ସାଇବର ଠକେଇକୁ ଠାବ କରିବା ସହ ରାଉରକେଲା ପୋଲିସ୍ ମୁମ୍ବାଇରୁ ଜଣେ ଅଭିଯୁକ୍ତଙ୍କୁ ଗିରଫ କଲା
ରାଉରକେଲା: ଏକ ବଡ ସାଇବର ଠକେଇକୁ ଠାବ କରିବା ସହିତ ରାଉରକେଲା ପୋଲିସ୍ ମୁମ୍ବାଇରୁ ଜଣେ ସାଇବର ଅପରାଧୀକୁ ଗିରଫ କରିଛି। ନକଲି ଟ୍ରାଫିକ୍ ଇ-ଚାଲାଣ ମାଧ୍ୟମରେ ଜଣେ ରାଉରକେଲା ବାସିନ୍ଦାଙ୍କଠାରୁ ପ୍ରାୟ ୬ ଲକ୍ଷ ଟଙ୍କା ଠକେଇ ମାମଲାରେ ରାଉରକେଲା ସାଇବର କ୍ରାଇମ ଏବଂ ଅର୍ଥନୈତିକ ଅପରାଧ ଶାଖା ଏକ “ଏପିକେ ଫାଇଲ୍” ସାଇବର ଠକେଇ ମାମଲାର ସମାଧାନ କରି ଗୁରୁତ୍ୱପୂର୍ଣ୍ଣ ସଫଳତା ହାସଲ କରିପାରିଛି।
ରାଉରକେଲା ପୋଲିସର ସୂଚନା ଅନୁସାରେ, ୨୦୨୬ ମଇ ୩୦ ତାରିଖ ରାତି ପ୍ରାୟ ୧୦ଟା ୩୦ ସମୟରେ ଅଭିଯୋଗକାରୀ ଏକ ହ୍ୱାଟ୍ସ ଆପ୍ ମେସେଜ୍ ପାଇଥିଲେ ଯେ, ଯାହା ଏକ ସରକାରୀ ଟ୍ରାଫିକ୍ ଇ-ଚାଲାଣ ପରିବହନ ବିଭାଗ ବିଜ୍ଞପ୍ତି ପରି ଥିଲା। ସେହି ମେସେଜରେ ତାଙ୍କୁ ପରିବହନ କାର୍ଯ୍ଯାଳୟ ରେ ୫୦୦ ଟଙ୍କା ଜମା କରିବାକୁ କୁହାଯାଇଥିଲା। ଅଭିଯୋଗକାରୀ ମେସେଜ୍ ଉପରେ କ୍ଲିକ୍ କଲା ପରେ, ତାଙ୍କ ଫୋନକୁ ବହୁ ସଂଖ୍ୟକ ଓଟିପି ମେସେଜ୍ ଆସିବା ଆରମ୍ଭ କରିଥିଲା। ସେ ତୁରନ୍ତ ତାଙ୍କ ବ୍ୟାଙ୍କ ବାଲାନ୍ସ ଯାଞ୍ଚ କରି ଜାଣିବାକୁ ପାଇଲେ ଯେ, ତାଙ୍କ ଆକାଉଣ୍ଟରୁ ଛଅଟି ଅନଧିକୃତ ୟୁପିଆଇ ଟ୍ରାଞ୍ଜାକ୍ସନ୍ କରାଯାଇଛି। ତାଙ୍କ ସଞ୍ଚୟ ଆକାଉଣ୍ଟରୁ ମୋଟ ୫,୯୯,୫୮୮.୫୩ ଟଙ୍କା (ପ୍ରାୟ ୬ ଲକ୍ଷ) ଅନଧିକୃତ ଡେବିଟ୍ ହୋଇଛି।
