ବଡ଼ଦାଣ୍ଡ ଜଗନ୍ନାଥ
ଆମ ପରମ୍ପରା ଆମରି ସଂସ୍କୃତି
ଅଟେ ନିଆରା ବିଶ୍ଵରେ
ଆମ ଜଗନ୍ନାଥ ଜଗତ ଠାକୁର
ସବୁ ଧରମ ଉର୍ଦ୍ଧ୍ଵରେ ॥
ଜାତି ମତ ପନ୍ଥ ସବୁକୁ ଏଡ଼ାଇ
ଶିରି ମନ୍ଦିରୁ ବାହାରି
ବଡ଼ଦାଣ୍ଡେ ଉଭା ହୁଅନ୍ତି ଠାକୁରେ
ଶୁଣନ୍ତି ଭକ୍ତ ଗୁହାରି ॥
ବାରମାସେ ତେର ଯାତରା ମଧ୍ୟରେ
ଘୋଷ ଯାତ୍ରା ଯେ ମହାନ
ଶ୍ରୀଗୁଣ୍ଡିଚା ଯାତ୍ରା ରଥଯାତ୍ରା ନାମେ
ଯାତ୍ରା ପତିତ ପାବନ ॥
ସର୍ବ ଜାତି ଧର୍ମ ପତିତ ଜନଙ୍କୁ
ରଥେ ଦିଅନ୍ତି ଦର୍ଶନ
ରଥେ ବାମନଙ୍କୁ ଦେଖିଦେଲେ ଥରେ
ମିଳେ ବଇକୁଣ୍ଠ ସ୍ଥାନ ॥
ଆଷାଢ଼ ଶୁକଳ ଦ୍ଵିତୀୟା ତିଥିରେ
ରଥକୁ ପ୍ରଭୁ ଆସନ୍ତି
ରତ୍ନ ବେଦୀ ଛାଡ଼ି ଜନମ ବେଦୀକୁ
ସଭିଙ୍କୁ ସାଥେ ନିଅନ୍ତି ॥
ବଳିଆର ଭୁଜ ତାଳଧ୍ଵଜ ରଥେ
ସୁଭଦ୍ରା ଦେବଦଳନେ
ନନ୍ଦିଘୋଷ ରଥେ ଜଗତର ନାଥ
ଯାଆନ୍ତି ଆନନ୍ଦ ମନେ ॥
ଚକ୍ର ସୁଦର୍ଶନ ମଦନ ମୋହନ
ସାଥିରେ ଧରି ଯାଆନ୍ତି
ଆଡ଼ପ ମଣ୍ଡପେ ଜନମ ବେଦୀରେ
କେତେ ଲୀଳା କରିଥାନ୍ତି ॥
କଥା ଦେଇଥିଲେ ବରଷକେ ଥରେ
ଯିବି ଶ୍ରୀଗୁଣ୍ଡିଚା ଘର
ନବଦିନାତ୍ମକ ଯାତରାରେ ଯାଇ
କଥା ରଖନ୍ତି ଠାକୁର ॥
ବାଟେ ମାଉସୀମା ପୋଡ଼ପିଠା ଖାଇ
ସଭିଏଁ ତୃପ୍ତ ହୁଅନ୍ତି
ଆଡ଼ପ ବେଦୀରେ ଭକତ ଦର୍ଶନେ
ସାଯୁଜ୍ୟ ମୁକ୍ତି ଦିଅନ୍ତି ॥
ବାହୁଡ଼ା ଯାତ୍ରାରେ ନିତ୍ୟଲୀଳା କ୍ଷେତ୍ର
ଫେରନ୍ତି ଜଗତ ସାଇଁ
ରଥେ ଏକାଦଶୀ ସୁନାବେଶ ସାରି
ଅଧର ପଣା ଲଗାଇ ॥
ଲକ୍ଷ୍ମୀ ଠାକୁରାଣୀ ମାନ ଭାଙ୍ଗିଥାନ୍ତି
ରସଗୋଲା ଲାଞ୍ଚ ଦେଇ
ନିଳାଦ୍ରି ବିଜେରେ ରତନ ବେଦୀରେ
ବସନ୍ତି ପ୍ରଭୁ ଗୋସାଇଁ ॥
ରଥଯାତ୍ରା ପର୍ବ ସମାପ୍ତ ହୁଅଇ
ଭକତ ଜନଙ୍କ ହିତେ
ମିନତି ଏତିକି ହରିନିଅ ପ୍ରଭୁ
ଜଗତର ଦୁଃଖ ଯେତେ ॥
ରତିନାରାୟଣ ରାଉତ
ହରିଚନ୍ଦନପୁର, କେନ୍ଦୁଝର, ଓଡ଼ିଶା
