ସରକାରୀ ବିଦ୍ୟାଳୟର ଛାତରୁ ଖସୁଛି କଂକ୍ରିଟ
ରାଇରଙ୍ଗପୁର – ତା.୦୫/୧୧ ; ମୟୁରଭଞ୍ଜ ଜିଲ୍ଲା ଉଦଳା ବ୍ଲକ, ଖଲାଡ଼ି ପଂଚାୟତ ଅନ୍ତର୍ଗତ ବେଗୁନିଆଡ଼ିହା ଗ୍ରାମସ୍ଥିତ ସରକାରୀ ପ୍ରାଥମିକ ବିଦ୍ୟାଳୟର ଛାତରୁ ଖଣ୍ଡଖଣ୍ଡ କଂକ୍ରିଟ ଖସିଯିବା ଫଳରେ ଶ୍ରେଣୀଗୃହଟି ଅସୁରକ୍ଷିତ ଅବସ୍ଥାରେ ରହିଛି । ଆବଶ୍ୟକ ସଂଖ୍ୟକ ଶ୍ରେଣୀଗୃହ ନଥିବା ବେଳେ ଛାତଘରଟିର ଏପରି ଅବସ୍ଥା ବିଦ୍ୟାଳୟ ପାଇଁ ନାହିଁନଥିବା ଅସୁବିଧାକୁ ଡ଼ାକି ଆଣିଛି । ସେହିପରି ବିଦ୍ୟାଳୟର ପାଇଖାନା ବ୍ୟବହାର ହୋଇପାରୁନଥିବାର ଜଣାଯାଇଛି । ପିଲାଙ୍କ ଖେଳାଖେଳି ପାଇଁ ସରଞ୍ଜାମ ନଥିବା ସାଙ୍ଗକୁ ଚାରିପାଖକୁ ପାଚେରି ନାହିଁ । ଆଜି ନଭେମ୍ବର ୫ ତାରିଖ ଗୁରୁବାର ଦିନ ଲୋକ ସଂଗଠନ ଜନଜାଗୃତି ମଂଚ ତରଫରୁ ଏହି ବିଦ୍ୟାଳୟରେ ‘ପ୍ରତିବନ୍ଧକରୁ ପରିବର୍ତନ’ କାର୍ଯ୍ୟକ୍ରମ ଅନୁଷ୍ଠିତ ହୋଇ ଯାଇଛି । ଏହି ଅବସରରେ ଏଠାରେ କାର୍ଯ୍ୟରତ ଶିକ୍ଷକ, ଶିକ୍ଷୟିତ୍ରି ଓ ଛାତ୍ର ଛାତ୍ରୀ ମାନେ ମିଳିତ ଭାବରେ ବିଦ୍ୟାଳୟର ସମସ୍ୟା ସମ୍ପର୍କରେ ଅବଗତ କରାଇଥିଲେ । ସିଆରସିସି ଶାନ୍ତନୁ କୁମାର ଦାଶ ମଧ୍ୟ ଉପସ୍ଥିତ ଥିଲେ । ମଂଚର ଜନସାଥି ରବିନ୍ଦ୍ର ଓ ଉର୍ମି ଲିଡ଼ର ସସ୍ମିତା ଆଜିର ଏହି କାର୍ଯ୍ୟକ୍ରମ ପରିଚାଳନାର ନେତୃତ୍ୱ ନେଇଥିଲେ ।
ରାଇରଙ୍ଗପୁର ରୁ ଅକ୍ଷୟ ବିଶ୍ୱାଳ
