ଆସିଛି ପହିଲି ରଜ
ଜ୍ୟୋତ୍ସ୍ନା ରାଣୀ ଦେବୀ
ଆସିଛି ପହିଲି ରଜ
ଆସିଛି ପହିଲି ରଜ
ଦୋଳିରେ ଝୁଲିବା କରି ମଉଜ
କରି ମଉଜଲୋ
କାହାକୁ କରୁଛୁ ଲାଜ ।
ବଣରେ ଫୁଟିଲା ମଲ୍ଲୀ
ବଣରେ ଫୁଟିଲା ମଲ୍ଲୀ
ରାଗରୁଷା ଛାଡି ଆ ମୋ ଗେହ୍ଲୀ
ଆ ମୋ ଗେହ୍ଲୀଲୋ
ଦୋଳିରେ ହସିବା ଝୁଲି ।
ପୋଡପିଠା ମହମହ
ପୋଡପିଠା ମହମହ
କାହିଁକି ଶୁଖିଛି ତୋ ଚନ୍ଦ୍ରମୁହଁ
ତୋ ଚନ୍ଦ୍ରମୁହଁ ଲୋ
କାହିଁକି କଥା ନ କହ ।
ଭାଙ୍ଗି ଦେ ରଜପାନ
ଭାଙ୍ଗି ଦେ ରଜପାନ
ତୁଚ୍ଛାରେ ଏତେ ତୁ କରୁ ଗୁମାନ
କରୁ ଗୁମାନ ଲୋ
ବୃଥାରେ ନ ଯାଉ ଦିନ ।
ପାଚିଲା ବଇଁଚ କୋଳି
ପାଚିଲା ବଇଁଚ କୋଳି
ଆମ୍ଵଡାଳେ ଦୋଳି ଅଛି ଓହଳି
ଅଛି ଓହଳି ଲୋ
ସଭିଏଁ ହେଲେଣି ମେଳି ।
ପାଦରେ ନାଲି ଅଳତା
ପାଦରେ ନାଲି ଅଳତା
କାନେ ଝୁମ୍ପିଫୁଲ ଅଣ୍ଟାରେ ସୂତା
ଅଣ୍ଟାରେ ସୂତା ଲୋ
ନାଇ ହସି କହ କଥା ।
ବ୍ରହ୍ମପୁର, ଗଂଜାମ
