ଘାସଫୁଲ
ପ୍ରତାପ କିଶୋର ରାଉତ
ଭୟରେ ହେଉ ବା ସନ୍ତର୍ପଣ ରେ ହେଉ
କେଉଁ ଅନାଦି କାଳରୁ ମୁଣ୍ଡ ଟେକି ବାଟ ଚାଲେ
ପାଦତଳେ ମକଚି ଦେବାର ଭୟ
ମୁଣ୍ଡ ଉପରେ ଡେମୋକ୍ଲିସ ଖଡ୍ଗ
ବୈଶାଖର ନାଲି ଆଖି
ଶ୍ରାବଣ ର ମେଘମନ୍ଦ୍ର ଗର୍ଜନ
ଶୈତ୍ୟର କାକର ଟୋପା ରେ
ଭାଗ୍ୟ ବଦଳାଇବାର କ୍ଷଣିକ ସୁଖ,
ଆକାଶ ର ଆଖିରେ ସ୍ୱପିଳ ରଙ୍ଗ
ପ୍ରବୋଧନା ର ନୂଆ ସକାଳ
ବଞ୍ଚିବାର ରାହା ଦିଏ ଆଗାମୀ ଦିନକୁ
ସମାଜ ର ପ୍ରତି କୋଣ ଅନୁକୋଣେ
ମରି ମରି ବଞ୍ଚିବାର ଅନାହତ ବିଶ୍ୱାସ
ରଙ୍ଗ ଭରା ସକାଳ ରେ
ହଜାର ସ୍ବପ୍ନର କ୍ଷଣିକ ଇସାରା
ବଞ୍ଚିବାକୁ ଯୋଗାଣ ଦିଏ ,
କିଏ ଜାଣେ ଭାଗ୍ୟ ରେ କଣ ଅଛି
ଜୀବନ ର ମାନେତ ଯନ୍ତ୍ରଣା
ଏସବୁକୁ ଦେହସୁଆ କରିବାକୁ ଚେଷ୍ଟା
ଡେଣାରେ ସଞ୍ଚିତ ବଳ କୁ
ପରଖିବାରେ ନିୟତ ପ୍ରୟାସ
ସକାଳ ର ପ୍ରତୀକ୍ଷା ରେ ଦିନ ପରେ ଦିନ ବିତେ
ତଥାପି ଆଗାମୀ ସକାଳ କି ସ୍ୱପ୍ନ ଆଣିବ
ଦେଖୁ ଦେଖୁ ରାତି ପାହେ
ଘାସ ଫୁଲ ହୋଇ ବଞ୍ଚିବା କଣ ସମ୍ଭବ????
ତେନ୍ତୁଳିପଦୀ , ହାଟଡ଼ିହି , କେନ୍ଦୁଝର
