ଜୀବନ ରଥ
ରଥ ଦଉଡିକୁ ମୁଣ୍ଡରେ ଲଗାଇ
ଟାଣୁଛି ବିଶ୍ବାସେ କେତେ
ତୁମ ଆଜ୍ଞା ବିନା ରଥ ହଲିବନି
ମନ ମୋ କହୁଛି ସତେ
ପ୍ରଭୁର ରଥକୁ ଟାଣି ମୁଁ ନେଉଛି
ଧନ୍ୟ ମୋ ଜୀବନ ସତେ
ରଥ ଦଉଡିକୁ ……………୧
ଜୀବନ ରଥ ରେ ତୁମେ ତ ସାରଥୀ
ରଥକୁ ନେଉଛ ଟାଣି
ତୁମ ବିନା କିଏ ଟାଣିକି ପାରିବ
ଜୀବନ ରଥକୁ ପୁଣି
ଯେଉଁ ଦିନ ପ୍ରଭୁ ରଥ ଅଟକିବ
ବାହୁଡ଼ା ହୋଇବ ସତେ
ରଥ ଦଉଡିକୁ ………………୨
ବଡ଼ ଦାଣ୍ଡ ଆଜି ଦୁଲୁକି ପଡ଼ୁଛି
ଶଙ୍ଖ ହୁଳହୁଳି ସୁଣି
ହରିନାମ ସତ୍ୟ ପକାଇ ମୋତେରେ
ସ୍ବର୍ଗ ଦ୍ବାର ନେବେ ପୁଣି
ଜୀବନ ରଥଟା ମାଟିରେ ମିଶିଲା
ହର୍ଷ ନ ହେବକି ସତେ
ରଥ ଦଉଡିକୁ ମୁଣ୍ଡରେ ଲଗାଇ
ଟାଣୁଛି ବିଶ୍ବାସେ କେତେ………..୩
ସତ୍ୟରଞ୍ଜନ ସ୍ୱାଇଁ
ଅବଦଲପୁର, ଯାଜପୁର