ପୋଲିସର ତଦନ୍ତ ସମୟରେ, ଟ୍ରାଞ୍ଜାକ୍ସନ୍ ଟ୍ରେଲ୍ ଯାଞ୍ଚ କରାଯାଇଥିଲା ଏବଂ ହିତାଧିକାରୀଙ୍କ ଆକାଉଣ୍ଟ ବିବରଣୀ, ଟ୍ରାଞ୍ଜାକ୍ସନ୍ ଷ୍ଟେଟମେଣ୍ଟ, କେୱ।ଇସି ଡକ୍ୟୁମେଣ୍ଟ ସହିତ ଅନ୍ୟାନ୍ୟ ପ୍ରାସଙ୍ଗିକ ରେକର୍ଡ ପାଇବା ପାଇଁ ସମ୍ପୃକ୍ତ ବ୍ୟାଙ୍କ, ପେମେଣ୍ଟ ମଧ୍ୟସ୍ଥି ଏବଂ ଅନ୍ୟାନ୍ୟ ସଂସ୍ଥାଗୁଡ଼ିକୁ ଅନୁରୋଧ କରାଯାଇଥିଲା।
ତଦନ୍ତ ସମୟରେ ଆହୁରି ଜଣାପଡିଥିଲା ଯେ, ଠକେଇ ପରିମାଣ ବିଭିନ୍ନ ବ୍ୟାଙ୍କ ସହିତ ଜଡିତ କାର୍ଡ ସହିତ ଜଡିତ କ୍ରେଡିଟ୍-କାର୍ଡ ବିଲ୍ ପେମେଣ୍ଟ ପାଇଁ ବ୍ୟବହାର କରାଯାଇଥିଲା। କ୍ରେଡିଟ୍ କାର୍ଡ ବିବରଣୀ ଏବଂ ଲିଙ୍କ୍ ହୋଇଥିବା ମୋବାଇଲ୍ ନମ୍ବର ପାଇବା ପାଇଁ ପୋଲିସ ଦଳକୁ ମୁମ୍ବାଇ ପଠାଯାଇଥିଲା। ଫଳରେ ମୁମ୍ବାଇର ମହାରାଷ୍ଟ୍ରରୁ ଅଭିଯୁକ୍ତ ଚେତନ ଶରଦ କୁର୍ହାଡେଙ୍କୁ ଗିରଫ କରାଯାଇଥିଲା।
ଅଭିଯୁକ୍ତ ନିକଟରୁ ଜବତ ହୋଇଥିବା ବ୍ୟାଙ୍କ ଆକାଉଣ୍ଟର ବିବରଣୀ ପରବର୍ତ୍ତୀ ସମୟରେ “ସମାନଭୟା ପୋର୍ଟାଲ୍” ଏବଂ ରାଉରକେଲା ସାଇବର ସେଲ୍, ମାଧ୍ୟମରେ ଯାଞ୍ଚ କରାଯାଇଥିଲା। ଅଭିଯୁକ୍ତଙ୍କ ସହିତ ଲିଙ୍କ୍ ହୋଇଥିବା ବ୍ୟାଙ୍କ ଆକାଉଣ୍ଟ ଏବଂ କ୍ରେଡିଟ୍ କାର୍ଡଗୁଡ଼ିକ ହରିୟାଣା, ମୁମ୍ବାଇ, ଦିଲ୍ଲୀ ଏବଂ କୋଲକାତା (ପଶ୍ଚିମ ବଙ୍ଗ) ସମେତ ବିଭିନ୍ନ ରାଜ୍ୟରୁ ପ୍ରାୟ ୧୮.୭ ଲକ୍ଷ ଟଙ୍କା ଠକେଇ କାରବାର ସହ ସାଇବର ଅପରାଧ ଅଭିଯୋଗ ସହିତ ଜଡିତ ଥିଲା।
ଘଟଣାରେ ମୁମ୍ବାଇରୁ ଗିରଫ ଅଭିଯୁକ୍ତ ହେଲେ ମହାରାଷ୍ଟ୍ର ମୁମ୍ବାଇ କଳାଚୌକି ଥାନା ଅନ୍ତର୍ଗତ ପରେଲର ଚେତନ ଶରଦ କୁରହାଡେ (୩୫)।
ଅଭିଯୁକ୍ତଙ୍କ ନିକଟରୁ ଗୋଟିଏ ଆଇ ଫୋନ୍ ୧୫ପ୍ଲସ ଯେଉଁଥିରେ ଅଭିଯୋଗର ସିମ୍ ଅଛି। ଗୋଟିଏ ସାମସଙ୍ଗ୍ ଗାଲାକ୍ସି ଜେଡ୍ ଫୋଲ୍ଡ ମୋବାଇଲ୍, ୪ଟି କ୍ରେଡିଟ୍ କାର୍ଡ, ଗୋଟିଏ ପାନ୍ କାର୍ଡ ଜବତ କରାଯାଇଛି।
