଚ୍ୟୁତି
ସୁଧାରିବା ପାଇଁ ଧନ ମାନ ହାନି
ତାହାକୁ ନହୁଏ ଜିତି।
ପରାଜୟ ଗ୍ଲାନି ହତାଶ ମଧ୍ୟରେ
ମଣିଷ ଯେ ଅସହାୟ
ନିଜ ସହ ସନ୍ଧି କରିନିଏ ଶେଷେ
ଅପ୍ରାପ୍ତି ନ କରି ଭୟ।
ଏହି ଲଢେଇତ ଅହରହ ଚାଲେ
ହାର ଜିତ ସଂଖ୍ୟା ନେଇ
ଜନମ କାଳରୁ ମରଣ ପର୍ଯ୍ୟନ୍ତ
ଆଲୋକ ଅନ୍ଧାର ଛାଇ।
ବିବ୍ରତ ନ ହୋଇ ବିଶ୍ୱାସ ରଖିଲେ
ଜଗନ୍ନାଥ ହେବେ ସାହା
ସୁଖ ଦୁଃଖକୁ ଯେ ସମଜ୍ଞାନ କରେ
ପାଏ ସେ ଜୀବନେ ରାହା।
ଅବସର ପ୍ରାପ୍ତ ପ୍ରାଧ୍ୟାପକ ଶାମୁକା ସାହି ରଣପୁର ନୟାଗଡ଼
