।। ଏ କେଉଁ ପ୍ରକାର ମୋହ ।।

   

                   କୈଳାସ ଚ଼ନ୍ଦ୍ର ପାଢ଼ୀ

କୋଟି ବୁଭୁକ୍ଷୂ ର ଆର୍ତ୍ତ ଚ଼ିତ୍କାରେ

                ଥରିଉଠେ ଯେଉଁ ମାଟି,

ସ୍ବାଧୀନତାର ଲୋହିତ ସୂର୍ଯ୍ୟ

                କେମିତି ଉଠିଛି ଫୁଟି ।

ଏ ନୁହେଁ ସାମ୍ୟବାଦ

ସବଳ ହାତରେ ସ୍ବାଧୀନତା ଏଠି

ଦୁର୍ବଳର ଯେ 

             ଜୀବନ-ମର୍ମନ୍ତୁଦ ।।

ଗୀତାବାଣୀ ଆଜି ପ୍ରଚ଼ାର ପ୍ରସାର

             ଧର୍ମକୁ ଆଖି ଠାର,

ଜହ୍ଲାଦ ରଚ଼େ ମନୁ ସଂହିତା

             ସ୍ଥିତି ଆଉ ପ୍ରଳୟର।

ଭଗବାନ ଏଠି କିଏ ?

ଏଇ ପ୍ରଶ୍ନଟି ନିଜକୁ ନିଜେ ମୁଁ

ପଚାରିଛି କେତେଥର

              ଉତ୍ତର ନାହିଁ ପାଏ ।।

କର୍ପୂର ନାହିଁ କପଡ଼ାଟା ଏଠି

             ଆଖିରେ ଚ଼ମକ ବୋଳେ,

କପଡ଼ାର ତଳେ ନାଗଶିଶୁ ତାର

             ଉତ୍ ଫଣ ଫଣା ତୋଳେ।

ନୀଳ-ନୀଳିମାର ତଳେ

ବିସ୍ତାରେ କାୟା ଝଡ଼-ନିର୍ମମ

ଲୁଟି ନେବା ପାଇଁ ଶିରୀ-ସଂପଦ

ଜୀବନ-ଜୀବିକା

              ଅନାୟାସେ-ଅବହେଳେ।।

ସ୍ଥିତି-ପ୍ରଳୟର ଘଡ଼ି ସନ୍ଧିରେ

              ସୃଷ୍ଟି ଦୋଳାୟମାନ,

ନିଖୋଜ ଏଠାରେ ସାହିତ୍ୟ-ସଂସ୍କୃତି

              କୁତ୍ସିତ-ସ୍ବାଭିମାନ 

ଆତ୍ମୀୟତାରେ ଦ୍ରୋହ-

ସର୍ବନାଶକୁ ସ୍ବାଗତ କରିବା

ସୂତ ପୁତ୍ର ର

            ଏ କେଉଁ ପ୍ରକାର ମୋହ ??

           

କୁମାର ପୁର। ଅନନ୍ତ ପୁର।

ବସୁଦେବ ପୁର ।ଭଦ୍ରକ ।