ପୋଲିସ ପକ୍ଷରୁ ଘଟଣାରେ ଅନ୍ୟ ବ୍ୟକ୍ତିମାନଙ୍କୁ ଚିହ୍ନଟ କରିବା ପାଇଁ ଏବଂ ସନ୍ଦିଗ୍ଧ ସାଇବର ଠକେଇର ପ୍ରବାହକୁ ଠାବ କରିବା ପାଇଁ ପୋଲିସ ପକ୍ଷରୁ ଅଧିକ ତଦନ୍ତ ଜାରି ରହିଛି।
ଆଜି ରାଉରକେଲା ପୋଲିସ୍ ମୁଖ୍ୟାଳୟରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ଏ ବିଷୟରେ ସୂଚନା ଦେଇଛନ୍ତି ରାଉରକେଲା ଆରକ୍ଷୀ ଅଧିକ୍ଷକ ନିତେଶ ଓ୍ବାଧଓ୍ବାନୀ, ଅତିରିକ୍ତ ଆରକ୍ଷୀ ଅଧିକ୍ଷକ ଶ୍ରାବଣୀ ନାୟକ, ସାଇବର ସେଲ୍ ଡିଏସପି ଅମରେନ୍ଦ୍ର ଷଣ୍ଢ, ଇନସ୍ପେକ୍ଟର ପଦ୍ମାବତୀ ମିର୍ଦ୍ଧାଙ୍କ ସମେତ ଅନ୍ୟାନ୍ୟ ବରିଷ୍ଠ ପୋଲିସ୍ ଅଧିକାରୀ ଉପସ୍ଥିତ ରହି ଏହି ସୂଚନା ଦେଇଥିଲେ।
ପୋଲିସ ପକ୍ଷରୁ ସଚେତନତା ବାର୍ତ୍ତାରେ କୁହାଯାଇଛି ଯେ ସାଧାରଣ ଜନତା ଯେକୌଣସି ଜରୁରୀକାଳୀନ ପରିସ୍ଥିତିରେ ସାଇବର ଥାନା କିମ୍ବା ସ୍ଥାନୀୟ ଥାନା କିମ୍ବା ୧୯୩୦ କିମ୍ବା ୧୧୨ ନମ୍ବରରେ ଯୋଗାଯୋଗ କରିବା ପାଇଁ ପୋଲିସ ପକ୍ଷରୁ କୁହାଯାଇଛି। କୌଣସି କଲରଙ୍କୁ ବ୍ୟକ୍ତିଗତ ସୂଚନା ଅର୍ଥାତ୍ ଆପଣଙ୍କର କିମ୍ବା ଆପଣଙ୍କ ପରିବାରର ବ୍ୟାଙ୍କ ବିବରଣୀ ସେୟାର କରନ୍ତୁ ନାହିଁ। ଅଜଣା ଏପିକେ ଫାଇଲ୍ ଡାଉନଲୋଡ୍ କରନ୍ତୁ ନାହିଁ।
ଏହି ଘଟଣାରେ ସାଇବର ଅପରାଧ ଏବଂ ଅର୍ଥନୈତିକ ଅପରାଧ ଶାଖା ଥାନା କେସ୍ ନମ୍ବର-୩୯ ତାରିଖ ୦୨.୦୮.୨୦୨୬ରେ ବିଏନ୍ଏସ୍ ଧାରା ୩୧୮(୪)/୩୧୯(୨)/୩୩୬(୩) ଓ ୨୦୦୦ର ଆଇ ଟି ଆକ୍ଟର Sec-୬୬/୬୬-C/୬୬-D ଅନୁଯାୟୀ ମାମଲା ରୁଜୁ କରାଯାଇଛି।
କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
