ଝୁଲି ଝୁଲି ଆସୁଛି ମୋ କାଳିଆ ସୁନା
କବି ସୌରଭ ବୈଜୟନ୍ତୀ ମାଳା ମହାପାତ୍ର
ପୁରୀ ବଡ଼ ଦାଣ୍ଡେ ଭିଡ ଜମିଅଛି
ସଭିଏଁ ହରଷମନା
ଝୁଲି ଝୁଲି ଆସେ ମନ୍ଦ ମନ୍ଦ ହସେ
ଆମର କାଲିଆ ସୁନା…..(୦)
ଭଉଣୀ ଓ ଭାଇ ସଙ୍ଗତରେ ନେଇ
ମାଉସୀ ଘରକୁ ଯିବ
ଚଳା ନୟନରେ ଚାହିଁ ଆଦରରେ
ସବୁରି ଦୁଃଖ ହରିବ
ଚଢ଼ି ନନ୍ଦିଘୋଷ ହୋଇ ହସହସ
କିମିଆ କରିବ ସିନା…….(୧)
ଘଣ୍ଟ ହୁଳହୁଳି ପଡୁଛି ଉଛୁଳି
ହରିବୋଲର ଶବଦ
ଶୁଣି ମୋ କାଳିଆ ମନ ମୋହନିଆ
ମନରେ ଭରି ଆନନ୍ଦ
ଢାଳି ଦେବ ତାର ଧାରା ଆଶିଷର
ଉଡାଇ ତାହାର ବାନା…….(୨)
ଦେବଦଳନରେ ସୁଭଦ୍ରା ମଝିରେ
ଆଗେ ବଳଭଦ୍ର ଭାଇ
ପଛରେ ଆସଇ ସବୁ ଦେଖୁଥାଇ
ଦାରୁବ୍ରହ୍ମ ରୂପ ନେଇ
ପାପ ତାପ ହାରୀ ସେହି ଦଇତାରୀ
ସବୁ ଖାଲି ତାର ବିନା……(୩)
ତା ରଙ୍ଗ ଅଧର ଠାଣି ତା ସୁନ୍ଦର
ସିଏ ଅଜ ଅବିନାଶୀ
ମିଛ ମାୟା ଘୋର ପାର୍ଥିବ ସଂସାର
ସିଏ ଟି ଏକା ବିଶ୍ୱାସୀ
ଜଗତର ଦୁଃଖ ହରୁ ସେ ଶ୍ରୀମୁଖ
ଏତିକି କରୁ ସେ ସୁନା……(୪)
ଫୁଲବାଣୀ, କନ୍ଧମାଳ
