ଘଟାନ୍ତର

ଉପେନ୍ଦ୍ର କୁମାର ବସ୍ତିଆ

     

ଭୁଲ କରିବା ଏକ ସହଜାତ ପ୍ରବୃତ୍ତି 

କିନ୍ତୁ ଭୁଲଟାକୁ ଠିକ କରିବା 

ଗୋଟେ ଏକ ରୂପାନ୍ତର ।

ଇଚ୍ଛା ସବୁ ହନ୍ତସନ୍ତ 

ସ୍ବପ୍ନ ସବୁ ମୋକ୍ଷ ମୁହାଁ 

ଭ୍ରମୁ ଥାନ୍ତି ଜନ୍ମ ଜନ୍ମାନ୍ତର ।

ଜରାର ଜରାୟୁରେ 

କଙ୍କାଳଟା ଜଗି ବସିଥାଏ 

ବାଡ ଭଳି ରକ୍ତ ଆଉ ମାଂସର ।

ସମୟର ଅଫେରା ନଦୀରେ 

ପୁଣ୍ୟ ସବୁ ଧୋଇଯାଏ 

ଜୀବନକୁ ଢାଙ୍କି ଥାଏ 

ପାପର ଚଦର । କେହି 

 ଜଣେ କଷୁଥାଏ ଅଙ୍କ ବସି 

ଭଲମନ୍ଦ ପାପ ଓ ପୁଣ୍ୟର ।

ଲେଉଟାଣି ବେଳ ହେଲେ 

ସବୁ ତୁଚ୍ଛ ତୁଚ୍ଛ ଲାଗେ 

ମୋହ ମାୟା ସଂସାର 

ଦିନ ଗଣୁଥାଏ ବସି ସିଏ 

କେବେ ତାର ହେବ ଘଟାନ୍ତର ।

ରାଉରକେଲା