ଶୁଭସନ୍ଧ୍ୟା
କାଙ୍ଗାଳୀ ଚରଣ ସେଠୀ
ତୁମେ ଚାଲି ଗଲେ ଏଇ ପଥ ଧାରେ
ଅଦିନେ ବସନ୍ତ ବହେ
ଚୁଆ ଚନ୍ଦନରେ ଚନ୍ଦ୍ର ମଲ୍ଲିକାର
ବାସନା ଚହଟୁ ଥାଏ ।
ପେନ୍ଥା ପେନ୍ଥା ସ୍ଵପ୍ନ ଛାଡି ଚାଲି ଯାଅ
ବିଭୋରେ ଗୋଟାଉ ଥାଏ
କାହାକୁ ଭୁଲିବି କାହାକୁ ରଖିବି
ଆଖୁ ବାଡିରେ ମୁ ରହେ
ବିନା ପରଶରେ ସ୍ପନ୍ଦନ ଜାଗଇ
ଚୁମ୍ବକୀୟ ଆକର୍ଷଣ
କେଉଁ ତତ୍ତ୍ଵବିଦ୍ କି ନୀଳ ନକ୍ସାରେ
କରିଛି ତୁମ ନିର୍ମାଣ ।
ସ୍ତବ୍ଧ ହୋଇଯାଏ ଇଥର ତରଙ୍ଗ
ତନୁ ତଟିନୀରେ ବନ୍ୟା
ଅବା ରମ୍ଭା ଉମା ମେନକା ଉର୍ବଶୀ
କିମ୍ବା ତୁମେ ଦେବ କନ୍ୟା ।
ମୋ ମନ କାମନା କଳ୍ପନା ଲେନ୍ସରେ
ପ୍ରତିମୂର୍ତ୍ତି ହୋଇ ଥାଅ
ଯେତେ ଦେଖୁଥିଲେ ନୂଆ ଲାଗୁ ଥାଅ
ଆଖିରେ ବି କଥା କୁହ ।
ରୂପ କଳ୍ପଶାଳା ମୁଖ ମୁଖଶାଳା
ଓଠ କୁଙ୍କୁମର ତାରା
ମ୍ଳାନ ଗୋଧୂଳିରେ ମର୍ମ ମର୍ମରେ
କଟାକ୍ଷରେ ଲକ୍ଷେହୀରା ।
ଅଳପ ହସରେ ଅଫେରା ନଦୀରେ
ଅନେକ ଆଶାର ଢେଉ
ଅଳସକନ୍ୟା ମୋ ! ବିଳାସୀ ବନ୍ୟା ଗୋ !
ଶୁଭ ସଂଧ୍ୟା ଟିଏ ଆଉ ।
କାଙ୍ଗାଳୀ ଚରଣ ସେଠୀ
ଯାଜପୁର